Ямьле җирдә яшәү күңелле

Ямьле җирдә яшәү күңелле
Экология икеайлыгында тирә–юнебезне яшелләндерү, урманнарны саклау мәсьәләләренә зур игътибар бирелә.
— Урман хуҗалыгы хезмәткәрләре өчен кызу чор башланды, — ди Арча урман хуҗалыгының бүлек җитәкчесе Әнәс Закиров. — Агач утырту белән бергә, янгын куркынычсызлыгын тәэмин итүгә зур игътибар бирелә.
Урман кырыйларында янгынга каршы полосаларны яңартканнар, урманга якын булган Үрнәк, Наратлык, Казанка авыллары тирәләре дә сөреп чыгылган. Янгын–химик станциясе булу иминлеккә ышанычны арттыра, ул кирәкле техника, җиһазлар белән тәэмин ителгән.
Сүзне янгын куркынычсызлыгыннан башлау юкка гына түгел. Чөнки күп хезмәт куеп утыртылган, үстерелгән байлыкны ут минутлар эчендә юкка чыгарырга мөмкин.
— Шушы көннәрдә генә балык хуҗалыгы каршындагы тау бите яна башлады, ике машина җибәреп тиз арада сүндердек, — ди Арча янгын часте гарнизоны җитәкчесе Мәсхүт Шәрәфиев. — Шулай да агачларга хәйран зыян килгән иде инде.
Бирәзә тау башы, үзәк стадион янында да шундый хәлләр булып алды. Коры үлән үзеннән–үзе яна башламый, сәбәп бер — кемнәрнеңдер кулы кычыта. Әмма моның ахыры бик күңелсез бетәргә мөмкин.
Татарстан Республикасы Министрлар Кабинеты боерыгы нигезендә 25 апрельдән 15 майга кадәр янгынга каршы режим билгеләнә. Әлеге чорда кагыйдәләрне бозган гражданнарга 2дән 4 мең сумга, вазифаи затларга — 15тән 30 мең сумга, юридик затларга 400дән 500 мең сумга кадәр штраф салыначак. Урман–бакчаларда учак ягучылар, коры үлән яндырырга “яратучылар” җәзасын алачак. Коры үләнгә капкан утның нинди хәтәр тудыруын онытырга ярамый.
Йорт тирәләрен корыган үләннән, коелган яфраклардан, чүп–чардан арындыру – үзебез яшәгән урынны ямьләндерү белән бергә, иминлегебезне дә тәэмин итү ул.
Бу көннәрдә урман хуҗалыгы хезмәткәрләре генә түгел, бик күпләр агач утырта.
— Коллективлар шушы атнада заданиеләрен үти, — ди Арча шәһәре башкарма комитеты җитәкчесе Илдус Әһлиев. — Тирә–ягыбызны чистарту, тәртипкә китерүдә, яшелләндерүдә социаль яклау идарәсе, Пенсия фонды, 5нче гимназия, 7, 2, 1, 4нче мәктәпләр, финанс бүлеге, казначылыклар, педагогика көллияте, мәдәният, мәгариф идарәләре, “Бердәм Россия” партиясенең җирле бүлекчәсе, “Арча” радиосы, агросәнәгать көллияте филиалы, үзәк китапханә, балалар бакчалары, сәнгать мәктәбе бик актив катнаша.
Үзәк урамда агач утыртуны мәдәният идарәсе башлап җибәрде. Аларга социаль яклау идарәсе, Пенсия фонды, 2нче мәктәп, 5нче гимназия, Укучылар сарае, Дәүләт иминияте, финанс–бюджет палатасы кушылды. 7, 4нче мәктәпләр станциядәге зират тирәсендә эшләделәр.
“Татавтодор”ның Арча филиалы юлларны, тукталышларны, юл тирәләрен ремонтлый, чистарта. “Жилкомбытсервис” ширкәте һәйкәлләрне, тротуарларны, мәйданнарны тәртипкә китерә.
Ильяс СӘХӘПОВ