Мәктәпләрдә яңа нормативлар

Мәктәпләрдә яңа нормативлар
Муниципаль район башлыгы Алмас Назиров район мәктәпләрендә “Хезмәткә һәм оборонага әзер” (ГТО) нормативлары комплексын “Хезмәткә һәм Ватанны саклауга әзер” Спорт комплексы” исеме астында яңартырга дигән күрсәтмә бирде.
“Хезмәткә һәм оборонага әзер” программасы СССРда 1931 елдан 1991 елга кадәр эшләп килде. Ул шулай ук предприятиеләр һәм уку йортларында тормышка ашырылды. Һәр яшь төркеме өчен үз бәяләү критерийлары бар иде, нормативларны тапшыручыларны исә алтын яки көмеш медальләр белән бүләкләгәннәр. Комплекс 2 өлештән торган: I–VIII сыйныфлар өчен — “Хезмәткә һәм СССР оборонасына әзер бул” (БГТО) һәм 16 яшьтән өлкәнрәкләр өчен – “Хезмәткә һәм оборонага әзер”. Тапшырылучы нормативлар арасында йөгерү, граната ату, тартылу, сикерү, чаңгыда йөрү, йөзү, канатка менү, ату, туристик походлар бар иде.
“Хезмәткә һәм Ватанны саклауга әзер” Спорт комплексы”на кергән күнегүләр буенча ярышларда катнашу укучыларның физик үсешенә уңай тәэсир итүгә, кыюлык, тәртиплелек, максатка ирешүчәнлек кебек сыйфатлар тәрбияләүгә юнәлдерелгән. Нормативлар комплексы биш баскычтан тора: I баскыч — “Стартка әзер” (II–III сыйныф укучылары өчен — 7–9 яшь), II баскыч — “Кыюлар һәм җитезләр” (IV–V сыйныфлар өчен — 10–11 яшь), III баскыч — “Спорт сменасы” (VI–VII сыйныфлар өчен — 12–13 яшь), IV баскыч — “Көч һәм батырлык” (VIII–IX сыйныфлар өчен — 14–15 яшь), V баскыч — “Физик яктан камиллек (X–XI сыйныфлар өчен 16–18 яшь). Һәр баскыч өчен аерым бурычлар куелган. Мәктәпне тәмамлаганда укучыларның физик яктан әзерлеге югары дәрәҗәдә булыр, алар армия хезмәтенә һәм хезмәт эшчәнлегенә әзерлекле булырлар дип көтелә. Программага спортның 20дән артык төре кертелгән. Алар укучыларның яшь үзенчәлекләрен исәпкә алып бүленгән. Бүгенге көндә мәктәп-ләрдә программаны тормышка ашыру актив рәвештә алып барыла: кышкы спорт төр-ләре буенча нәти-җәләр инде билгеле, хәзер спортның башка төрләре буенча нормативлар тапшыру өчен әзерлек эшләре алып барыла.
ТР хәрби комиссариатының Арча һәм Әтнә районнары буенча бүлек җитәкчесе Алмаз Борһанов бу программаны тормышка ашыруның бик кирәкле булуын билгеләп үтте. Илнең һәр гражданы Ватанны саклаучы булып тора. Шуңа күрә ул физик яктан әзерлекле, чыныгу алган булырга тиеш. Мәктәп яшеннән үк спорт белән шөгыльләнү бу сыйфатларны тәрбияләүнең нигезе, сау–сәламәт кешеләрнең саны артуга этәр-геч булып тора. Ә бу, үз чиратында, армия хезмәтенә яраксыз егетләрнең кимүенә китерә.
Мондый яңалык спортка мәхәббәтне бала вакыттан, мәктәп яшеннән үк тәрбияләргә кирәк дип санаучы педагоглар һәм әти–әниләр арасында да яклау тапты. “Яңалык — ул онытылган иске әйбер. Мин “Хезмәткә һәм Ватанны саклауга әзер” нормативларын кертү, беренче чиратта, балаларның сәламәтлегенә, аларның үсешенә уңай йогынты ясар дип уйлыйм. Өйрәнгәннәре аларга киләчәк тормышларында, эш урынында, армия-дә хезмәт иткәндә кирәк булачак. Нормативларны тапшыру, яшьтәшләреннән калышмас өчен укучылар физик күнегүләр белән дәрестән тыш вакытта да шөгыльләнәчәк. Нәтиҗәләр, укучыларның ирешкән уңышлары аларның үзбәяләре, яшьтәш-ләре арасында дәрәҗәләре артуга китерәчәк”, — ди 5нче гимназиянең физик тәрбия укытучысы Зөфәр Ильясов.
Спорт яратучылар санының көннән–көн арта баруы шулай ук районның бу нормативларны кертүгә әзер булуына дәлил һәм үсеп килүче буын өчен үрнәк булып тора. Кыш көне стадионда чаңгы юлы буш тормады, ә җәй көне ул йөгерү юлына әйләнә. Районда шулай ук баскетбол, футбол, волейбол, хоккей, зур теннис кебек спорт төрләре белән мавыгучылар да күп. Арчада бассейн булу да сәламәтлекне ныгытуга яңа мөмкинлекләр ачты. Районда һәрдаим укучылар, шулай ук мәгариф учреждениеләре, предприя- тиеләр, оешмалар һәм авыл хуҗалыгы бер-ләшмәләре коллективлары арасында спорт ярышлары уздырыла. Әйе, бүгенге көндә спорт актив яшәү рәвеше булып тора. Бу программаны тормышка ашыру сәламәт яшәү рәвеше алып барырга омтылучыларны арттырыр, начар гадәтләргә иярүчеләр санын киметергә ярдәм итәр дип уйлыйм. Армия хезмәтенә яраклы, кирәк чакта Ватаныбызны якларга әзер булган ир–егетләребез саны да артыр.
Гөлназ ГЫЙНИАТУЛЛИНА