Алар — юлларда иминлек өчен

Алар — юлларда иминлек өчен
Ел да 3 июльдә ЮХИДИ хезмәткәрләре һөнәри бәйрәмнәрен билгеләп үтә. Бу көн башкарылган эшләр, ирешкән уңышларны барлау һәм, монысын һич онытырга ярамый, хезмәт алдынгыларын мактап китү өчен иң уңай вакыт.
Беребезгә дә сер түгел, ЮХИДИ хезмәткәрләрен өнәп бетермәүчеләр дә бар. Бу юл хәрәкәте кагыйдәләрен тупас бозып, алар “капкынына” эләккәннәр генә. Чөнки ЮХИДИ хезмәткәрләреннән башка юлларда тәртип булмаячагын һәркем бик яхшы аңлый. Өлкән яшьтәгеләр хәтерлидер, автомобиль инспекциясе оешкан 1947–1948 елларда, соңрак та әле, машиналар да сирәк йөргән, инспекторлар да бер–ике генә булган. Ә хәзер? Кайчак эшкә барган, кайт-кан вакытларда шәһәр эчендә машина агымы нәтиҗәсендә юлны аркылып чыга алмый торасың. Менә шушы кешеләрнең юлларда хәвеф–хәтәрсез, имин, сәламәт йөрүләрен тәэмин итү өчен көчләрен кызганмыйча эш-ләүче, көн дими, төн дими, тәүлекнең теләсә кайсы вакытында юлларда хәвеф–хәтәргә юлыгучыларга ярдәмгә ашыгырга әзер торган ЮХИДИ хезмәткәрләре машина йөртүчеләрнең дә, җәяүлеләрнең дә ышанычлы терәге.
— Коллективыбыз зур түгел. Әмма хезмәткәрләребезнең күбесе тәҗрибәле, стажлы, эшләрен төгәл һәм яхшы беләләр. Күргәнегезчә, яңгырмы, кар–буранмы, эссе, салкын көнме — алар һәрвакыт эштә, юлларда тәртип сагында, — ди ЮХИДИ бүлекчәсе җитәкчесе, полиция подполковнигы Габделхак Касыймов.
Габделхак Касыймов үзе 1989 елдан бирле әлеге оешмада эшли. 1993 елдан ЮХИДИ бүлекчәсен җитәкли. Хезмәте бик җаваплы, җитди, тынгысыз. Чөнки юлдагы һәлакәт өчен, беренче чиратта, аңа җавап бирергә туры килә. Әмма ул үзе җитәкләгән коллективына, һәр хезмәткәргә ышана һәм таяна ала. Һәр мәсьәләне уртага салып сөйләшеп, киңәшләшеп эшләргә күнеккән бу коллектив.
— Транспорт саны көннән–көн арта, хәрәкәт көчәя. Димәк, бу безнең тарафтан җаваплылыкны да арттыра. Бәйрәм көннәрендә башкалар ял иткәндә безнең хезмәткәрләрдән аеруча игътибарлы булу сорала. Чөнки юлда бер–бер хәл булса беренче булып алар ярдәмгә ашыга, — ди Габделхак Касыймов.
Ә руль артында утыручылардан, шулай ук җәяүлеләрдән бер нәрсә таләп ителә — ул да булса юл хәрәкәте кагыйдәләрен саклау, бер–берсенә ихтирамлы булу, кагыйдәләрне үтәүнең бары тик үзе өчен кирәклеген аңлап юлга чыгу.
— Шул очракта гына юлда тәртип булачак, безнең хезмәткәрләргә дә җиңелрәккә киләчәк, — ди ЮХИДИ бүлек-чәсе җитәкчесе. — Ә коллективка килгәндә, һәр кешебез бары тик мактау сүзләренә генә лаек. Юл–патруль хезмәте өлкән инспекторлары Рәдис Гарифуллин, инспекторлар Инсаф Павлов, Алмаз Зарипов үз хезмәтләрен зур җаваплылык белән башкаралар. Теркәү–имтихан алу бүлекчәсе җитәкчесе Илдар Нотфуллин, өлкән инспектор Рифат Шәмсетдинов, инспектор Нияз Бариев, теркәүдә инспекторлар Рамил Сафиев, Фәнис Һадиев төгәллекләре, тырышлыклары белән аерылалар. Юл хәрәкәте куркынычсызлыгын пропагандалаудан тыш административ практика белән дә шөгыльләнүче Альберт Сабиров һәркайсына өлгерә. Бүлекчәдә ЮХИДИ хезмәткәрләреннән тыш операторлар, контролерлар да бар. Алар хезмәте дә бик җаваплы. Барлык хезмәткәрләрне, безне онытып бетермичә килеп йөреп, киңәш-ләрен бирүче, уңышларыбызга куанучы ветераннарыбызны, барысының да гаиләләрен бәйрәм белән котлыйм, сәла-мәтлек, эшләрендә уңышлар, шатлыклы көннәр телим.
Без дә аның теләкләренә кушылабыз, ЮХИДИ хезмәткәрләрен һөнәри бәйрәмнәре белән котлап, юлларда транспорт һәлакәтләренең булмавын, һәр көн эшкә сөенеп килеп, өйләренә дә шатланып кайтуларын телибез. Моның өчен руль артындагыларга да юл хәрәкәте кагыйдәләрен сакларга, үз тормышлары, сәламәтлекләре турында кайгыртырга кирәк. Һәр кешегә юлда исән–имин йөрергә, сау–сәламәт булып яшәргә язсын.
Гөлсинә ЗӘКИЕВА