Җанга якын җирдә очрашу

Җанга якын җирдә очрашу
13 июньдә Татарстанда Президент Рөстәм Миңнеханов инициативасы белән “Үзеңнең мәктәбеңә ярдәм ит!” акциясе старт алды. Акция кысаларында “Татмедиа” Республика матбугат һәм массакүләм коммуникацияләр агентлыгы җитәкчесе Ирек Миннәхмәтов Арчада булып китте.
Ирек Миннәхмәтовны район башлыгы урынбасары Любовь Осина, ТР мәгариф һәм фән министры урынбасары Светлана Гыйниятуллина, район мәгариф идарәсе җитәкчесе Рина Бәдриева озатып йөрде.
Шәһәребез аның өчен кадерле, якты хатирәләре белән күңелендә саклана, чөнки Ирек Җәүдәт улы Арчаның 1нче мәктәбендә белем алган.
Мәктәп территориясенә аяк баскач, “Татмедиа” җитәкчесе әлеге белем йорты бакчасындагы Укытучы һәм Советлар Союзы Герое Валентин Ежков һәйкәлләренә чәчәкләр куйды.
— Арча минем өчен бик якын. Биредә минем балачактан яшүсмерлеккә күчкән чорым узды, якын дусларым булды. Ул еллар әле дә күңелдә яши. Ә Арчаның 1нче мәктәбе мине кеше буларак формалашуда зур йогынты ясады. Бүген мәктәпне танымый тордым, тышыннан ук яңа сулыш балкый. Ләкин эченә кергәч, эчтәлеге шул ук: көчле кешеләр, белемле укытучылар укыта монда, шартлар уңайлы.
Актлар залында Ирек Миннәхмәтов укучылар белән очрашып, аларның җыр–биюгә осталыкларына шаһит булгач, мизгелгә генә булса да балачак елларына кайтып килми калмагандыр, мөгаен. “Мәктәпкә кергәнче шушы кадәр хис–кичерешләр алырмын дип уйламаган идем. Үзебезне яшәргә өйрәткән җирләрдә ешрак булырга кирәк икән”, — диде ул.
Җитәкче иң элек үзенең тәүге партасы артына утырып, күңеле белән үткәннәргә кайтып килде. Һәр почмагы, һәрбер баскычы кадерле булган уку йорты белән танышып, сыйныф бүлмәләрендә, музейда булгач, ул заманча үзгәрешләр күреп, хисләрен яшермәде. Сыйныф җитәкчесе Елена Герасимова белән очрашу Ирек Миннәхмәтовка аерата якты мизгелләр бүләк итте. Елена Герасимова да Ирек Җәүдәт улының сәләтле, тырыш укучы булганлыгын хәтерли. “Аларның сыйныфында 36 бала иде, шуларның 22се малайлар. Мәктәп елларында ук Ирек Җәүдәт улы актив, оештыру сәләтенә ия, ярдәмчел, энергиясе ташып торган укучы булды. 9нчыны бетереп Арча педагогика училищесында укыса да, сыйныфташлары белән бергә урта мәктәпнең чыгарылыш имтиханнарын тапшырып, урта белем турында аттестат та алды ул”, — ди.
Ирек Миннәхмәтов укыган мәктәбенә мультимедиа комплектлары, телевизор, фотоаппарат, видеокамера, маркерлы магнитлы такта һәм компьютер сыйныфы бүләк итте. Кунак ашы — кара–каршы, дигәндәй, әлбәттә, мәктәп тә үз укучысын бүләксез калдырмады. Директор Рамил Мөхәммәдияров: “Үзегезнең укыган мәктәбегезне онытмавыгыз өчен рәхмәт. Сезнең күрсәткән ярдәмегез белән укучыларыбызга яңа мөмкинлекләр ачыла”, — дип, Рәхмәт хаты тапшырды.
Мәктәптәге очрашудан соң Ирек Миннәхмәтов “Арча” телерадиокомпаниясендә һәм “Арча хәбәрләре” газетасы редакциясендә булып, эш урыннары һәм коллектив белән танышып йөрде. Редакторыбыз — “ТАТМЕДИА” ачык акционерлык җәмгыяте филиалы директоры Исрафил Насыйбуллин белән әңгәмә вакытында ул газетаның электрон версиясе белән дә кызыксынды. Сайтның дизайнын үзгәртү мөһим булуын искәртеп:
— Сайтыгыз оператив мәгълүматлар белән тулы булырга тиеш һәм алар авыл кешесенең тормышын яктыртсын. Ә матбугат буларак аналитик жанрда атнага бер басма булып чыгу турында уйларга кирәк, — дип тәкъдимнәрен җиткерде. Очрашу барышында “Арча” телерадиокомпаниясе белән газета редакциясен берләштерү турында да сүз булды.
Очрашу истәлеге итеп Исрафил Насыйбуллин Ирек Миннәхмәтовка Арча түбәтәе һәм шәһәребез тарихын чагылдырган китап бүләк итте.
Әнә шундый игътибарлы, уңышка ирешкән, ярдәм итәргә мөмкинлеге булган кайгыртучан кешеләр күбрәк булса, мәктәпләрнең матди хәле дә яхшырыр, укучыларга заман таләп иткән белемне бирер өчен мөһим шартлар да тудырылыр иде.
Розалия ЗИННӘТОВА