Ватанымның ал таңы син, Арча!

Ватанымның ал таңы син, Арча!
Бүген очрашу буласын
Ишетеп белгәнсездер,
Якташларны күрергә, дип,
Ашкынып килгәнсездер.
Хәнәфи БӘДИГЫЙ
Казан шәһәрендә “Арча якташлыгы” җәмгыяте 2003 елның мартында оештырылган иде. Быел 27 мартта “Казан” милли–мәдәни үзәгендә үткәрелгән очрашу кичәсе җәмгыятьнең ун еллыгына багышланды.
Бәйрәм кичәсенә килүче якташларыбызны милли киемнәр кигән кызлар чәк–чәкләр белән каршы алды. Дәртле музыка, матур җырлар яңгырый, һәркайда бәйрәм рухы. Фойеда арчалыларның хезмәт уңышларын яктырткан стендлар урын алган, Арчаның 2,7нче, Курса-Почмак, Ашытбаш урта мәктәпләре, сәнгать мәктәбе бик матур күргәзмә оештырганнар. Кунакларны чәй өстәле артында тәмле ризыклар белән сыйладылар.
Бәйрәм кичәсе Арча районы турында фильм карау белән башланды. Туган якның матур табигате, тырыш, уңган халкы, мул игенле басулары, искиткеч казанышлары күз алдыннан үтте.
Сәхнәгә алып баручылар чыгуга зал тып–тын калды. Бүген алар дүртәү. “Арча” телерадиокомпаниясе директоры Рамил Мөхетдинов, Арчаның 5нче гимназиясенең 11 сыйныф укучысы, “Йолдызлык” конкурсы лауреаты Марат Мәгъсүмов, Шушмабаш урта мәктәбенең тәрбия эшләре буенча директор урынбасары Чулпан Сәмигуллина, шушы мәктәптән 4 сыйныф укучысы Лилия Әхмәдуллинаны тамашачылар бик тиз үз итте. Алар бәйрәмнең матур бер җыр кебек үтүенә үз өлешләрен кертте. Сәхнәнең бизәлеше дә искиткеч иде, чыгыш ясаучылар, әйтерсең лә, Арчаның гүзәл үзәк мәйданында басып тора!
Арча район Мәдәният йортының халык музыка уен кораллары оркестры, танылган җырчыларыбыз Расих Галимҗанов, Дамир Гасыймов, Булат Бәхтияров, Гөлназ Җәләлетдинова, Миндияр Шәймәрданов, Илзирә Сираҗиева, Илүзә Галимуллина, “Ар–и–Эль” балалар бию коллективы, гармунчылар Рәдис Харисов, Вагыйз Әһлиуллин, “Арча егетләре” халык җыр ансамбле, “Сәфәр” төркеме чыгышлары алкышларга күмелде.
Кунакларны Арча муниципаль районы башлыгы Алмас Назиров тәбрикләде:
— Арча безнең һәрберебезгә бик якын, – диде ул. — Арча дигәч әни искә төшә, елга–күлләр, урман–кырлар, болыннар, көтү көткән болыннар күз алдына килә. Тирән мәгънәгә ия булган бу очрашуга без тирән дулкынлану хисләре белән килдек. Якташларыбыз кайда гына яшәсә дә, без аларның һәрвакыт ярдәмнәрен тоеп торабыз, уңышларына куанабыз.
Алмас Әминович “Арча якташлыгы” җәмгыятенә киләчәктә активлыгын тагын да арттырыр дигән теләк белдерде, уңышлар теләде.
“Арча якташлыгы” җәмгыяте президенты Тәлгать Шиһабиев җәмгыятьнең эшчәнлеге турында сөйләде, төрле өлкәләрдә казанышлар яулаган якташларга бүләкләр тапшырды.
Аннан соң Казан шәһәрендә яшәүче якташларыбыз сүз алды. Шамил Әхмәтҗанов, Фердинанд Фәтхи, Лилия Хәмитова, Рәфинә Ганиуллина, Нурзадә, Шамил Әхмәтҗанов, консерваториядә укучы кызларыбыз матур җырлар бүләк иттеләр.
Наил Касыймов, Рифат Корбанов, Хәнәфи Бәдигый, Сания Әхмәтҗанова үзләре иҗат иткән шигырьләрен укыдылар.
Чыгыш ясаучыларның һәркайсы шундый матур очрашуны оештыручыларга рәхмәт сүзләре җиткерде, районыбыз белән чиксез горурланулары, Арча шәһәренең, районның соңгы елларда күзгә күренеп үзгәрүенә шатлануларын әйтте. Казанда яшәүче якташыбыз, Социалистик Хезмәт Герое Галимулла Әсхәдуллин чыгышы да шундый хисләр белән сугарылган иде.
Кунаклар мондый очрашулар ешрак булсын, дигән теләк белән рәхмәт әйтеп таралышты.
Ильяс ФӘТТАХОВ