Арча Универсиада утын каршылады

Бөтен дөнья халкын үзенә җыячак Универсиада уеннары башланырга санаулы көннәр калып бара. Июльнең 6сыннан 17сенә кадәр 12 көн барачак уеннарга мәркәзебез 26 июньдә үк катнашучыларны кабул итә башлады, бүгенге көндә 35 илдән катнашучы командалар килгән инде.
Дөньякүләм вакыйга көннәре якынайган саен аңа багышланган чаралар да ешайды. Ә иң мөһиме – Универсиада уты Татарстанга килеп җитте. Аны чит илләрдән 25 гыйнвар көнне Владивосток шәһәре кабул итеп алган иде, Россиянең эре шәһәрләрен һәм республикабызның көнчыгыш районнарын иңләгәннән соң ул ниһаять, безнең район җирлегенә дә керде. Узган атнаның җомгасында арчалылар Универсиада утын каршылау тантанасының шаһиты булды.
27нче тапкыр узучы уеннарда яулаган уңышлары бәрабәренә лаеклы рәвештә Универсиада утын тотып йөгерүчеләрнең саны быел 2013 булачак. Шуларның 30ы – безнекеләр, арчалылар! Яшь буынның булдыклылыгы бер куандырса, араларында инде лаеклы ял яшендә булып та, тормышлары, эш–гамәлләре белән яшьләргә үрнәк, терәк булган шәхесләрне күрү үзе күңелле күренеш.
Арчаның 5нче гимназиясе территориясендә тантаналы рәвештә башланып киткән чарада утны ничәмә–ничә чакрымнар сүндермичә саклап йөртүче студентлардан район башлыгы Алмас Назиров кабул итеп алды. Ә эстафетаны район башкарма комитеты җитәкчесе, спорт ветераны, республиканың алкалы хоккей буенча чемпионы Илшат Галимуллин башлады. Аннан, шулай ук спорт ветераны, ТР физик культура, спорт, РФ мәгариф отличнигы, өч хәрби көрәш буенча СССР спорт мастеры Барый Бакиров кабул итте. Факелны кабул итеп алучылар арасында “ТР физик культура отличнигы” күкрәк билгесе иясе Илдар Шакиров, РФ Президентының Рәхмәт хаты иясе Наталья Сафиуллина, “ТР мәгарифендәге уңышлары өчен” күкрәк билгесе иясе Рина Бәдриева, “Безнең иң яхшы директор—2011” гранты җиңүчесе Зөлфәт Дәүләтбаев, дартс буенча ике тапкыр ТР чемпионы Ринат Гәрәев, гер спорты буенча СССР спорт остасы Ринат Алиев, спорт ветераннары Шәйдулла Сәлахов, Равил Хәйруллин, Зиннур Сәгыйтов, РФ спорт осталары Рәфкать Җәләев, Фаил Һадиев, Фәрит Мөбарәков, чаңгы буенча СССР спорт остасы Гыйниятулла Гатауллин, спорт төрләре буенча ТР чемпионнары Айсылу Сабирова, Ирек Әскәров, Гөлшат Әхмәдуллина, Ильяс Сафиуллин, Рамилә Әхмәтҗанова, РФ гомуми белемнең мактаулы хезмәткәре Фатыйх Хәкимуллин, Арча муниципаль районының мактаулы гражданины Илдус Сәгъдиев, укуда, спортта алдынгы, талантлы яшьләр бар иде. Арча урамнары буйлап шатлыклы бәйрәм рухы өләшеп йөрүче факел ияләрен районыбыз халкы юл читләрендә сәламләп озатып барды. Утны кабул итеп алучыларның куанычтан балкыган йөзләрен күрү — искиткеч гүзәл күренеш! Шулай булмыйча, аларның да илебез данын күтәрүдә лаеклы өлеше кергән бит! Арчаның үзәк стадионына кадәр төшеп җиткән утны мактаулы факел тотып йөгерүче Алмас Назиров Универсиада касәсенә кабызып тамашачыга тагын да якты хисләр бүләк итте. “Без дөньякүләм масштабтагы тарихи вакыйганың шаһитлары. Универсиада уты ул — тынычлык, теләктәшлек, мәңгелек яшьлек, хәрәкәт һәм сәламәтлек символы. Бүген мин һәр кешене бәйрәм белән котлыйм һәм илебездәге әлеге олы вакыйгага катнашы булган һәркемне сәламлим”, — диде ул район халкын бәйрәм белән котлап. Бәйрәм кунакларын шулай ук ТР яшьләр эшләре, туризм һәм спорт министры урынбасары Хәлил Шәйхетдинов та котлады һәм Универсиада факелын (сүндерелгән) студентлар гимны астында район башлыгына истәлеккә бүләк итте.
Әйе, чыннан да, ул көнне Арчада зур бәйрәм булды. Чөнки Универсиада уты алып килгән шатлык стадионда инде ел да үткәрелүче Яшьләр һәм Шәһәр көненә тоташып дәвам итте.
Бәйрәм булгач, әлбәттә, җыр-бию, уен-көлке, ярышларсыз булмый. Яшьләр булган җирдә бу аеруча сизелә. Республиканың яшь талант ияләре башкарган җырларны тыңлап, спорт һәм халык уеннарында көчләрен сынашып, милли көрәш карап халык рәхәтләнеп бәйрәм итте. Соңыннан Арча күген бәйрәм салютының энҗе утлары яктыртты.
Арча гәрләде, шатланды, канатланды. Бәйрәм чарасы салют белән тәмамланды. Ә аның рухы күңелләрне Казанга, Универсиада уеннарына әйди.