Хыяллар чынга аша торган кич

Хыяллар чынга аша торган кич
Җәйге Универсиада уеннары тәмам. Россия җыелма командасы 155 алтын, 75 көмеш һәм 62 бронза медаль яулады.
XXVII Бөтендөнья Җәйге Универсиада уеннарының ябылу тантанасын спорт сөюче тамашачылар үзгә бер дулкынлану белән көтте.
Хыяллар чынга аша торган кич. Чыннан да, тамашачыларның хыяллары, махсус таратылган открыткаларга язылып, зур шарда Казан күгенә очты. КЕШЕ. Әгәр җир йөзендә син булмасаң, табигать–ана сине күп төрле гамәлләр кылырга сәләтле итеп яралтмаган, хыялларыңны тормышка ашырырга мөмкинлекләр бирмәгән булса, җирдә мондый гүзәллекләр туа да алмас иде. Үзеңнең бу дөньяга килүеңә, аның кешеләр белән матур булуына, шундый тамашада катнаша алуыңа горурланмый мөмкин түгел.
Моннан 5 ел элек, Казан Җәйге Универсиада уеннары үткәрү мөмкинлеген откач, республикада кызу эш башланды. Шул ара эчендә мәркәзебезнең бүгенге гүзәл күренеше өчен бик күп тырышлыклар куелды, яңа биналар сафка басты, төзекләндерелде. Әлеге эшләргә бик күп төзүчеләр-нең кул һәм йөрәк җылы- сы салынды. Шулар арасында безнең арчалылар да бар. Эшләгәндә авыр булса да, үзләренең көче кергән “Казан–Арена” стадионында Уеннарның ябылу тантанасында катнашу аларга аеруча күңелле иде.
27 спорт төрендә җиңү яулаган спортчыларның стадион буйлап үтүе, Россия халкының милли костюмнары, Россия күләмендә танылган җырчыларның, төркемнәрнең чыгышы, алар арасында Динә Гарипова, Эльмира Кәлимуллинаның да булуы, һәр чыгышның үзенчәлекле биюләр, акробатик күнегүләр белән үрелеп баруы — һәммәсе бәйрәм тамашасына үз төсмерен бирде.
Универсиада көннәрендә волонтерларның өлеше әйтеп бетергесез иде: алар тәрҗемәче дә, юл күрсәтүче дә, озатып йөрүче дә һ.б. булды. Россиянең һәр төбәгеннән, дөньяның төрле илләреннән җыелган волонтерлар ябылу тантанасында берничә сәгать буе тамашачы белән бергә шатланып, биеп, куаныч та, моңлану да тулы (чөнки аерылышыр көннәре җитте) кичерешләрен уртаклаштылар. Казан яшь йөрәкләргә үзләрен күрсәтү өчен мөмкинлек ачты, 162 илнең яшьләрен дуслаштырды. Биредә тәҗрибә туплаган волонтерларны әле алда тагын Универсиадалар, Олимпия уеннары көтә.
Тантанада чыгыш ясаган һәркем Уеннарның яхшы дәрәҗәдә булуын ассызыклады. Универсиада ябылу тантанасына килгән Россия Федерациясе Хөкүмәте Рәисе Дмитрий Медведев, ФИСУ Президенты Клад Луи Гальен, Казан шәһәре мэры Илсур Метшин өлеше кергән һәркемгә, Татарстан җи-тәкчелегенә олы рәхмәт сүзләре җиткерде. Ә Казаннан Универсиада әләмен Корея Республикасының Кванджу шәһәре кабул итеп алды.
Татарстанлыларга, Казан шәһәрендә яшәүчеләргә менә шундый тарихи вакыйганы күрү бәхете тиде. Универсиада — 2013 – күңелләрдә озак сакланырлык вакыйга — хыял–өметләрнең чынга ашуы, сәламәт тормыш, камил акыл эшчәнлеге һәм иң мөһиме — бәхетле мизгелләр тулы яшәеш ул. Шушы көннәрдә татар рухы, милли бәйрәмнән алган хис–кичерешләр, сумкаларга тулган чәк–чәкләр, Татарстанның гүзәллеген, тарихын чагылдырган сувенирлар, милләтебезнең җылы рухын сеңдереп, дөньяның 162 иленә юл алды. Килә-чәктә дә бер–беребез белән дустанә мөнәсә-бәттә, тыныч, тату булып яшәргә язсын!
Розалия ЗИННӘТОВА