Көтеп алган кунак сез!

Көтеп алган кунак сез!
Бүген барлык юллар иген басуларына илтә. Икмәк булса, җыр да була дигәндәй, республикабыз язучылары, шагыйрьләр, журналистлар 25 июльдә районыбызга килде.
Бу матур традиция Гариф Ахунов, Мөхәммәт Мәһдиев, Туфан Миңнуллиннардан башланып, хәзер дә дәвам итә. Иҗат әһелләре кунакчыл Арча җиреннән иҗатлары өчен илһам алып, көч–куәт туплап китә.
Быелгы мөхтәрәм кунаклар арасында Татарстан Республикасы Язучылар берлеге рәисе Рафис Корбанов, ТР Дәү-ләт Советы депутаты Разил Вәлиев, язучылар һәм шагыйрьләр Камил Кәримов, Марсель Галиев, Гәрәй Рәхим, Фәйрүзә Мөслимова, “Ватаным Татарстан” газетасының бүлек мөдире Камил Сәгъдәтшин, “Мәдәни җомга” газетасының баш мөхәррире Зиннур Мансуров, “Идел” журналының баш мөхәррире, якташыбыз Рөстәм Галиуллин бар иде. Аларны муниципаль район башлыгы Алмас Назиров Арча җиренә аяк басулары белән тәбрикләде, районыбыз тормышы, бүгенге көн үзәгендә булган урып–җыюның барышы белән таныштырды.
Ул игенчеләребезнең фидакарь хезмәте, район халкының тулы канлы тормышта яшәве, уңышларыбыз һәм проблемалар турында сөйләде. Яздан бар да әйбәт кебек иде, чәчүләр технологияне үтәп, үзвакытында чәчелде. Әмма республикага зур зыян салган корылык Арча җирен дә читләтеп үтмәде. Шулай да, көзге культураларның мәйданы шактый булуы хәлне бераз җиңеләйтә, аларның уңышы начар түгел, сабан культураларына гына әлләни өмет баглап булмый.
Кунаклар игенчеләрнең үзләре белән дә очрашып хәлләрен белделәр, басуларны карадылар. “Татарстан” ширкәтенең арыш кырында җитәкче Рүзәл Мәрдә-нов хуҗалыкның бүгенге хәлен сөйләп күрсәтте. Арыш әлегә гектардан 24 центнер чамасы чыга.
Кунаклар комбайнчылар арасында яшьләрнең күп булуына да игътибар итте. Гәрәй Рәхим рухланып китеп бер шигырен дә укыды.
— Әйе, яшьләр дә, утыз елдан артык тәҗрибәсе булганнар да бар, — диде рәис. — Остазлар янында яшьләр дә тәҗрибә туплый.
Районыбызда хуҗалык итүнең яңа формалары барлыкка килде. Эшмәкәрләр, гаилә фермалары уңышлы эшчәнлек алып бара. Түбән Атыда Дамир Хәлиуллин 5 гектарда кыяр, помидор үстерә. Аның биләмәләрен Казан кунаклары кызыксынып карады. Быел 600 тонна кыяр гына сатканнар. Мондый эшмәкәрләр исемлеген дәвам итәргә була.
Быел республика мәгариф хезмәткәрләренең август киңәшмәсе Арчада була. Киләсе елда федераль Сабантуй Арчада булачак. Район башлыгы Алмас Назиров шушы мөһим вакыйгаларга әзерлек чаралары турында да әйтеп үтте. Кунаклар шәһәр стадионында да булдылар, андагы матурлыкны күреп хозурландылар.
— Минем бик күп җирләрдә Сабантуйларда булганым бар, әмма Арчадагы кебек милли төсмерләргә бай Сабантуй күргәнем юк, — диде ТР Дәүләт Советы депутаты Разил Вәлиев.
Кунаклар Г.Тукай исемендәге Ашытбаш урта мәктәбендә, Пөшәңгәр башлангыч мәктәп–балалар бакчасында, “Мәрҗани”, “Северный”, “Ватан” ширкәтләрендә дә булдылар. Алар күргәннә-реннән бик канәгать булып, шундый мөмкинлек тудырган өчен район башлыгы Алмас Назировка рәхмәт әйтеп, арчалыларга яңа уңышлар теләп киттеләр.
Ильяс ФӘТТАХОВ