Почтальоннар бәйгесе

Почтальоннар бәйгесе
2013 елның икенче яртыеллыгына газета–журналларга язылу бара. Алдан язылганнар отты, чөнки бәяләр үзгәрергә өлгермәгән иде. Шушы көнгә кадәр сузып килүчеләр өчен дә куркыныч нәрсә юк. Вакытлы матбугат белән даими танышып барырга күнеккән газета укучыларны бәянең артуы куркытмый, алар үзләре яратып укыган журнал яисә газетаны түземсезлек белән көн саен көтеп ала.
“Хәзер компьютерлаштыру заманы — кем гәҗит укысын”, — дип нокта куярга да ашыкмыйк. Ничек кенә укыйлар әле. Әллә ничәшәр төрдә газета–журнал алдыручылар бар. Өлкәннәр генә димәгез, яшьләр дә битараф түгел. Тик бер начар гадәтебез генә бар: кирәк икәнен дә, алдан аяк киенеп куюның уңай яклары барлыгын да беләбез, әмма вакытлы матбугатка язылуны соңгы көнгә кадәр сузабыз. Шуңа бөтен авырлык почта хезмәткәрләре җилкәсенә төшә дә инде. “Аеруча икенче яртыеллыкка җәйге–көзге эш чорына яздыру читенрәк”, — диләр алар, тик үз хезмәтләрен намус белән башкарырга күнеккәннәр, халык белән тыгыз элемтәдә торып эшләгәннәр монда да юлларын таба.
Почта хезмәткәрләре өчен бер яңалык та бар. Бу яртыеллыкка “Татмедиа” акционерлык җәмгыяте “Татарстан почтасы” федераль почта элемтәсе идарәсе белән берлектә поч-тамтлар һәм почта бүлекчәләре хезмәткәрләре арасында 2013 елның 1 апреленнән 30 июненә кадәр бәйге игълан итте, шуның буенча “Иң яхшы шәһәр почтальоны”, “Иң яхшы кече шәһәр почтальоны”, “Иң яхшы авыл почтальоны” номинацияләрендә җиңүчеләр билгели. Номинация исемнәреннән күренгәнчә, безнең почта хезмәткәрләре ике номинациядә катнаша ала. Бәйгенең шарты — “Татмедиа” акционерлык җәмгыяте газета–журналларына һәм район газетасына 2012 елның икенче яртыеллыгына караганда күбрәк яздыру. Ул торак пункттагы кеше саныннан чыгып исәпләнәчәк.
Тырышырга җирлек бар. Бүләкләр кечкенә түгел. Беренче урынны яулаган почта хезмәткәре кулына 30 мең сум премия тапшырылачак. Икенче урынга — 25, өченче урынга 20 мең сум премия биреләчәк.
“Арча хәбәрләре” район газетасына яздыруда шушы шартларны үтәүче почта хезмәткәрләренә безнең редакция аерым бүләкләр әзерли.
Арча почта бүлекчәсенең газета–журналларга яздыру буенча инженеры Рәсүлә Гафарова әйтүенчә, “Арча хәбәрләре” газетасына яздыру буенча бүгенге көнгә Сеҗе һәм Иске Кырлай почта бүлекчәләре алда бара. Сеҗедә хәзерге вакытка 83 кеше (узган ел шушы чорга 27 булган), Иске Кырлайда 56 кеше (узган ел 29 булган) район газетасына икенче яртыеллыкка да язылырга өлгергән инде.
— Безнең почта бүлекчәсендә 270 хуҗалык исәпләнә. Мөрәле, Сеҗе, Ташкич, Пүчинкә–Поник, Яңа Чүриле авыллары керә. План буенча без 750 газета–журналга яздырырга тиеш. Шуның кадәр булачак та. Икенче яртыеллыкка яздыру кыенрак, шулай да тырышачакбыз, — ди 1989 елдан бирле биредә эшләүче почта бүлекчәсе җитәкчесе Зөлхия Харисова. — Бүгенгә планны 61 процентка үтәдек. Марттан тотындык. Элеккеге бәя белән язылып калырга тәкъдим иттек. Шуның белән ике як та отты. “Арча хәбәрләре”нә беренче яртыеллыкка 112 кеше язылган иде, икенче яртыеллыкка бүгенгә 83 кеше булды.
Бүген без районда “Арча хәбәрләре”нә язылу ничек баруын күрсәткән таблица тәкъдим итәбез. Мондый мәгълүматлар июнь ахырына кадәр бирелеп барылачак. Әле вакыт бар, әмма шуңа алданып язылырга соңга калмагыз.
Гөлсинә ЗӘКИЕВА