Ничек башлыйсың — шулай тәмамлыйсың

Ничек башлыйсың — шулай тәмамлыйсың
18 июльдә ТР Хөкүмәте Йортында узган киңәшмәне республика Президенты Рөстәм Миңнеханов Универсиаданың уңышлы үтүенә өлеш керткән һәркемгә рәхмәт белдерүдән башлады.
Киңәшмәдә торак төзелеше, социаль объектларны ныклап төзекләндерү, халыкка электрон хезмәт күрсәтү, авыл хуҗалыгы мәсьәләләре каралды.
ТР Премьер–министры урынбасары, авыл хуҗалыгы һәм азык–төлек министры Марат Әхмәтов әйтүенчә, күпчелек районнар игеннәрне урып–җыюга керешкән. Әлегә уртача уңыш — 20,8 центнер.
Министр хәзер барлык комбайннар кырда булырга тиеш, диде. Ничек башлыйсың — шулай тәмамлыйсың, дигән әйтем бар. Алдагы көннәрдә яңгырларның яугалап торуы көтелә. Быел ашлык бик кадерле, бәяләр әйбәт булачак. Һәр басуда контроль булдырырга, сыйфатлы эшләргә, иртә башларга, соң кайтырга.
Азык әзерләү мөһим бурыч булып кала. Быел кукурузга да артык исәп тотарга ярамый. Саламны туратмаска, вакытында җыйнап куюны оештырырга.
Республика Президенты Рөстәм Миңнеханов төп игътибарны игеннәрне урып–җыю, азык әзер-ләү, көзге чәчүгә юнәл-дерергә кирәклеген искәртте.
Киңәшмәне муниципаль район башлыгы Алмас Назиров дәвам итте. Ул күп фатирлы йортларны ныклап төзекләндерү буенча эшне тизләтүне таләп итте. Сыйфат һәркайда яхшы булырга тиеш. Арчаның 2нче урта мәктәбен, ныклап төзекләндерү шундый булырга тиеш дип, республикада үрнәк итеп куялар. Интернационал урамындагы 5 катлы йортка килеп ничек эшләргә кирәклеген өйрәнергә була. Лесхоз мәктәбен ныклап төзеклән-дерү сыйфаты яхшы, күпме эзләсәң дә гаеп табып булмый. Ә менә Шушмабаш мәктәбендә эш темпы да түбән, сыйфатын карап торып эшләтеп тә таманга килә.
Авыл хуҗалыгы һәм азык–төлек идарәсе җитәкчесе Айдар Габбасов үзенең чыгышында игеннәрнең, аерым алганда көзге культураларның, борчакның өлгереп җитүен әйтте. “Игенче”, “Ватан”, “Курса МТСы”, “Татарстан” ширкәтләре урып–җыюга кереште.
“Северный”, “Игенче”, “Ватан”, “Курса МТСы” “Ак Барс–агро”, “Вамин–Арча” ширкәтләрендә комбайннар парады оешкан төстә үтте. Мондый чаралар бар хуҗалыкларда да узды диярлек. Бары тик “Шиһабеддинов”, “Нива” ширкәтләрендә генә оешканлык җитми.
Комбайнчыларга җыелышларда түләү, кызыксындыру чаралары әйбәтләп аңлатылды. Быел алар, чыннан да, кызыгып эшләрлек.
— Урып–җыюны сузарга кирәкми, — диде район башлыгы Алмас Назиров киңәшмәне йомгаклап. — Комбайннар басуда булырга тиеш, алар эшләгәндә сынала.
Азык әзерләүне туктатмаска. Быел үләннәр яхшы үсте, сыйфатлы печән әзерләү өчен бөтен мөмкинлекләр бар иде.
Ильяс ФӘТТАХОВ