Казанга — базарга

Казанга — базарга
Татарстан Республикасы Хөкүмәтенең фермер хуҗалыкларына булышу максатчан программасында авыл хуҗалыгы продукциясен хуҗалык итүнең кече формалары тарафыннан җитештерүне һәм сатуны арттыру, шуның нәтиҗәсендә авылда тормыш дәрәҗәсен күтәрү күздә тотыла.
Әлеге бурычларны тормышка ашыруда Татарстан Республикасының яңа төзелгән Агросәнәгать паркы мөһим роль уйнарга тиеш.
Агросәнәгать паркы — авыл хуҗалыгы өлкәсендә кече һәм урта эшмәкәрлекне үстерүгә юнәлдерелгән технологик комплекс. Ул республика авыл хуҗалыгы җитештерүчеләрен авыл хуҗалыгы продукциясен эшкәртү, саклау һәм сату өчен кирәкле матди–техник база белән тәэмин итәргә тиеш.
Паркның гомуми мәйданы — 8,45 гектар. Төп бина — 50 мең кв.метр. Урамда сәүдә итү өчен 10 мең кв.метр урын бар. Сәүдә нокталары — 13,8 мең кв.метр (490 арендаторлык). Җитештерү цехлары, складлар, кунакханә, офислар, кафе, машина кую урыннарын да өстәсәк, күргәннәр тәэсирләндерерлек.
Төп бина бераз соңрак ачылачак. Ә менә урамдагы сәүдә мәйданнары һәр шимбә саен эшли инде. Узган атнада анда безнең район сәүдә итте. “Ватан”, “Северный”, “Ак Барс–агро” ширкәтләре, Наласа, Яңа Кенәр, Апаз авыл җирлекләре, “Жилкомбытсервис” ширкәте, Арча сәүдә идарәсе күп төрле продукция тәкъдим иттеләр. Быел ашлык бик кадерле, ярминкәдә бәясе дә арзанрак булгангамы, иң беренче ашлык алып килгән машиналар бушап калды.
Паркның төп бинасы ачылгач анда эшмәкәр-ләр, фермерлар үзләре дә сәүдә итә алачак. Безнең районнан да теләк белдерүчеләр шактый.
— Гаризалар әле дә кабул ителә, — ди район башкарма комитеты җитәкчесенең беренче урынбасары Рафил Исмәгыйлев.
Парк Казан ипподромы белән янәшә урнашкан, автобуслар даими йөреп тора.
Ильяс ФӘТТАХОВ