Изгелек мең бәладән коткара

Изгелек мең бәладән коткара
Эшләгән изгелегең үзеңә игелек булып кайтыр, диләр. Мәрхәмәтлек үзәге хезмәткәрләре күрсәткән изгелекне әйтеп кенә бетерерлек түгел. Алар өлкәннәрне дә игътибар үзәгендә тота, балаларның да күңелләрен күрә.
“Язгы изгелек атнасы” Бөтенроссия ирекле акциясе кысаларында үзәкнең мәрхәмәтле хезмәткәрләре төрледән–төрле чаралар оештыралар. Алар белән безне Мәрхәмәтлек үзәге җитәкчесе Руфия Баһаветдинова таныштырды.
— Бу көннәр кысаларында без ярдәмгә, кечкенә генә игътибарга лаек булган берәүне дә читтә калдырмыйбыз. Күп балалы, аз керемле, тулы булмаган, социаль яктан имин булмаган гаи-ләләрдә тәрбияләнүче балалар өчен “Планетабызны саклыйк” дигән фоторәсемнәр бәйгесе, Татарстан Республикасы Экология министрлыгы Төньяк территориаль идарәсенең экологик тәрбия буенча белгече Фирдәвес Латыш катнашында экология дәресе, 6–7 яшьлекләр өчен “Дус яшик” дигән рәсемнәр бәйгесе һәм башка чаралар үткәрелде.
Ярдәмгә Мәрхәмәтлек үзәге каршында эшләп килүче Җәмилә Яруллина җитәкчелегендәге волонтерлар да килгән. Арчада яшәүче ике инвалид баланы алар үз “кул асларына” алганнар, даими яннарына барып йөриләр. Ә күптән түгел “Өмет чыганагы” балаларны тернәкләндерү үзәгендә, өлкәннәр һәм инвалидлар өчен интернат–йортта концерт куйганнар.
— Аздан гына да күңел була бит, — ди Руфия Баһаветдинова. — Шуны күздә тотып, бәйгеләрдә катнашкан бер генә баланы да буш кул белән җибәрмәскә тырышабыз. Ә бүләк алу өчен акчаны үзебез дә “эшләп” табабыз. Изгелек атналыгы кысаларында барлык хезмәткәрләр кәгазь җыеп тапшырдык, җыелган аз гына булса да акчаны бүләкләр өчен файдаланабыз. Шул ук волонтерларыбыз “Чиста йорт” акциясе кысаларында өлкән яшьтәге Асия Газизова янына барып, өен җыештырдылар, кар тараттылар. Социаль хезмәткәрләребез үзләре ярдәм күрсәткән әби–бабалары күңелләрен күрәләр, өлкән-нәрнең теләгән ризыкларын пешереп сыйлыйлар.
Мәрхәмәтлек үзәгендә үз чәчтарашханәсе булу да уңай. Фәридә Газизова биредә җиде ел эшли. Осталыгы өчен генә түгел, һәрберсенә карата мөлаем, ягымлы булганы, сүзләрен тыңлап, киңәшләшеп эшләгәне өчен дә клиентлары аны ихтирам итә.
— Безгә кем тели, шул керә ала. Барысына хезмәт күрсәтәбез, — ди Фәридә Газизова. — Һәр көн 8дән 16 сәгатькә кадәр эшлим. Чәршәмбе көннәрендә йөри алмаган инвалидларның өйләренә барып хезмәт күрсәтәм. Мәрхәмәтлек үзәге белгечләре белән авылларга да чыгам. Түләү дә бездә күпкә арзан, 50 сумнан 90 сумга кадәр. Бөек Ватан сугышы инвалидларына һәм сугышта катнашучыларга бушлай хезмәт күрсәтелә.
Бер ел инде Мәрхәмәтлек үзәгендә сенсор бүлмәсе эшли. Психологлар Гөлнара Борһанова һәм Инна Нурмиева балалар өчен дә, өлкәннәр өчен дә музыка, ярым караңгылык, төрле утлар, исле шәмнәр, сүзләр һәм башкалар ярдәмендә тренинглар үткәрәләр. Бирегә теләге булган һәркем килә ала.
— Изгелек атнасында һәркем үз өлешен кертә ала. Кирәкмәгән кием–салымнарыгыз (әлбәттә, юылган булсын), китаплар, мебель һәм башка кирәкмәгән әйберләрегезне Мәрхәмәтлек үзәгенә 28 кабинетка китерә аласыз, — ди Руфия Баһаветдинова. — Алар сезгә кирәкми, ә кайберәүләр шуңа мохтаҗ. Изгелек мең бәладән коткара, диләр. Әйдәгез, мохтаҗларга бергәләп ярдәм итик.
Гөлсинә ЗӘКИЕВА