Аларда шартлар үзгәрәк

Аларда шартлар үзгәрәк
15 майда авыл җирлекләре башлыклары муниципаль район башлыгы урынбасары Любовь Осина җитәкчелегендә Утар Аты авыл җирлегендә булдылар. Биредә “Авыл көне”нең чираттагысы үтте.
Авыл җирлеге башлыгы Әхтәм Хәкимҗанов җирлекнең эшчәнлеге белән таныштырды. 2011 елның декабреннән әлеге җирлеккә Кушлавыч авыл җирлеге дә кушылды, эш фронты артты. Хәзер анда 6 авылдагы 422 хуҗалыкта 1338 кеше яши. Өч сугыш, 48 тыл ветераны бар. Алар игътибар үзәгендә, Җиңү көне уңаеннан төрле чаралар үткәргәннәр, күчтәнәчләр өләшкәннәр.
Узган ел 14 бала туган, 15 кеше үлгән, 9 яңа гаилә төзелгән, аерылышучылар юк.
Җирлектә 5 мәктәп, 3 медпункт, 2 мәдәният йорты, 4 клуб, 1 ял үзәге, 4 китапханә, 4 балалар бакчасы, 8 кибет, почта бүлекчәсе, 5 мәчет, музей эшли. Авыл җирлекләре башлыклары аларның күбесендә булып, эшләрен ошатып киттеләр.
Югары Атыны бизәп торучы бинада башлангыч мәктәп, балалар бакчасы, клуб урнашкан. Һәркайда сак караш, хуҗа барлыгы сизелә, бизәлеше әйбәт. Бу авыл кешеләре бик бердәм, хезмәттә дә, спортта да өлгер алар.
Утар Аты, Орнашбаш, Субаш–Аты авыллары хуҗалык таркалгач ятимрәк тоела иде. Бу вакытлы гына күренеш булган икән. Сынауларда чыныгып, булган проблемаларны үзләре хәл итә алар. Утар Аты мәдәният йортының эшчәнлеге аеруча игътибарга лаек. Аның директоры Гөлсем Мостафина 25 ел шушы хезмәтне башкара. Күп төрле чаралар үтә монда. Концерт, спектакльләргә халык бик яратып йөри, зал тулы була.
Мостафиннар турында тагын әйтәсе сүзләр бар әле. Гөлсемнең ире Фәнис бу җирлектә беренче фермер, гаилә фермасы оештыручы. Бар эштә башлап йөрүче, төрле чаралар үткәрү өчен акча да бирә, авылның мулласы да ул.
14 кеше, ташламалы кредитлар алып, шәхси хуҗалыгын ныгыткан. 6 кеше үз эшен ачкан. Субаш–Атыда Хәкимуллиннар гаилә фермасы оештыруга алынган. Өч һәм аннан күбрәк сыер асраучылар арта.
Югары Аты башлангыч мәктәбенең участогы һәр елны үрнәк булып тора. Быел да эшкәртәсен эшкәртеп, чәчәсен чәчеп куйган инде алар. Күңел җылысы биреп, зәвыклы итеп эшлиләр. Бу яктан Утар Аты мәктәбе коллективына күп тырышасы бар әле. Бер гектарлы бакча кыргый хәлгә килгән иде, быел зур тырышлык куеп картайган алмагачларны төпли башлаганнар.
Орнашбаш авылы имам–хатыйбы Мөнир хәзрәт белән очрашу, аның вәгазе күңелләргә сеңеп калды.
— Районда иң хөрмәтле муллаларның берсе ул, — диде Любовь Осина. — Барын да тәртипле тота, аның сүзен тыңлыйлар.
Кушлавычта Г.Тукай музее хезмәткәрләре, укучыларның шагыйрьгә багышланган чыгышы җылы тәэсир калдырды.
Соңыннан файдалы сөйләшү булды, район Советының җаваплы хезмәткәрләре чыгыш ясады. Любовь Осина җирлекләр алдында торган бурычларны искә төшерде.
— Бу җирлектә шартлар күбегезнекенә караганда үзгәрәк, катлаулырак, — диде ул. — Аңлашып, бергәләп эшләп, килеп туган мәсьәләләрне хәл итәләр. Һәркайда әнә шуңа омтылырга кирәк.
Ильяс СӘХӘПОВ