Куллана белгәннәргә – байлык

Куллана белгәннәргә – байлык
Терлек азыгы әзерләүгә багышланган семинар–киңәшмәдә район ветеринария лабораториясенең бүлек мөдире Лилия Халитова дару үләннәренең әһәмияте, аларны әзерләү һәм куллану тәртибе турында җентекләп аңлатты.
Махсус өстәлдә ул үләннәр үзләре дә куелган иде. Бар да безнең “танышлар”, кем әйтмешли, аяк астында гына үсә торганнар: ак әрем, кычыткан, үги ана яфрагы, тузганак һ.б. Күпләр чүп үләне дип исәпләгән әлеге үсемлекләр чын хәзинәгә тиң. Ветеринариядә дә киң кулланыла алар.
Хәзер менә шушы хәзинәдәге байлыкларны әзерләү чоры. Дөрес, апрельдән башлап октябрьгә кадәр әзерләнә торганнары да бар. Әмма иң кыйммәтлеләренең срогы нәкъ менә шушы чорга туры килә.
Узган атнада предприятие, учреждение, оешма җитәкчеләре белән үткә-релгән киңәшмәдә дә көн тәртибендәге мәсьәлә-ләрнең берсе — хуҗалыкларга яфрак азык, дару үләннәре әзерләүдә шефлык ярдәме күрсәтү иде. Аларның һәркайсына заданиеләр дә җиткерелде. “Моның кирәге бар микән, барыбер ашатмыйлар бит” дигән сүзләрне дә ишетергә туры килә. Дөрес, искәрмә буларак, андый хәлләр дә очрарга мөмкин. Әмма бик кадерен белеп кулланучылар ярдәм күрсәтүчеләргә рәхмәт укый.
“Ак Барс–агро” ширкәтендә яфрак азык, витаминлы үләннәр әзерләүдә авыл җирлекләре, мәктәпләр, бюджет хезмәткәрләре ярыша–ярыша эшли. Чиста, чит–ят ис булмаган складларда саклыйлар бу азыкны, кышын санап кына биреп тоталар.
“Северный” хуҗалыгында да шундый хәл.
— Узган елгысы аз гына калды, — ди Шекә фермасы мөдире Габделхәй Бариев. — Бик кирәкле азык, быел да шактый туплап куйдык инде.
Менә шундый файдалы эшкә өлеш кертә алу үзе үк канәгатьлек хисләре тудыра. Без дә җай табып “Игенче” ширкәтендә кычыткан көлтәләре әзерләп кайттык. “Бердәм Россия” партиясенең җирле бүлекчәсе “Акчишмә” ширкәтендә, район Советы, башкарма комитет хезмәткәрләре Кушлавычта эшләделәр.
Хуҗалыклар үзләре дә терлек азыгы әзерләү белән мәшгуль. 20 июньгә 11574 тонна печән әзерләнде. Ихтыяҗны канәгатьләндерү өчен тагын шуның кадәр туплыйсы бар. “Ватан” хуҗалыгы иң беренче булып җитәрлек печән әзерләп куйды, 20 июньдә шәхси хуҗалыкларга бирә башладылар. “Аю” ширкәте дә 70 тонна печән бирде.
Барысы 6440 тонна сенаж салынды. Шуның 1965 тоннасы бер көнгә туры килә. “Ак Барс–агро”да 19 июньдә 720 тонна сенаж салдылар. Бу төр азык биредә 2070 тонна салынды инде.
Ильяс ФӘТТАХОВ