Борһанов урамында бәйрәм

Борһанов урамында бәйрәм
Балачак кеше гомеренең иң риясыз, иң самими, иң матур чагы. Аның һәр мизгеле күңелләрдә мәңге сүрелмәс якты эз калдыра. 1 июнь — Халыкара балаларны яклау көне буларак билгеләп үтелә. Бу көнне генә түгел, һәрвакыт балачак “күгендә” болытлар куермасын, зәңгәр күк, якты кояш иминлек символы булып торсын, балаларның шатлыклы көлү авазыннан өлкәннәрнең йөзендә сөенечле елмаю балкысын иде.
1 июнь бөтен планетада берсеннән–берсе күңелле чаралар белән билгеләп үтелә. Арчада исә Халыкара балаларны яклау көненә багышлап Борһанов урамында зур бәйрәм оештыру күркәм традициягә үк әверелеп бара. Быел да ул гөрләп узды, әлеге урамда яшәүчеләрне генә түгел, бөтен якын–тирә урамнар халкын үз ти-рәсенә җыйды. Өлкәннәр дә балалар белән бергә шатланды, көлде, чыгышларны алкышларга күмде.
— 1 июнь безнең өчен өчләтә бәйрәм. Беренчедән, балаларны яклау көне, икенчедән, җәйнең беренче көне, өченчедән, иң озын каникулларның башы. Һәм ул бик күп сюрпризлар белән тулы, — диде бәйрәмне алып баручы Алиса.
Сюрпризлар шушы минуттан ук башланды. Түгәрәк уртасына алып кергән серле сандыктан аларның ниндиләре генә чыкмады. Тик аларны алу өчен табышмакка дөрес җавап табарга кирәк иде.
— Бүген балачагыбыз бик бәхетле. Без сугыш хәсрәтләре күрмәдек. Әмма якты киләчәгебез өчен көрәшкән якташларыбызның башыннан нинди генә авырлыклар үтмәгән. Фронтка 25 мең арчалы киткән. Күпмесе яу кырында башын салган. Без алар алдында һәм бүген бәйрәмебезгә кунакка килгән сугыш һәм тыл ветераннары, сугыш чоры балалары каршында тыныч күгебез, матур көнебез, шатлыклы балачагыбыз өчен рәхмәт әйтеп баш иябез, — диде алып баручы Карина.
Бу сүзләр бәйрәмгә махсус чакырылган Хак Шәфигуллин, Асия Борһанова, Венера Ахмерова, Илдус Сәгъдиев, Ислам Зәкиев, Факия Зәкиевага һәм башка күпләргә юлланды. Исемен шушы урам йөрткән талантлы оештыручы, җитәкче, гомерен халыкка хезмәт итүгә багышлаган Тимерхан Борһанов та ул көнне күп тапкырлар олылап искә алынды. Бәйрәмнең үзенә дә Борһановлар гаиләсеннән сигез кеше килгән иде.
— Бүгенге бәйрәмебез Борһанов урамында үтә. Районның социаль–икътисади үсешенә зур өлеш керткән, туган төбәген яратып, аңа һәрчак ярдәм итеп яшәгән Тимерхан Борһановны искә төшерми мөмкин түгел. Хатыны Асия Борһанованың да ел да бәйрәмебездә катнашуы — арчалыларга карата булган ихтирамын һәм хөрмәтен күрсәтә. Улы Татарстанның яшьләр эшләре, спорт һәм туризм министры Рафис Бор-һанов та әтисенең изге эшен дәвам итә. Бүгенге бәйрәмне үткәрүдә дә аның ярдәме зур булды, — диде район Советы башкарма комитеты җитәкчесе урынбасары Надия Мифтахетдинова.
Татарстан Республикасының Яшьләр эшләре, спорт һәм туризм министрлыгы республикадагы дәүләт яшьләр сәясәте учрежде- ниеләре, балалар һәм яшьләр иҗтимагый оешмалары арасында социаль яктан әһәмиятле проектлар һәм программалар бәйгесе игълан иткән иде. “Бердәм Россия” партиясе җирле бүлекчәсенең яшь гвардиячеләре штабы “Балаларга шатлык бүләк ит” дигән проектын тәкъдим итеп, зур җиңү яулады һәм 100 мең сумлык грантка лаек булды. Бу акча Борһанов урамындагы бәйрәмне үткәрүгә, бүләкләр алуга тотылды. Арчалылар эшләгән проектның исеме дә балалар һәм яшьләрнең актив ялын оештыру, сәламәт яшәү рәвешен, гаилә традицияләрен пропагандалау иде. Эчтәлегеннән чыгып фикер йөрткәндә бу көнге бәйрәм җисеменә туры килде.
Ә нинди бәйрәм җырсыз–биюсез, уенсыз һәм, билгеле инде, бүләкләрсез үтсен. Балалар белән эш оештыруда зур нәтиҗәләргә ирешкән беренче, икенче, җиденче мәктәп, бишенче гимназия җитәкчеләренә синтезаторлар тапшырылды. “Үз шәмеңне кабыз” акциясе кысаларында үткәрелгән “Җиңү көне балалар күзлегеннән” дигән фотобәйгедә җиңүчеләр дә билгеләнеп үтелде. Иң яхшы һәм оригиналь СМС–хәбәрләр җибәрүчеләр дә традиция буенча бүләксез калмады. Уеннар да күңелле үтте. Күмәк бию берәүне дә битараф калдырмады. Гүзәл Закирова, Альмир Ибраһимов, Алина Галимуллина, Энҗе Гарипованың җырлаулары, “Гүзәлкәй”, “Тамчы” вокаль ансамбльләре, “Ар–и–Эль” бию коллективы, икенче мәктәп укучылары чыгышлары тамашачы алкышлары белән бәяләнде.
Район хакимияте, “Бердәм Россия” партиясенең Арча җирле бүлекчәсенең яшь гвардиячеләр штабы, мәгариф һәм мәдәният идарәләре оештырган Борһанов урамындагы бәйрәм балаларга да, өлкәннәргә дә онытылмаслык мизгелләр, шатлык бүләк итте.
Гөлсинә ЗӘКИЕВА