Безнекеләр җиңде!

Безнекеләр җиңде!
“Арча” спорт комплексында Татарстан укучыларының IX Спартакиадасы кысаларында 1996–1999 елларда туган егетләр һәм кызлар арасында кул көрәштерү (армспорт) буенча ярышлар булды.
Ярышларда республиканың 20 шәһәр һәм районнары командалары катнашты. Чистай, Балтач, Әгерҗе, Түбән Кама, Теләче, Мамадыш, Питрәч районнарыннан республика кубокларына ия булган көчле спортчылар килде.
Шәхси беренчелектә Өчиле мәктәбеннән Рамилә Әхмәтҗанова, Гөлгенә Мөхәммәтшина, Илшат Хәбибуллин (Казан җир һәм җир асты электр транспорты техникумы студенты), тренерлары — Фәнис Мөхәммәтшин, Наласадан Фаяз Зарипов (тренеры — Таһир Лотфуллин) беренче урынны яуладылар. Арча педагогика көллиятеннән Ильяс Сафиуллин (тренеры — Фәнис Мөхәммәтшин), Айзилә Галимуллина (тренеры — Ленар Заһидуллин), 7нче мәктәптән Константин Апайчев (тренеры — Булат Гәрәев) үз авырлык үлчәүләрендә икенче нәтиҗәне күрсәттеләр. Өченче урында — 7нче мәктәптән Рәнис Касыймов (тренеры — Булат Гәрәев), Иске Чүриле мәктәбеннән Сардор Артиков, Алия Исмәгыйлева (тренерлары — Гәүһәр Сәйфуллина), 2нче мәктәптән Илназ Йосыпов (тренеры — Фәрит Мөбарәков), Яңа Кырлай мәктәбеннән Гөлфинә Закирова (тренеры — Илфат Шакиров). Курса–Почмак мәктәбеннән Рәзилә Сабирҗанова, Гөлчәчәк Гыйззәтуллинада — дүртенче нәтиҗә.
Җиңүчеләргә һәм призчыларга республиканың Яшьләр эшләре, спорт һәм туризм министрлыгының грамоталары һәм медальләре тапшырылды, шулай ук “Олимп” спорт мәктәбеннән бүләкләр бар иде.
Арча районы командасы республиканың армспорт Спартакиадасында җиңү яулады! Чистай командасы — икенче, балтачлылар — өченче.
“Олимп” спорт мәктәбе тренерлары Фәнис Мөхәммәтшин белән Фәрит Мөбарәковка республиканың Яшьләр эшләре, спорт һәм туризм министрлыгы дипломнары бирелде. Спортчыларыбызны җиңүләре белән котлыйбыз, аларга уңышлар телибез!
Р.ГАРИФҖАНОВА