Яңалыклар

АРЧА ШӘҺӘРЕНЕҢ көнбатыш өлешендәге мәчет төзелешенә Тинчурин урамыннан Н.Әһлиева, З.Сәгыйтов, Ф.Әсәтов, И.Сәгыйтов — 1000әр, Р.Салихов, Н.Габдрахманов, Р.Әхмәтҗанов, Р.Зарипов, Р.Насриев, И.Рәхмәтуллин, М.Маликов, А.Абзалов, Ф.Шакиров, Г.Фәйзрахманов — 500әр, А.Хәлимҗанов, А.Вафин, Ф.Закиров, М.Шәрипов, М.Саматова, Д.Һадиев, А.Галимов, И.Гайнуллин, Р.Сибгатуллина — 300әр, Н.Нуретдинов, Г.Йосыпова, А.Әхмәтҗанов — 200әр, М.Туктаров — 20, Күлтәси урамыннан Р.Ризванов, Болгар урамыннан Н.Фәйзрахманова — 1000әр, Утар Атыдан Разия Моратова 500 сум акча күчерделәр.

“АРЧА”, “ТАТАРСТАН” ШИРКӘТЛӘРЕ 30–40 гектарда күпьеллык үләннәр урдылар. “Арча” ширкәтендә 75 тонна печән әзерләнде.


УЗГАН ЯКШӘМБЕДӘ Масра, Мөрәле якларында көчле яңгырлар явып үтте. Бәрәңге буразналары күмелеп торды, вак боз да яуды, дигән хәбәрләр алдык. Хәтта яңгыр белән бакалар яуганын күрүчеләр бар.

Балалар һәм яшүсмерләр иҗатының “Виктория” IV халыкара бәйге–фестивалендә Арча сәнгать мәктәбе укучысы Камилә Хәбибуллина өченче дәрәҗә лауреат исеменә лаек булды.

Казанда академик һәм халык музыкасын яшь башкаручыларның “Art–форум” халыкара бәйгесе үтте. “Вокал” номинациясендә Арча музыка мәктәбеннән Мөнир Мәрдәнов (укытучысы Г.Минхәерова) — икенче, Энҗе Гарипова өченче дәрәҗә лауреат, Таһир Исмәгыйлев (икесе дә Тайфә Гидиятуллина сыйныфында) дипломант, “Фортепьяно” номинациясендә Эльвира Рәхмәтуллина укучысы Камилә Хәбибуллина дипломант булды.

Яшь музыкантларның “Кече шәһәрләр” XII республика бәйгесендә (Алабугада узды) Арча сәнгать мәктәбе укучылары уңышлы чыгыш ясады. “Вокал–соло” номинациясендә Энҗе Гарипова — икенче, Алинә Галимуллина өченче дәрәҗә лауреат исемен яулады, халык инструментларында уйнап, Салават Шакиров икенче дәрәҗә дипломант булды. Айзирә Хәкимовага да үз номинациясендә өченче дәрәҗә лауреат исеме бирелде. Азалия Гыйниятова белән Алия Ногмановага дипломнар тапшырылды.

“Арча” балалар–яшүсмерләр спорт мәктәбендә 1997–1998 елгы кызлар арасында баскетбол буенча ачык турнир булды. Анда 7 команда, үзебезнекеләрдән тыш Казаннан, Алексеевск, Кукмара, Буа, Питрәчтән яшь баскетболчылар да килгән иде. Беренче урынны “Арча” балалар–яшүсмерләр спорт мәктәбе кызлары яулады.