Бай күңелле халыклы син, Арча!

Бай күңелле халыклы син, Арча!
Арча балалар сәнгать мәктәбе районыбызда яшәүче әдәбият сөючеләрне рухи азык өләшүче күңел бәйрәменә җыйды. Көн дәвамында кичәгә килгән халык язучылар белән аралашты.
Әдәбият–сәнгать бәйрәмен күңел бәйрәме дип шушы гүзәл кичәне оештыручы “Салават күпере”, “Сәхнә” журналларының баш мөхәррире Зиннур Хөснияр атады. “Татар дөньясына күп әдипләр биргән төбәк кенә түгел, биредә укымышлы халык яши. Иң күп газета–журнал, китап укучылары белән дә алдынгы ул Арча. Ә китап укучының күңеле бай була. Бүгенге чараны без Арча районыннан башлап, бөтен республикага таратырга ниятлибез”, — дип сөйләде язучы.
Район башкарма комитеты җитәкчесе урынбасары Надия Мифтахетдинованың хәер–фатыйхасы белән башланган очрашу ике өлештән торды. Иң элек язучылар мәктәп укучылары белән аралашты. Аннан әдәбият сөючеләр, китапханә хезмәткәрләре тарафыннан сораулар бирелеп, аларга язучыдан җаваплар алынып җанлы әңгәмә корылды. Ф.Хөсни, М.Җәлил исемендәге республика яшьләр премияләре лауреаты, җәмәгать эшлеклесе, Татарстанның атказанган мәдәният хезмәткәре, язучы, Г.Тукай исемендәге дәүләт бүләгенә кандидат Нәбирә Гыйматдинованың иҗатына багышланган әдәби конференциядә тамашачыга моңарчы ишетергә туры килмәгән шактый яңалык ачылды.
Арча районында яшьләрне әдәбиятка тарту, балаларның сәләтен үстерү, иҗади уңышларга этәрү максатыннан төрле конкурслар игълан ителә, премияләр бирелә. Көзгә Арчаның 3нче мәктәп базасында сәләтле балалар өчен махсус мәктәп ачылачак. “Гомәр, Гариф, Мөхәммәт абыйлар янып иҗат иткән чорда Татарстан Язучылар берлегендә 20дән артык язучы Арча районыннан иде, — ди Татарстан Язучылар берлеге рәисе Рафис Корбан. — Бүгенге көндә Арча район хакимиятенең шундый игелекле хезмәт алып барып, балаларны иҗатка кызыксындыруларына, әдәбиятка карата яхшы мөнәсәбәттә булуларына рәхмәт. Тәрбияле, әхлаклы балалар, әдәбияткә, мәдәнияткә мәхәббәт тәрбияләү игътибарга, рәхмәткә лаеклы эш”.
Нәбирә Гыйматдинова да Арча төбәгендә яшәүчеләрнең фидакарьлегенә соклануын яшермәде. “Мин гомерем буе шушы як кешеләренә рәхмәт әйтеп яшим. Үзвакытында әсәрләремне иң элек Гариф Ахунов белән Гомәр Бәширов хуплап, мине әдәбият дөньясына алып чыктылар, хәтта мине, иң беренче басылган хикәямне укып, танучы кеше дә Арчада булды. Без, язучы халкы, кая гына барсак та үзебезгә алмаш эзлибез. Арча ягына килгән саен минем олпат язучыларыбызның дәвамчыларын табасым килә”, — диде ул. Нәбирә ханым өчен Арча тагын бер вакыйга белән бәйле: аның “Китәм, димә!” әсәренә нигезләнеп эшләнгән фильм Арча районының гүзәл табигать кочагында төшерелгән.
Урманнарга бай Аксубай ягында туып–үскән язучы ханым әсәрләренә образларны да, нигездә, туган ягыннан җыярга тырыша. Китапны халык яратып укысын өчен чын йөрәктән, ихлас язарга кирәк, дип исәпли. Ивановода тегүчелеккә укыган, соңрак журна-листика бүлеген тәмамлаган кыз яшьтән иҗатның ачы җимешләрен татып, әле студент вакытында ук Язучылар берлегенә кабул ителә. Беренче күләмле әсәре “Сихерче”нең дөнья күргәннән соң кулдан–кулга йөреп укылуы язучыны яңадан–яңа әсәрләр иҗат итәргә этәрә. Геройлары үзгә сәерлек белән аерылып торса да, бүгенге көндә аның әсәрләре халык арасында иң күп яратып укыла һәм инде 7 ел “Ел китабы” номинациясендә 1нче урынга лаек була. “Әгәр әсәр күңелемә ошамаса, укучыга ярар өчен генә язмыйм”, — ди язучы. Нәбирә ханымның төп геройлары — табигать балалары, язучы аларны тирә–юнендә яшәүче халык арасыннан таба. Һәр әсәрнең үзәгендә мәхәббәт хисе ятса да, адәм баласының табигать белән гармониясе бозылуы, шуның нәтиҗәсендә явызлыкның күбәюе чагыла. Туфан Миңнуллин Нәбирә ханымның иҗатын бәяләгәндә еш кына: “Адәм ышанмаслык нәрсәләрне кеше ышандырырлык итеп сүрәтли”, — дияргә яраткан.
Кичәне тагын да тулыландырып сәнгать мәктәбе укучылары моңлы җырлар башкарды, мәктәп, педагогика көллияте укучылары язучының кайбер әсәрләренә гомуми анализ, мәктәпләрнең татар теле һәм әдәбияты укытучылары исеменнән Арчаның 2нче мәктәбеннән Рәсимә Ибраева, китапханәчеләр исеменнән язучының якташы Гөлкәй Хәбирова рәхмәтләрен җиткереп, чыгыш ясадылар. Кичәне җанлы итеп алып баручы район үзәк китапханәсе китапханәчесе Әлфия Галимованың үзенең дә Нәбирә Гыйматдинова әсәрләренә гашыйк икәнлеге язучыга сораулар яудырганда сизелде. Киләчәккә планнары турында сораганда, Нәбирә ханым серле генә: “Күңелдә матур хыяллар, темалар бар. Язучы язарга тиеш. Аллаһы Тәгалә безгә язарга, ә сезгә, хөрмәтле укучыларым, безнең әсәрләрне укыр өчен гомер, исәнлек бирсен”.
Тамашачыларның күңелендә тагын шундый очрашулар оештырсыннар иде дигән уй булса, иҗат әһелләренең дә теләкләре бер: яшьләр әдәбиятка күбрәк тартылсын, кызыксынсыннар иде. Бу очрашу хыялый җаннарның күңел кылларына кагылмый һәм иҗатка өмет чаткысы уятмый калмагандыр, мөгаен.
Розалия ЗИННӘТОВА