Халык зыян күрергә тиеш түгел

Халык зыян күрергә тиеш түгел
Татарстан Республикасы Премьер–министры урынбасары, авыл хуҗалыгы һәм азык–төлек министры Марат Әхмәтов 14 июньдә Арчада элеккеге “Вамин–Татарстан” акционерлык җәмгыятенең безнең райондагы ширкәтләренең киләчәктәге язмышларына багышланган киңәшмә үткәрде.
Билгеле булганча, “Вамин–Татарстан” акционерлык җәмгыяте банкрот дип игълан ителде, шактый вакытлар аның киләчәге билгесезлек алдында торды. Киңәшмәдә конкурс идарәчесе Сергей Кондратьев, күптән түгел төзелгән “Просто молоко” ширкәте җитәкчесе Марат Моратов чыгыш ясадылар. “Вамин” активлары соңгы вакытта шушы ширкәткә арендага бирелгән. Хәзерге вакытта “Просто молоко” ширкәте белән яңа оешкан “Арча” ширкәте арасында Арча районындагы элеккеге “Вамин” ширкәтләрен, алардан тыш Балтач сөт комбинатын, Казан реаль базасын шушы ширкәткә субарендага бирү турында килешү төзелгән. Сергей Кондратьев хезмәт хаклары, салымнар һәм башка бурычларны түләү буенча эш алып барылуын белдерде.
Арча муниципаль район башлыгы Алмас Назиров “Вамин” хуҗалыкларына язгы кыр эшләрен башкарып чыгуда күрсәтелгән ярдәм өчен республика җитәкчелегенә рәхмәт әйтте. Алар бервакыт бик кыен хәлдә калганнар иде. Шулай ук сөт комбинатының да эше җайга салынды, халыкка булган бурычы түләп бетерелде, көн саен 60 тоннадан артык сөт тапшырыла башлады.
Шул ук вакытта “Вамин” хуҗалыклары салым буенча бурычлы булып килделәр, хезмәт хакы, пай җирләре өчен түләүдә проблемалар бар, җитәкче кадрлар мәсьәләсендә киңәшеп эшләү җитми. Әлеге хуҗалыклар карамагындагы 62 мең гектар җирнең 45 мең гектары — пай җирләре. Нинди генә үзгәрешләр булса да, аннан халык зыян күрергә тиеш түгел.
Вагыйз Минһаҗев җавап сүзендә моңарчы 17 районда эшчәнлек алып баруларын әйтте, төрле моментлар һәм кыенлыклар булгандыр инде, диде. Яңа ширкәтнең җитештерүне киңәйтү, яңа технологияләр кертү, эш урыннары булдыру юнәлешендә эшләячәген белдерде. Салымнар, хезмәт хакы, пай җирләре өчен вакытында түләнәчәк, җитәкчеләр дә районда үткәрелгән чаралардан читтә калмаячак.
Марат Әхмәтов республика алдында җитди бурычлар торуын әйтеп үтте. Озак вакыт яңгырлар булмау җитди борчылу тудыра. Республиканың 22 районында гадәттән тыш хәл игълан ителергә мөмкин. Башка проблемалар да җитәрлек. “Вамин–Татарстан” акционерлык җәмгыяте белән килеп туган хәлдән чыгу юлларын эзләргә туры килде, Арча районына туры килгәне аның бик аз өлеше генә.
— Сентябрьгә кадәрге чорны сынау срогы дип кабул итәргә кирәк, — диде министр. — Район җитәкчелеге белән бергәләп эшләргә. Телисеңме–теләмисеңме — властьны хөрмәт итәргә туры киләчәк. Монда халык мәнфәгатьләре өстен булырга тиеш. Барын да чиста биттән башларга.
Марат Әхмәтов пай җирләренең гектарына кимендә 500 сум түләнергә тиеш, дигән таләпнең көчендә булуын искәртте.
Ильяс ФӘТТАХОВ