19 май – Татарстанда матбугат көне

19 май – Татарстанда матбугат көне
Мәкаләне үзебезнең һөнәри бәйрәмебез уңаеннан газетабызга даими язучы хәбәрчеләребезгә рәхмәт әйтеп, сәламәтлек, уңышлар юллаудан башлыйм.
Редакциягә шәһәр, авылларыбыздан хәбәрләр килеп торуы ул матбугатка заман сулышы бирә, аны җанландырып җибәрә, эчтәлеген кызыклырак итә. Һәр атна саен газетабызда “Сезнең хатлар” дигән сәхифә урын ала. Хәбәрче, вакыт табып, зур тырышлыклар куеп язылган мәкаләсен редакциягә юллагач, аның газета битләрендә дөнья күрүен дә тели. Табигый хәл. Һәркемнең язмасы үзенә кадерле булуын бик яхшы аңлыйбыз, чөнки ул йөрәктә, күңел түрендә туган иҗат җимеше, шуңа күрә дә без аларны газетада урнаштырырга тырышабыз.
Бүген газета укучыларыбыздан 300 хат килде. Бу узган елның шул чоры белән чагыштырганда ике тапкырга күбрәк. Балалар бакчаларында эшләүче тәрбиячеләр активлашты, үзләрендә булып үткән чаралар турында башкаларга да сөйлиселәре килә. Хуплыйбыз. Без алардан бала тәрбияләү буенча файдалы киңәшләр дә көтәбез. Укытучылар да мәктәпләрдә үткән чаралар турында күбрәк язалар. Тормышның алгы сызыгында баручы укымышлы педагогларның уйландырырлык мәкаләләр язарга кулларыннан килә. Андый язмалар күбрәк булсын иде.
Арчада яшәүче ветеран укытучыбыз Венера Нуриева әйтәсе килгән сүзләрен уйлап йөри–йөри дә, көннәрдән бер көнне күләмле мәкаләсен редакция өстәленә китереп сала. Өлкән педагогның, чыннан да, газета аша башкаларга әйтәсе килгән сүзе, фикере була. Ул бер язмасында заманында мәктәптә укыткан өлкән педагогларның кадерен белергә чакырса, икенче мәкаләсендә педагог хезмәтенә тугры булган укытучылар алдында, алар хөрмәтенә һәйкәл төзегән район җитәкчелеге, осталар алдында баш ия.
Арчада яшәүче Роза Шәйхетдинова күбрәк шигырьләр яза. “Минем кичерешләрем шигырьләремдә”,— ди ул. Әле менә яңа гына 9 майда туган уй–фикерләре белән уртаклашты, йөрәккә үтәрлек итеп үзенең үткәннәре, балачагы турында сөйләде. “Әти сугышка киткәндә мин 6 айлык кына булып калганмын,— диде ул.— И–и, әти мине сугышка китәр алдыннан кулына ала да сөя, кулына ала да сөя икән. Кайта алмам инде, сугышны бик каты, дип әйтәләр, бәлки, кызым, синең бәхеткә әйләнеп тә кайтырмын, дип өзгәләнгән. Кайта алмады... Бер тапкыр да әти сүзен әйтә алмадым... Әтиле балаларга кызыгып яшәдем. Сугышның ачысы тулысы белән безгә дә кагылды. 9 май ул безнеке дә, әтисез калган ятимнәрнеке дә...” Бары тик безнең хәбәрчеләр генә әйтә алырлык тирән мәгънәле сүзләр.
Шура авылыннан Рә-шидә Рәхимова шулай ук тынгысыз кеше. Үзен борчыган мәсьәләләрне ул шигырь юлларына сала. Һәм аның шигырьләре бик мәгънәле, гыйбрәтле килеп чыга.
Кич белән урамга чыгып,
Колак салып тыңла әле.
Тып–тын хәзеравыл урамнары,
Кая китте тальян моңнары?
Хафалана ветеран. Яшьләрне ул тальян моңын бетермәскә өнди.
Арчада яшәүче Наҗия Саттарова безнең даими хәбәрчебез. Ул бер килүендә бер кочак шигырләрен алып килсә, икенче килүендә проза әсәрләрен тәкъдим итә. Күптән түгел Казаннан бер төркем иҗат кешеләренең кунакка кайтуын, үзләре белән зур кәстрүл, базардан тавык алып кайтып төшүләрен кызыклы итеп сөйләгән иде. Наҗия апа өендә, тавык шулпасы пешереп, бергәләшеп күңелле иҗат көне үткәрәләр. Наҗия апаның үзенә генә хас язу стиле бар. Язучыларга хас стиль бу. Без аның республика нәшриятында басылган яңадан-яңа китапларын күрербез әле.
Минһаҗ Кашапов та безнең даими кунагыбыз. Ул редакциягә буш кул белән килмәс. Һәрчак үзе белән шигырьләре, бәйрәм уңаеннан язган иҗаты булыр.
Арчадан Факия Шәрәфетдинова Г.Тукай язмышы белән бәйле авыл— Яңа Кырлайда туып-үсүе белән горурлана. Ел да Тукайга, туган авылына багышлап шигырь язмый калмый.
Бар минем үлемсез
Тукайлы Кырлаем.
Шуңадыр, шатланып,
Сөенеп туя алмыйм.
Яңа Кенәрдән Рифат Габидуллин, Марат Абдуллин авыл кешеләре, кызыклы хатирәләр турында язарга яраталар. Алар иҗаты кабатланмас, үзләренә генә хас, укыла торган. Шушы ук авылдан Рәмзия Вәлиуллина шалтырата бер көнне: “Арчабыз бик нык үзгәрде. Беркөнне улым компьютердан бик матур төнге шәһәрне күрсәтә. Нинди гүзәл шәһәр бу, дип сокланып карадым. Арчабыз булып чыкты ул! Шул уңай үзгәрешләр турында мәкалә язам әле”. Рәмзия апа, зинһар өчен языгыз, сез заманында матбугатка яза идегез, сездән хатлар көтәбез!
Шөкер, Орнашбаш якларыннан да хәзер хәбәрләр килеп тора. Ленар Вәлиев безнең актив хәбәрчебезгә әйләнде. Егет яза-яза тагын да остарыр, өметле каләм иясенә әйләнер, дигән уйда без.
Хөрмәтле хәбәрчеләр! Татарстанда матбугат көне ул сезнең дә бәйрәм. Бәйрәм белән сезне! Үзегез сәламәт, каләмегез шома, иҗатыгыз халык файдасына булсын!
Румия НАДРШИНА,
хатлар бүлеге мөхәррире