Генерал белән очрашу

Генерал белән очрашу
Татарстанның хәрби комиссары, генерал–майор Сергей Погодин, республиканың кеше хокуклары буенча вәкаләтле вәкиле Сәрия Сабурская районга хәрби хезмәткә алынасы егетләр белән очрашуга кайтты.
Ул балалар сәнгать мәктәбендә үтте. Очрашуда район башкарма комитеты җитәк-чесе, хәрби хезмәткә алынучылар комиссиясе рәисе Илшат Галимуллин, республика хәрби комиссариатының Арча һәм Әтнә районнары буенча бүлек җитәкчесе, подполковник Алмаз Борһанов катнашты.
Генерал–майор Сергей Погодин безнең районда 2010 елда булган иде. “Өченче ел инде менә шушы формада булачак солдатлар белән очрашу үткәрәбез”, — диде ул. Арча муниципаль районы җитәкчелегенең җылы мөнәсәбәттә булганнары һәм армиягә лаеклы, ышанычлы егетләр әзерләүләре өчен рәхмәтле булуын әйтте. “Егетләрне хәрби хезмәткә әзерләү буенча Арча иң яхшы районнарның берсе, — дип ассызыклап үтте Сергей Погодин. — Сезнең солдатлар армиядә әйбәт хезмәт итә”.
Гади солдат өчен генерал–майор биргән бәя олы бүләккә тиң. Алга таба да егетләребез ышанычлы Ватанны саклаучылар булырлар, дигән теләктә калыйк. Очрашудан булачак солдатлар күп мәгълүмат алды. Сергей Погодинның үзе белән кыскача таныштыруы кызыклы иде. “Армиядә 40 ел хезмәт иттем, — диде ул. — Илнең барлык почмакларында, чит илләрдә дә булырга туры килде. Ике хәрби академия тәмамладым. Хәрби хезмәтнең барлык баскычларын үттем”.
Хәрби хезмәттәге шәхси үрнәк ир-егет өчен көчле тәрбия. Лаеклы хәрби юл үткән генерал–майорның очрашуга кайтуы яшьләр өчен тәэсирле булды. Ул башта хәрби округлар, гаскәрләр һәм заманча техника турында сөйләде. Көнчыгыш (үзәге Хабаровск), Көнбатыш (Санкт-Петербург), Көньяк (Ростов–на–Дону), Үзәк (Екатеринбург) хәрби округлары барлыгы, безнең солдатларның нигездә Үзәк хәрби округта хезмәт итүләре әйтеп үтелде. Фильм аша егетләр хәрби коралларның яңа югары технологик үрнәкләре белән танышты. “Мондый техника булганда бернәрсә дә куркыныч түгел, — диде генерал–майор. — Әмма техника белән идарә итәргә булдыклы һәм белемле яшьләр кирәк”.
Республиканың кеше хокуклары буенча вәкаләтле вәкиле Сәрия Сабурская чыгышын, кемнең үзе теләгән җирдә хезмәт итәсе килә, дигән сораудан башлады. Ул һәркемнең үзе теләгән частьта армия хезмәте үтә алуын әйтте. Ел саен 10 декабрьдә Кеше хокуклары көне билгеләп үтелүе турында да искә төшерелде. “2012 елда язмача һәм телефон аша төрле мәсьәләләр буенча 2500 мөрәҗәгать керде, — дип сөйләде Сәрия Сабурская. — Шуның 119ы, ягъни 4,84 проценты хәрби тема буенча”. “Кайнар элемтә” телефонына шулай ук хәрби хезмәткә кагылган шалтыратулар булуы һәм алар арасындагы шикаятьләрне дә тикшерергә, ачыкларга туры килүе һәм кайберләренең раслануы, тиешле чаралар күрелүе хакында да мәгълүматлар әйтелде. Әлеге вәкилнең Арча районында җәмәгать ярдәмчесе Ринат Һидиятовка мөрәҗәгать итәргә мөмкин. Телефоны: 3-28-45.
Булачак солдатларның сәламәтлек мәсьәләсе дә күтәрелде. Армиягә алынганнан соң да хәрби хезмәттән солдатны сәламәтлеге буенча кире кайтарып җибәрү очраклары бар. Малайларны кечкенәдән физик һәм әхлакый яктан чыныктырып үстерергә кирәклегенә басым ясалды.
Сәрия Сабурскаяның армиягә яңа алынучы егетләрне хәрби частька кадәр озата баруын видеофильм аша каравы кызыклы булды. Аның Татарстан егетләре хезмәт иткән частьларда булып, хәлләрен, ничек хезмәт итүләрен сорашып, уңай җавап алу күренешләре дә дулкынландыргыч иде.
Армиядә хәзер ашханәләрдә солдатлар түгел, махсус пешекчеләр эшләве, видеокүзәтүләр оештырылуы, кер юу машиналары куелуы, бушлай кесә телефоннары бирелүе — болар бар да солдат бары тик хәрби хезмәт белән генә шөгыльләнсен, ышанычлы Ватанны саклаучы булып өлгерсен өчен эшләнә.
Очрашу күңелле котлау мизгелләре белән тәмамланды. Генерал–майор Сергей Погодин Татарстанда хәрби комиссариатлар оешуга 95 ел тулу уңаеннан район башкарма комитеты җитәкчесе Илшат Галимуллинны, республикада иң яхшы хәрби хезмәткә алынучылар комиссиясе рәисе буларак, Мактау билгесе белән бүләкләде.
Румия НАДРШИНА