Күләме түгел, сыйфаты бәяләнәчәк

Күләме түгел, сыйфаты бәяләнәчәк
Соңгы көннәрдәге яңгырлар язгы кыр эшләрен бераз тоткарлады. Әмма дымның артыгы юк. Алданрак чәчкән басуларда инде сабан культуралары тишелеп тә чыкты.
Ә өлгерләр исәбенә “Кырлай”, “Курса МТСы”, “Ватан”, “Игенче”, “Татарстан”, “Северный” хуҗалыкларын кертергә була. Алар бөртекле һәм бөртекле–кузаклы культуралар чәчүне төгәлләделәр.
Язгы кыр эшләрен башкаруда иң проблемалы хуҗалык — “Арча” ширкәте. Хәлне бераз җиңеләйтү өчен “Татарстан”, “Северный” ширкәтләреннән берәр агрегатны ярдәмгә җибәрергә мәҗбүр булдылар. Оешмаганлыкның сәбәпләре күп, билгеле. Эшләргә кеше булмавы зур кыенлык тудыра. Көздән туфрак эшкәртелми калды. Яңа җитәкчелеккә күп чабарга, эзләнергә туры килә.
“Татарстан” ширкәтендә дә аерым шартлар юк. Әмма анда проблемаларны уңай хәл итә беләләр. Эшләгән кешегә хөрмәт зур, тиешлесен вакытында түләп баралар. Механизаторлар сафы тотрыклы. Иң кыска срокларда 1920 гектарда күпьеллык үләннәрне, 2100 гектарда уҗым тукландырдылар. 1795 гектарда иртә культуралар чәчелде. Хәзер кукуруз чәчәләр, сабан культураларын тукландыра башладылар.
“Бердәм Россия” партиясенең җирле бүлекчәсе башкарма комитеты җитәк-чесе Тәлгать Җәләлетдинов хуҗалыкның алдынгы тракторчысы Рәис Солтановка политсовет секретаре Алмас Назировның Рәхмәт хатын, вымпел һәм акчалата премия тапшырды. Рәис “МТЗ–1221” тракторы белән 783 гектарда чәчү чәчте, шактый мәйданнарда тукландырды.
Габделфәрт Зыятдинов “Нью–Холланд” тракторы белән 450 гектарда җир эшкәртте, 970 гектарда чәчте. Рәшит Галиев “МТЗ–1221” тракторы белән 515 гектарда чәчү өчен җир әзерләде.
Район авыл хуҗалыгы һәм азык–төлек идарәсендәге мәгълүматларга караганда, 14 майга район хуҗалыкларында 60025 гектардагы сабан культураларының 34085 гектары чәчелде. “Кырлай” ширкәтендә 520 гектарда кукуруз, 1000 гектарда рапс чәчелде, 102 гектарда бәрәңге утыртылды.
“Кырлай” ширкәтендә — 2757, “Игенче”дә — 1570, “Северный”да 1400 гектарда чәчү комплекслары чәчте. ТР Авыл хуҗалыгы һәм азык–төлек министрлыгы “Игенче” ширкәте базасында энергия саклау технологиясен куллану буенча өйрәнү дә оештырды. Анда министр урынбасары Айдар Сәләхов та катнашты. Баш агроном Марат Вахитов яңа технологиянең өстенлекләре турында сөйләде.
Чәчү комплекслары эшне тиз һәм сыйфатлы итеп башкару мөмкинлеге бирә, ягулык аз тотыла, эшчеләр дә күп кирәкми.
Татарстан Республикасы авыл хуҗалыгы һәм азык–төлек министры урынбасары Илдус Габдрахманов, “Татарстан”, “Нива”, “Арча”, “Агромол Плюс”, “Сафия”, “Игенче” ширкәтләрендә булып, язгы кыр эшләренең барышы белән танышты, уҗым басуларын карап чыкты. Ул, гомумән алганда, эшләр барышыннан канәгать калды, киңәшләрен бирде.
14 майда Татарстан Республикасы Премьер–министры урынбасары, авыл хуҗалыгы һәм азык–төлек министры Марат Әхмәтов журналистлар белән очрашуда республикада язгы чәчүнең тоткарлыксыз башкарылып чыгачагын белдерде. Бюджеттан ярдәм узган елдагыча күрсәтелгән. Әлегә бар да әйбәт булырга ошаган, һава торышы да уңай. Хәзер чәчүлекләрне тәрбияләргә, чүп үләннәргә, корткычларга каршы көрәшергә кирәк.
Министр быел күпьеллык үләннәрнең беренче катын июньнең 15енә кадәр җыеп алу бурычын куйды. Моннан соң терлек азыгы тонналар белән түгел, ә сыйфаты, аксым, каротин күләме белән бәяләнәчәк. Бөтендөнья сәүдә оешмасы шартларында үзкыйммәтне киметеп, көндәшлеккә сәләтле продукция җитештереп кенә яшәп булачак. Иткә бәя кими, димәк, аны үзен акларлык итеп җитештерү юлларын эзләргә.
Арзанлы продукция дигәннән, “Мәрҗани” ширкәтендә сыерларны җәйге лагерьга күчергәч 2 тонна сөт артты. “Северный”, “Ватан”, “Татарстан” ширкәтләрендә дә сыерларны вакытында чыгардылар. Май үләне терлекләр өчен аеруча файдалы. Кышын малларын ачлы–туклы тоткан, ябыктырып бетергән хуҗалыклар әлегә Ходай биргән байлыктан да файдаланырга ашыкмый.
Ильяс ФӘТТАХОВ