Нократ Аланында Сабантуй

Нократ Аланында Сабантуй
30 июньдә Киров өлкәсе Нократ Аланында милли бәйрәмебез Сабантуй гөрләп узды.
Районыбыздан Арча муниципаль район башлыгы урынбасары Любовь Осина җитәкчелегендә үзешчән сәнгать осталарыннан, спортчыларыбыздан торган делегация барды. Сабантуй иртәсе матур булды, халык та рәхәтләнеп ял итте.
Сабантуйны тантаналы ачу 13 сәгатькә билгеләнгән иде. Алып баручылар килгән кунакларга сүз бирде.
Бәйрәмгә жыелган халыкка ТР Президенты котлавын һәм районыбыз сәламнәрен Арча муниципаль район башлыгы урынбасары Любовь Осина ирештерде. Аннары барча килгән кунакларга районыбыз осталары чиккән түбәтәйләр бүләк иттеләр һәм татар халкының милли ризыгы — Арча чәк–чәге белән сыйладылар.
Тантаналы өлештән соң мәйданга якташыбыз, җырчы Рөстәм Закиров чыгып, үзенең моңлы җырларын башкарды. Бәйрәм районыбыз үзешчәннәре әзерләгән концерт программасы белән дәвам итте.
Барлык чыгыш ясаучылар бу бәйрәмнең милләтләр дуслыгы бәйрәме, татар халкының эшчән, тырыш булуын билгеләп уздылар.
Сабантуй жыр-моңга, уеннарга үрелеп гөрләде. Бала–чага күңел ачуы, олы буын вәкилләре аралашуы, туганнар, дуслар очрашуы бәйрәм рухын чагылдырды.
Һичшиксез, әлеге бәй-рәмнән һәркем канәгать булып, күтәренке кәеф белән, киләсе елда тагын очрашырга насыйп булсын, дигән теләкләр белән саубуллашты.
Эльмира ВАФИНА