Балаларыгызга битараф булмагыз

Балаларыгызга битараф булмагыз
ЮХИДИ хезмәткәрләре тарафыннан контроль көчәюгә, штрафларның артуына да карамастан, юл һәлакәтләре саны кимеми. Район юлларында да алар сизелерлек артты. Бу хакта төгәлрәк мәгълүмат алу өчен без ЮХИДИнең Арча бүлекчәсе җитәкчесе, полиция подполковнигы Габделхак Касыймовка мөрәҗәгать иттек.
Быел алты айда Арча районы юлларында 29 юл–тран-спорт һәлакәте булып, анда 2 кешенең гомере өзелде, 50 кеше төрле авырлыкта тән җәрәхәтләре алган.
— Һәлакәтләрнең нинди төрләре күбрәк теркәлә?
— Автомобильләрнең бәрелешүе. Шундый 13 очракта ике кеше һәлак булды, 30 кеше яраланды. 7 очракта тран-спорт чаралары әйләнде һәм 10 кеше зыян күрде. 7 очракта җәяүлеләрне бәрдерделәр һәм 7 җәяүле тән җәрәхәте алды. Узган елның шушы чоры белән чагыштырганда, юл–транспорт һәлакәтләре саны 26,1 процентка артып китте. Узган елда алты айда һәлак булучылар 2 кеше иде. Ә яраланучылар саны быел 61,2 процентка күбрәк.
— Төп сәбәпләре нинди?
— Һәрвакыттагыча, транспорт чараларын йөртүчеләрнең тизлекне арттырулары. 11 очракта тизлекне арттыру фаҗигагә китерде, шуның нәтиҗәсендә бер кешенең тормышы өзелде, 16 кеше зыян күрде. Билгеләнгән тизлекне арттырырга ярамаганлыгы һәркемгә мәгълүм. Җинаятьчел саксызлык, ваемсызлык, кеше тормышына, сәламәтлегенә салкын карау аяныч нәтиҗәләргә китерә. Юлда игътибарлы булырга, тизлекне арттырмаска, куркыныч туган очракта туктап кала алырлык тизлектә барырга кирәк.
Шулай ук исерек хәлдә транспорт чарасы белән идарә итү дә күп очракта аяныч тәмамлана. Шундыйлар гаебе белән 7 юл–транспорт һәлакәте булды. Руль артындагы исерекләрне тоткарлауга Дәүләт автоинспекциясе нык игътибар итә. Шул максаттан төрле чаралар, махсус рейд-лар үткәрелә. Алты айда гына да 103 транспорт йөртүче исерек хәлдә тоткарланды, бу сан узган елның шушы чорыннан 8,7 процентка артыграк. Исерек хәлдәге транспорт йөртүчеләрне тоткарлауда полиция хезмәткәрләре дә, аеруча участок инспекторлары, актив катнаша.
Алкогольле эчемлекләр кулланганнан соң руль артына утырып юлга чыгарга ярамаганлыкны берәүгә дә аңлатып торасы юк. Моның өчен ел ярымнан ике елга кадәр транспорт белән идарә итү хокукыннан мәхрүм ителә-чәкләрен барысы да белә. Юк, нәтиҗә ясамыйлар. Туганнары, дуслары, җитәкчеләре күрә торып шуңа юл куялар, исерек килеш руль артына утырырга мөмкинлек бирәләр. Моңа чик куярга кирәк.
— Җәй айлары җиттеме, урамнарда мотоцикллар, скутерлар пәйда була. Аларны йөртү өчен рөхсәт кирәкме?
— Мотоцикл белән идарә итү өчен шундый хокук бирү-че таныклык булуы мәҗбүри. Ә скутер, мопедларда йөрү өчен 16 яшь тулган булу кирәк. Бу шартлар үтәлмәгәндә мотоцикл, мопед яки скутер тоткарланып махсус урынга ябыла. Транспорт чарасы баланың ата–анасына гына кайтарып бирелә, өстәвенә Административ хокук бозулар турындагы кодексның 5.35 маддәсе нигезендә, хокук бозган өчен, административ беркетмә төзелә, ә бала полициядә исәпкә алына. Ата–аналарга теләгем шул: балаларыгызның сәламәтлеге сезнең өчен кадерле булса, мотоцикл, мопед, скутер, квадрацикл алып бирмәгез. Аларның киләчәгенә битараф булмагыз.
Гөлсинә ЗӘКИЕВА