Рәхмәт сиңа, игенче!

Рәхмәт сиңа, игенче!
Раил Рәхимов — Иске Иябаш егете. 7 елдан артык “Кырлай” агрофирмасы” ширкәтендә “тимер ат” иярли. Әтисе Данил белән кулалмаш эшли алар. Язгы кыр эшләрендә, көзге җир эшкәртүдә һәрвакыт норманы арттырып үтиләр, әтисе көндез эшләсә, төнге сменада — Раил. Быел яз 3935 гектарда чәчү чәчте.
Техниканы кечкенәдән яратып үсә Раил, хәтта тракторда үскән, дисәң дә ялгыш булмас. Малай бул да, өстәвенә әтиең тракторда эшләсен (андый бәхет яшьтәш малайларның күбесенә тәтеми дә бит!) һәм синең күңелеңдә техникага мәхәббәт уянмасын, имеш! Рульне тотарга буе җиткәнче үк әтисенең алдына утырып трактор йөртә иде инде Раил. Ә тимер атны ялгызы гына иярли башлавы бераз буйга тартылып киткәч, алтынчы сыйныфта укыган чакларында булгандыр. Һәрхәлдә, күңелендә шулай истә калган.
Тора–бара әтисенең уң кулына әйләнгән яш-үсмер Яңа Кырлай мәктәбен тәмамлаганда инде башка һөнәр турында уйламый да, әтисе кебек икмәк үстерүче булачак ул! Туры килеп торуын кара әле, Раил мәктәпне тәмамлаган елны әтисенә чит илдә эшләнгән “Нью–Холланд” тракторын бирәләр. Ә аны йөртүе үзе ни тора! Авырсынмый егет, ни кушсалар шуны эшли. Шулай булмыйча, озак еллар алдынгылыкны бирмәгән механизатор Данил улы бит ул! Ә алма агачыннан ерак төшми.
Раил Фәридә апа белән Данил абыйның өлкән балалары, ике сеңлесенең яклаучы терәге. Узган ел ноябрьдә Симетбаш кызы Миләүшә белән гаилә корып җибәргәннәр. Миләүшә дә җиргә гашыйк сөеклесенең авылда төпләнеп калуына каршы килми, үзе дә җирне ярата. Һөнәрнең дә авыл хуҗалыгы өлкәсенә бәйлесен сайлаган: агрофирма идарәсендә эшли.
Игенче, хезмәтең авыр, җаваплы, төгәллек, пөхтәлек таләп итә. Шунлыктан, синең тирә–якка карап хәл алырга, табигатьнең гүзәллегенә хозурланырга вакытың да калмыйдыр? Баксаң, дөрес уйламыйм, вакыты кала икән шул. Хыялый күңелне бикләп тотып булмый, аз сүзле, эшкә бирелгән Раил белән сөйләшкәндә шуны аңладым.
— Төнге сменада таңга таба йокы баса башласа да, кошлар җыры, таң аткан чактагы матурлыкка күз салсаң, шундук ачыла, — ди ул. — Мондый матурлыкны шәһәр кешеләре күрми бит, дип кызганып та куям.
Кем белән генә сөйләшсәң дә, Раилне белүчеләр аның бары уңай сыйфатларга гына ия булуын әйтә. Ә бу — үрнәк гаилә тәрбиясе. Рәхимовлар гаиләсе турында “Кырлай” агрофирмасы” ширкәте директоры Илшат Шакирҗанов та бары җылы сүзләр генә әйтә. “Раилнең әтисе гомере буе механизатор, әнисе терлекче булып эшләде. Эшчән гаиләдә балалар да тырыш булып үсте. Раил тәртипле, акыллы егет. Эшне һәрвакыт намус белән башкара. Аның киләчәктә дә алдынгылыкны бирмичә тырышып эшләвен, сәламәтлек, гаилә бәхете телим”, — диде директор.
Көнне–төнгә ялгап, ал–ял күрми, бар күңелеңне хезмәткә багышласаң, эш агачы җимешен дә мулдан бирә. Хезмәте Раилгә дә быел шатлыклы мизгелләр бүләк итте. Ул быел районның Сабан батыры булып танылды. Афәрин, Раил! Алдагы елларда да уңышларыңны күреп сөенергә, горурланып яшәргә язсын!
Розалия ЗИННӘТОВА