Үзен күргәндәй булдык

Үзен күргәндәй булдык
21 майда Арча һәм Әтнә районнары буенча хәрби комиссариат телекүпер аша очрашу үткәрде. Икенче тапкыр. Беренчесендә Саратовта хезмәт иткән якташларыбыз белән элемтәгә керсәләр, бу юлы Краснодар крае, Ейск шәһәрендә урнашкан 32161 номерлы хәрби частьта хезмәт итүче бердәнбер егетебез Рәсим Галимҗанов телекүпер аша әти–әнисе, туганнары белән очрашты.
— Арча районыннан 42 хәрби частьта 100дән артык кеше хезмәт итә, — диде хәрби комиссар Алмаз Борһанов. — Һәрберсенә хат җибәрдек. Солдатларга рухи яктан ярдәм күрсәтү, туганнары белән күрештерү максатыннан телекүпер үткәрергә тәкъдим ясадык. Берничәсе кабул итеп алды. Менә бүген бер очрашу үтте, димәк, киләчәктә дә телекүперләр аша күрешүләр булачак. Төрле сәбәпләр нәтиҗәсендә каршы килүчеләр дә табылды. Шулардан Тамбов шәһәрендәге 54607 хәрби часть командиры анда хезмәт итүче якташларыбыз Б.Хөрмәтов һәм М.Чубаев турында уңай характеристика җибәрде. Эчтәлегендә күренгәнчә, егетләр хәрби хезмәт белән кызыксыналар, дисциплина ягыннан да контроль таләп итмиләр, кыю һәм ышанычлы булуларын исбатлыйлар.
Ә бу көнне Рәсим белән телекүпер аша очрашуга, күрешүгә әтисе Рөстәм, әнисе Наилә, сеңелләре, туганнары килгән иде. Рәсим Югары Бирәзә егете. Арча педагогика көллиятенең музыка бүлекчәсен тәмамлаганнан соң узган ел көз армиягә киткән.
— Өч балабыз бар. Рәсимнән кала Надия белән Ания исемле кызларыбыз яныбызда. Хәзер бик рәхәт, улыбыз белән телефон аша сөйләшеп торабыз, — ди Наилә Галимҗанова. — Бүгенге очрашуны оештырган өчен хәрби комиссариат хезмәткәрләренә, шәхсән Алмаз Борһановка зур рәхмәт. Үзен күргән кебек булдым.
Бер ел вакыт тиз үтә, дисәң дә, әни өчен аның һәр көне бер елга тора шул. Наилә Галимҗанованың әнә күзләрен яшь пәрдәләре каплады. Агып төшкән күз яшьләрен дә ул яшермәде. Әмма бу сөенечтән. Ананың күзләренә кадәр шатлык утыннан ялтырый, ул “утны” бернинди күз яше дә сүндерә алмый.
— Улым, әйбәт хезмәт ит, командирларыңның сүзен тыңла, начар булма, безнең йөзгә кызыллык китермә. Алты ай калды, түз. Исән–сау әйләнеп кайт, — диде хатыны сүзен җөпләп Рөстәм Галимҗанов.
Телекүпер аша очрашуга шәхси состав белән эшләү буенча командир урынбасары подполковник Анатолий Коновалов та килгән иде. Ул Рәсим Галимҗановка уңай характеристика бирде, аның хезмәтеннән риза булуын белдерде. Үзешчән сәнгатьтә актив катнашуын әйтеп үтте, шундый ул тәрбияләгәннәре өчен әти–әнисенә рәхмәтен җиткерде.
— Мондый очрашуларны без якташларыбызның ничек хезмәт итүләрен белү, контрольдә тоту, әти–әниләренә аларның исән–сау хезмәт итүләрен күрсәтү өчен оештырабыз. Мәктәптә егетләр башлангыч хәрби хәзерлек үтә. 10 сыйныфтан соң биш көнлек кыр сборларында катнашалар. Хәрби хезмәттә дә безнең йөзгә тап төшермәсләр дип ышанам, — диде Алмаз Бор-һанов һәм Анатолий Коноваловка телекүпер аша очрашу тәкъдимен кабул итеп алган өчен рәхмәтен белдерде, ә Рәсим Галим-җановка теләкләрен җиткерде.
Гөлсинә ЗИННӘТОВА