Теле барның иле бар

Теле барның иле бар
Арчаның 1нче урта мәктәбендә Габдулла Тукайның туган көненә багышланган шигырь сөйләүчеләр бәйгесе узды. Анда район мәктәпләреннән 1–11 сыйныф укучылары катнашты.
Районыбызда иҗат, сәнгать тормышының күп өлеше Тукай исеме белән бәйле. Балачактан Тукай аша туган җирнең гүзәллегенә сокланып яшибез. Тукай — буыннар шагыйре калдырган әдәби мирас — милләтебезнең горурлыгы. Апрельне без Тукай ае дип атарга яратабыз. Шунлыктан, бу айда шигъри кичәләр дә гадәттәгедән ешрак үткәрелә. Ә андый кичәләрне өлкәннәр генә түгел, мәктәп укучылары да шатланып көтеп ала. Чөнки сәләтле балаларга үзләренә ошаган шигъри әсәрләрне башкаларга да сәнгатьле, образлы итеп җиткерү мөмкинлеге туа.
“Теле барның иле бар” шигырь бәйгесендә укучылар яшь буенча өч төркемгә бүленеп көч сынашты: кече яшьтәгеләр (1–4 сыйныф укучылары); урта яшьтәгеләр (5–8 сыйныфлар); өлкән яшьтәгеләр (9–11 сыйныфлар). Алар жюрига Тукай әсәрен яки бүгенге заман шагыйрьләренең Тукайга ияреп, әдәп–әхлакка өйрәтүне үз эченә алган шигырен тәкъдим итәргә тиеш иде. Катнашучыларны бәяләгәндә укучының сәхнәдә үз–үзен тотышы, сөйләм теленең сафлыгы, шигъри хисләрен күңеле аша үткәреп тамашачыга җиткерә белүе дә исәпкә алынган. Бәйге Яңа Кенәр һәм Арча зонасындагы мәктәпләрдә уздырылып, арадан иң яхшы сөйләүче укучылар сайлап алынган һәм менә бүген алар — Арчада. Кечкенәләр төркеменнән Илмир Хәкимов (Яңа Кенәр лицее), Эльза Минашаева (7нче мәктәп), Надир Хәбибуллин (Хәсәншәех мәктәбе), Лилия Әхмәдуллина (Шушмабаш), Инсаф Солтанов (5нче гимназия), Раил Исмәгыйлев (Наласа), республика һәм район конкурслары җиңүчесе Диләрә Булатова (Арча сәнгать мәктәбе) туган телебезнең газизлеген, аның милли аһәңен җиткерүгә иреште. Урта сыйныф укучылары Зәлия Саттарова (Лесхоз мәктәбе), Денис Габидуллин (Сикертән), Динә Нәҗметдинова (1нче мәктәп), Фидаил Әхмәтҗанов (Яңа Кенәр лицее), Айгөл Рәхмәтуллина (Ашытбаш), Илүзә Гәрәева (Шушмабаш мәктәбе) яңгыраткан әсәрләр арасында Тукай шигырьләре яңа яклары белән ачылды сыман. Бөек шагыйрьнең туган халкын, туган телен, туган ягын олылаучы мәңге яшь шагыйрь булуы өлкән сыйныф укучылары Зөһрә Әхмәдуллина (Апаз мәктәбе), Фирүзә Рәхмәтуллина (Яңа Кенәр лицее), Алмаз Нуруллин (Ашытбаш), Камилә Насыйбуллина (Наласа), Ралинә Җәләева (Иске Чүриле), Илүзә Гатауллина (7нче мәктәп), республика һәм район конкурслары лауреаты Таһир Исмәгыйлев (1нче мәктәп), Ләйсән Хөсәенова (5нче гимназия) сөйләгән шигырьләрдә дә ачык чагылды.
Укучылар турында аерым гына сөйләп булмый, чөнки һәрберсе талантлы, сайлап алу турын узып финалга килеп җиткәннәр. Биредә чыгыш ясаган һәр укучыга район мәгариф идарәсе Дипломы һәм истәлекле бүләк тапшырылды.
Шигырьләрне сәнгатьле итеп сөйли белү үзе бер осталык булса, Аллаһы Тәгалә кайбе-рәүләрне шигырь иҗат итү сәләте белән дә бүләкли. Әлеге сәләтне үстерү өчен нинди җирлек кирәк, әллә шигырь язарга бөтен кешене дә өйрәтеп буламы, дигән сорауларга җавап табу өчен сәхнәгә “Ялкын” журналы мөхәррире, якташыбыз, Ишнарат авылында туып–үскән язучы, публицист Фәрваз Миңнуллинның кызы шагыйрә Йолдыз Миңнуллина чакырылды. Үзенең чыгышыннан соң Йолдыз берничә шигырен укыды һәм якташы Илүзә Гәрәевага китабын бүләк итте. Район башкарма комитеты җитәкчесе урынбасары Надия Мифтахетдинова киң җәмәгатьчелеккә районыбызның данын танытуда өлеш керткәне өчен Й.Миңнуллинага истәлекле бүләк тапшырды. Бәйрәм кичәсендә Йолдыз тәмамлаган Казанның 2нче гимназиясе директоры Камәрия Хәмидуллина да катнашты. Милләт өчен янып йөргән ханым мондый рухтагы бәйрәмнәрнең милли җанлы балалар тәрбияләүдә йогынтысы зур булуын әйтте.
Укучылар башкаруындагы җырлар кичәгә бәйрәм рухы өстәде. Кичә ахырында зал аягүрә басып “Туган тел”не җырлады.
Тукай теленең бөеклеге буыннан–буынга күчә, аның дәрәҗәсе еллар үткән саен арта бара, тирәнрәк аңлашыла сыман. Туган телебез белән бергә Тукаебыз да мәңгелек!
Розалия САФИНА