Өметләрне акладылар

Өметләрне акладылар
Ел саен республикабызның РОСТО (ДОСААФ) оешмасы яшьләрнең армия хезмәтенә әзерлеген ачыклау максатыннан автосыйныфларда укучы курсантлар арасында һөнәри осталык буенча “Яшь машина йөртүче — 2013” республика бәйгесен игълан итә.
Арча РОСТО (ДОСААФ) оешмасы әлеге ярышларга ел да ныклы әзерлек белән бара. Оешма җитәкчесе Ринат Алеев һөнәргә өйрәтү осталарына, инструкторларга бурычларны, максатны ныклап аңлата, ярышларга әзерлек өчен кирәкле бөтен мөмкинлекләрне тудыра. Һәр нәрсәне үзе контрольдә тота, анализ ясый, киңәшләрен бирә. Арчалыларның һәр өлкәдә беренче һәм үрнәк булырга тиешлекләрен ассызыклый.
Бәйгенең беренче этабы район үзәгендә, мәктәп автосыйныфларында җиңүчеләр арасында уздырылды. Шушмабаш һәм Апаз урта мәктәбе укучылары тәҗрибәле остаз, “Автошөгыль остасы — 2012” республика бәйгесе җиңүчесе, Шушмабаш урта мәктәбенең производствога өйрәтү остасы Әнис Шәймәрданов җитәкчелегендә ярышларга әзерләнде. Шушмабаш урта мәктәбенең данын яклап 3 укучы, Апаздан бер укучы катнашты, нәтиҗәләре сөенечле. Укучылар үзләренең “Яшь йөртүче” икәнлекләрен теоретик, практик, спорт, хәрби өлкәдә сынадылар. Апаз урта мәктәбеннән Ирек Низамов һәм Шушмабаштан Алинә Галимуллина уңышлы чыгыш ясап, ярышларның җиңүчеләре дип танылдылар. Аларга Арча РОСТО (ДОСААФ) оешмасы данын республика күләмендә яклау хокукы бирелде. Әсгать Әсәтов, Энҗе Вәлиева көндәшләреннән бик азга калышып, икенче урынны яуладылар. Афәрин кызлар, егетләр!
2 апрельдә Норлат шәһәрендә узган “Яшь машина йөртүче —2013” бәйгесе тантаналы шартларда дәүләт флагларын күтәрүдән башланды. Флаг күтәрүне узган ел әлеге ярышларда беренчелекне яулаган арчалылар хөрмәтенә безнең укучыларыбыз башкарды. Бу инде алар өчен әлеге ярышларда алдынгы булырга чакыру иде.
Ярышларга Татарстанның РОСТО (ДОСААФ) район оешмаларыннан 29 команда җыелды. Командалар барысы да яхшы әзерлек белән килгән, көрәш кискен барды. Курсантларыбыз Алинә белән Иреккә теория өлешендә юл йөрү кагыйдәләре буенча билет сорауларына дөрес, тиз җавап бирергә кирәк иде. Ирек Низамов билет сорауларына бер хатасыз 35 секунд эчендә җавап бирде. Алинә дә өлгер, хатасыз чиште. Икенче сынау пневматик мылтыктан ату, бу өлкәдә дә оста булуларын исбатлады безнекеләр. Алинәбез, 30 мөмкинлектән 29 очко җыеп, “Республика снайперы” исемен алды. Ирек Низамов АК-74 автоматын чын хәрбиләрчә сүтеп, җыйганда тизлегенә күз иярмәде, 34 секундта башкарып, призлы өченче урынны яулады. Алдагы ярыш — спорт (идәннән этелеп күтәрелү, турникта тартылу). Безнекеләр районыбызда спортка карашның югары дәрәҗәдә булуын расладылар. Алдынгы булырга тиеш тә иде алар, чөнки беренчеләрдән булып, районыбыз башлыгы Алмас Назиров мәктәпләргә “Хезмәткә һәм Ватанны саклауга әзер” Спорт комплексы” нормативларын кертүне максат итеп куйды. Уку йортларында кышкы төрләр буенча нәтиҗәләр ясалды, җәйге төрләрне үтәүгә ныклы әзерлек эшләре алып барыла. Сәламәт, куелган максатына ирешүче укучы һәр өлкәдә дә алдынгы булыр.
Ниһаять, яшь йөртүчеләр руль артына утырды. Укучыларының төгәл, шома, җитез, күпләрне шаккатырырлык итеп йөрүләре белән остаз–инструктор Әнис Равил улы горурланды. Алар аның өметен аклады, көндәшләрен бик күпкә артта калдырып, финишка беренче килде.
Дулкынландыргыч минутлар, нәтиҗәләр барлана. Кем беренче?! Арчалылар! Арчалылар кабат югары баскычта, кубок безнекеләр кулында. Безнекеләр “Яшь машина йөртүче — 2013” бәйгесе җиңүчеләре. Рәхмәт сезгә, укучыларым, рәхмәт сезгә, укытучым. Өметләрне акладыгыз.
Р.ШӘЙМӘРДАНОВА,
Шушмабаш урта мәктәбе директоры