Бәйрәм бүләк итик

Бәйрәм бүләк итик
Шушы көннәрдә Носы авылы урамнарыннан үтәргә туры килде. Капка төпләренә дә игътибар итәсең бит инде, хуҗаларның төрлесе бар, кемдер агач утырткан, кайберәүләр әле бу турыда уйларга өлгермәгән. Ә менә бер йорт турысыннан узганда болытлар арасыннан кояш балкып чыккандай булды.
Йорт үзе дә бик матур, морҗа башында ләк–ләк утыра, баганага песи үрмәли, капка төбендә пальмалар “үсә”, чын әкият дөньясы.
— Ленар Әсхәдуллин эше бу, — диде Шушмабаш авыл җирлеге башлыгы урынбасары Вәзир Сәгыйтов. — Ленар ясый, хатыны Рәзилә буяп тора.
Бала–чагага да, үткән– барганга да күңелле бит!
Ирек Мохтаров хәрби кеше, Псковта авиатехник, капитан. Ел саен Арчага әти–әнисе янына кунакка кайта. Реваль абый белән Дамира апа Вагыйзовлар урамында ике катлы йортта яшиләр. Алар яшәгән йортны танымый тордым. Ныклап төзекләндергәннән соң бөтенләй икенче төс алган. Өй каршында Буратино, крокодил Гена, Чебурашка, ташбака, хәтта робот та бар.
— Ирек иренмәде, бер кайтуында менә шуларны ясады, — ди Реваль абый. — Тик менә кемдер роботның ачкычын алып киткән.
Мондый мисалларны тагын китерергә була. Кешеләргә шатлык бүләк итүчеләргә рәхмәттән башка сүз юк. Урамнарда да чәчәкләр үстерергә өйрәндек, баштарак үстерергә ирек бирмәсләр, өзеп бетерерләр кебек иде.
Быел экология икеайлыгында 7477 агач, 210 куак утыртылган. Ел саен күп утыртыла алар, бар да үсеп китсә урман эчендә калыр идек. Әмма утырту белән эш бетми шул, беренче елны алар суга аеруча мохтаҗ. Соңгы еллардагы кебек корылыкта бигрәк тә.
Ике айда полигоннарга һәм законлы чүплекләргә 9040 тонна көнкүреш калдыклары чыгарылган. Торак пунктларда 428 контейнер бар, быел яңадан 18не куйганнар.
Районның административ комиссиясе җитештерү калдыкларын урнаштыру кагыйдәләрен бозулар буенча 111 эш караган, 75 кеше җаваплылыкка тартылган. Тәртип бозуларның күбесе урамга һәм елгаларга чүп ташлауга туры килә.
Ильяс СӘХӘПОВ