Көллиятнең икенче яшьлеге

Көллиятнең икенче яшьлеге
Муниципаль район башлыгы Алмас Назиров шәһәрдәге оешмалар, предприятиеләр эшчәнлеге, экология икеайлыгында башкарылган эшләре белән танышып йөргәндә элеватор, нефтебазага 3 июньдә кабат киләчәген әйткән иде. Чөнки алар адресына бу көнне тәнкыйть сүзләре шактый булды.
“Арча нефть продуктлары” акционерлык җәмгыяте территориясендә әлеге сөйләшүдән соң шактый үзгәрешләр булган, агартасы агартылган, чистартасы чистартылган. Карап торуга ук күңелле. Тагын да зуррак эшләргә тотынырга мөмкинлекләре чикле. Җитәкче Раиф Сибәгатуллин килеп туган кыенлыкларны аңлатты. Соңгы вакытта ягулык сорап килүчеләр юк диярлек. Капка төбендә бензовозлар чират торган вакытлар күз алдына килде.
— Заманында 15 ягулык салу станциясе салыну бик дөрес эш булган, шулар исәбенә яшибез, — ди директор.
“Арча элеваторы” акционерлык җәмгыятенең дә үз проблемалары бардыр. Тик аның җитәкчесе бу юлы да каядыр киткән булып чыкты. Димәк, бирегә әле тагын килергә туры киләчәк.
Район башлыгы шә-һәрнең көнбатыш өлешендә төзелгән мәчеттә дә булды. Биредә инде эчке эшләр дә төгәлләнеп килә.
Габдулла Тукай исемендәге Арча педагогика көллияте икенче яшьлеген кичерә. Соңгы вакытта бик тузган, төс-сезләнгән иде ул. Җиһазлануы ягыннан да мәктәпләрдән артта калган иде. Бүген биредә кызу эш кайный. “Арча МСО”сы ширкәте җитәкчесе Зиннур Гарифуллин район башлыгы Алмас Назировка башкарылган эшләрне күрсәтте. Өченче катны танырлык түгел, коридор, кабинетлар искитәрлек хәлгә килгән, җиһазланганчы, бизәлгәнче үк балкып тора. Башка катлар да шундыйга әвереләчәк. Эчтән дә, тыштан да бик матур булачак әлеге уку йорты. Ул 1 августка әзер булырга тиеш.
“АрскПласт” ширкәте осталары тәрәзә–ишекләрне алыштыра.
Район башлыгы көллиятнең территориясен төзекләндерү буенча да киңәшләрен әйтте. Күпмедер эш башкарылган, әмма укытучылар әзерли торган уку йортының бакчасы да гүзәл булырга тиеш.
Газетабызның 29 май санында басылган “Син яшәгән, эшләгән урыныңны матурлау, тәртипкә китерү буенча нәрсәләр эшләдең?” дигән мәкаләдә “Шанс” ширкәте адресына әйтелгән тәнкыйть сүзләре дөреслеккә туры килми, әлеге төгәлсезлек өчен гафу үтенәбез. “Шанс” ширкәтен оештыручы Ф.Гатауллин, директоры В.Фазлыев хәбәр иткәнчә, әлеге территория Р.Газизованыкы, аның бер өлешен “Апельсин” автосалоны арендалый, анда шулай ук шәхси эшмәкәр Р.Газизованың автосервисы һәм кунакханә комплексы урнашкан. “Шанс” ширкәте офис бинасын, гаражларны һәм кибет урнашкан бинаның бер өлешен арендалый, ә территориягә катнашы юк һәм җаваплылык тотмый.
Шундый төгәл мәгълү-матлар өчен хат авторларына рәхмәт, мәкалә башында куелган сорауга да җавап язып җибәргән булсалар тагын да әйбәтрәк буласы иде.
Арчаның капкасы булган әлеге территориядәге корыган каеннарны кистерү өчен район башлыгының килүе кирәк булу аның хуҗаларын һич тә бизәми. Андый урыннар тагын бар әле.
Ильяс ФӘТТАХОВ