Ел да балкы, “Балкыш”!

Ел да балкы, “Балкыш”!
Республика ветераннар советы өлкән яшьтәгеләрне иҗатка җәлеп итү, үзешчән сәләтләрен үстерү, җәмгыять тормышында активлыкларын тагын да арттыру максатыннан республика ветераннары арасында үзешчән башкаручыларның “Балкыш” фестивален үткәрә. Фестивальнең зона бәйгесе менә инде ике ел рәттән Арча Мәдәният йортында уза.
Быел да бирегә Арча, Әтнә, Биектау, Лаеш, Балык Бис-тәсе районнарыннан үзешчән ветераннар осталыкларын күрсәтергә җыелды.
Яңа Кенәр, “Колос”, Лесхоз мәдәният йортларында узган сайлап алу турларында һәр авыл җирлегеннән ветераннарыбыз катнашып, жюри тарафыннан сайлап алынды һәм 29 мартта иң яхшы номерлар район Мәдәният йортында тамашачыга һәм жюрига күрсәтелде.
Фестивальнең зона бәйгесен Арча муниципаль район башлыгы урынбасары Любовь Осина ачып, ветераннарга тырыш, актив булулары өчен рәхмәтләрен җиткерде, хәер–фатыйхасын бирде, уңышлар, сәламәтлек теләде. Арча ветераннар советы рәисе Альберт Җамалиев күрше районнарны сәламләп, һәр катнашучыга шулай ук изге теләкләрен әйтте.
Составы халык артистларыннан торган жюрига эшнең иң авыры калды: халык талантлары арасыннан май һәм октябрь айларында Казанда узачак гала–концертка иң яхшы башкаручыларны сайлап алырга кирәк.
Башка районнардан аермалы буларак, арчалылар мондый бәйгеләргә аеруча җаваплылык тоеп әзерләнә. Оештыручылар зона бәйгесенең икенче ел рәттән Арчада узуын да нәкъ менә арчалыларның булдыклылыгы, биредәге оештыручанлыкның югары дәрәҗәдә, ветераннарның әзерлеген башкаларга да үрнәк итеп күрсәтерлек булуына бәйле дип аңлаткач, күңелдә горурлык хисләре уянды.
Арчалыларның чыгышы Ташкичү авыл җирлегенең “Сөлге сукканда” фольклор күренеше белән башланып китте. Эчтәлеге спектакльгә тиң күренештә алар яшьлек-ләренә кайтып җырлады, биеде, үзләре иҗат иткән шигырьләргә дә урын булды. Җирлекнең ветераннар советы рәисе Розалия Насыйбуллинаның иҗади күңелле булуы ветераннарга да “йоккан”, алар һәр бәйрәм чарасында актив катнаша. Бәйгегә көч сынашырга килгән ветераннарыбыз җырлаучылар гына түгел, чын җырчылар икән! Әнә, Иске Төрнәледән Тәлгать Бәдгыев үзе гармунда уйнап, халкыбызның “Озату” җырын үзәкләрне өзә торган моң белән башкара. Мөрәледән 38 ел сыер савучы булып эшләгән Нәзирә Фәйзрахманованың моңында чишмә тавышы ишетелә сыман. 85нче яшен ваклаучы Фәния Халитова “Казан сөлгесе”н башкарганда залда күпләр “ах” итеп утыргандыр. Мөрәледән Халидә Газизова (“Әйткән идең”), Кыснадан Рәшит Шәвәлиевнең “Илкәем”, Шушмабаштан Нурия Һадиеваның “Ике аккош”, вокал дуэт (Фирая Батыршина, Әнисә Хәтмиева), “Яшь йөрәкләр” (җитәкчесе Нәсимә Гарифуллина), “Рус җыры” ансамбльләре башкаруындагы җырларга өлкәннәрнең үткән гомере, яшьлеге, күңел дәрьясындагы шатлык–куанычлары, сагыш–моңнары сыйган. Сугыш узган җирләрдән мең чакрымга якын патриотик юл үткән Луиза Садыйкова Ф.Кәримнең “Партизан хатыны” шигырен сөйләгәндә тәннәрне чемердәтеп, күз алдына дәһшәтле күренешләр килде. Залда күпләр күз яшьләренә ирек бирде ул сөйләгәндә. Фәрхәт Зыятовның “Кыңгыраулы яшел гармун” (Ф.Кәрим) шигыре күңелләргә шатлык хисләре таратты. Өлкән булсалар да, ветераннар яшьләргә биргесез әле. Әнә, ничек җитез хәрәкәтләр белән “Вальс”, “Тау марилары” биюләрен башкаралар! Район ветераннар советының “Кашыкчылар” ансамбле, Альберт Гайнетдиновның гөсләдә халык көйләренә тезмә башкаруы милли рухыбызны, үткәндә калган гореф–гадәтләребезне бүгенге көнгә алып кайтты.
Фестиваль кунагы — ТР ветераннар советы рәисе Хәбир Иштирәков бәйгедә актив катнашкан ансамбль, төркем җитәкчеләренә Дипломнар һәм бүләкләр тапшырды, фестивальдә катнашучыларга изге теләкләрен ирештерде.
“Өлкәннәр фестивальдә катнашырга газета–радиода яңгыраган игъланнар аша үзләре теләп килде. Райондагы барлык талантлы ветераннарны җыйсак, биш көн концерт куярлык үзешчән-нәребез бар. Быел катнашмаганнарын киләсе елларда күрү мөмкинлеге булачак”, — ди район ветераннар советының мәдәни эшләр буенча җаваплы Равил Габдрахманов.
Халык арасындагы талантларның яшеренеп ятуына юл куймас өчен бу бәйгенең оештырылуы изге ниятле чара. Киләчәктә катнашучыларның саны тагын да күбәер, ә узганнарында чирканчык алганнары инде сәхнәнең тәмен белеп, милли мәдәниятне баетуда зур өлеш кертерләр. Бәйге озын гомерле булып, бүген катнашучыларның иҗат шәҗә-рәләрен оныклары да дәвам итәргә язсын.
Розалия ЗИННӘТОВА