Үзе фермер, үзе иганәче, үзе...

Үзе фермер, үзе иганәче, үзе...
Республикада игълан ителгән “Үз мәктәбеңә булыш!” акциясе кысаларында миһербанлы кешеләр тырышлыгы белән мәктәпләрнең төзекләнүен, җиһазларның артуын, укучыларга белем алуга яңа мөмкинлекләр ачылуын күрү бик куандыра. Районыбызда да киң күңелле эшмәкәрләр булуы зур шатлык. Шундый кешеләрнең берсе — Утар Аты авылында яшәүче Фәнис Мостафин.
Фәнис абыйны күпләр белә булыр: берәүләргә ул гаилә фермасы хуҗасы, икенчеләргә имам–хатыйб буларак билгеле булса, районда күпләр аны сәнгать кешесе, мәҗлесләр алып баручы, баянчы буларак белә.
Фәнис Мостафин 1972–1982 елларда Утар Аты мәктәбендә белем ала. Мәктәп — бүгенге көндә фермер өчен изге урыннарның берсе, шунлыктан ул туган мәктәбендә һәрчак көтеп алынган кунак. Өстәвенә, мәктәпнең күршесендә генә яши икән. Аның белән күрешкәннән соң, мәктәпкә алган җиһазларны күрергә дип белем йортына юнәлдек.
Юлыбыз тимердән челтәр бизәкләр белән эшләнгән матур капка янына алып килде. Кара савыты, каләм сүрәте төшерелгән кече капканы ачып эчкә үттек һәм чәчәк патшалыгына юлыктык. Нинди генә төрләре юк!
— Бу гүзәллекне мәктәп коллективы үзе тудырды. Чәчәк орлыкларын үзләре чәчеп, теплицада үстерделәр. Кичке сәгать 11гә кадәр эшлиләр иде укытучылар. Менә шул тырыш хезмәтләренең нәтиҗәсе инде бу, — дип Фәнис абый таныштырып бара.
Ә теплицаны мәктәпкә үзе бүләк иткән икән. Ни өчен нәкъ менә теплица бүләк итүе белән кызыксынам.
— Мәктәп белән тыгыз элемтәдә торганлыктан, биредәге эш барышы, проблемалар белән дә даими кызыксынып барырга тырышам. Язын, директор Булат Сафин белән сөйләшкәндә, теплица булдыру турындагы хыялларын белгәннән соң ярдәм итәргә уйладым, — ди.
Мәктәп эченә үтәбез. Укытучылар коллективы эш белән мәшгуль: кайсы компьютер артында, кайсы төзекләндерү эшендә. Киләсе уку елына әзерләнәләр. Барысы, беравыздан Фәнис Мостафинның киң күңеллелегенә басым ясап, аңа рәхмәтләрен җиткерде. Баксаң, без кергән матур капканы да Фәнис абый эшләткән икән. Алай гына түгел, мәктәп коллективы бер генә чараның да Фәнис абый ярдәменнән башка үтмәве турында әйтә.
Һәр елны уза торган хоккей ярышы, Яңа ел, укучылар Сабантуе, ветеран укытучылар белән очрашу һ.б. бәйрәмнәрдә Фәнис Мостафин иганәче, оештыручы, хәтта алып баручы да. Узган ел аның инициативасы һәм ярдәме белән укучылар форумы оештырылган. Анда профессиональ җырчылар да чакыртканнар. Наласа, Утар Аты, Кушлавыч һәм Түбән Аты мәктәпләренең югары сыйныф укучылары өчен онытылмаслык мизгелләр булган ул. Әлеге башлангычны быел да дәвам итеп, традициягә кертергә ниятлиләр. Быел Бөтендөнья балаларны яклау көнендә укуда, спортта алдынгы булган, мәктәп тормышында актив катнашкан укучыларны җыеп, Казанга экскурсиягә алып барган.
— Кесәмә бераз акча кердеме, “Балаларны онытма!” — дип кычкыра башлый инде. Үзем генә берни эшли алмас идем, әгәр тормыш иптәшем акыллы, мине аңлый торган кеше булмаса, — ди Фәнис абый.
Тормыш иптәше Гөлсем апа сәнгать кешесе, авылның мәдәният йорты директоры, шуңа күрә мәктәптә бәйрәм чараларын бергәләп оештыра алар. Заманында йорт башлыгы үзе дә клуб мөдире булып эшләгәнгә, әлеге өлкә якын аңа. Ә балалар дөньясы аның өчен яшәү рәвеше. Үзе биш кыз бала әтисе булганга гына түгел, яшьлегендә мәктәптә физкультура укытып, шул дөньяда яшәп, андагы проблемаларны белгәннән соң, урман каравылчысы булып эшләгәндә дә мәктәптән аерылмый ул, бәйрәм чараларына мөмкинлеге булганча акчалата ярдәм күрсәтә башлый. Димәк, әлеге акция кысаларында ул инде тәҗрибәле, стажлы кеше.
— Бервакыт район башлыгы Алмас Назиров: “Сез җитәкче кеше. Килер бер көн һәм авылың халкы: “Син авылың өчен нәрсә эшләдең?” — дип сорар. Шул чакта халкың алдында кызарып тормаслык якты эз калдырырга тиешсез”, — дигән иде. Мин шул сүзләрне тормыш девизым итеп яшим, — ди Фәнис Мостафин. — Коръәндә адәм балаларына: “Үзеңә телисе яхшылыкны иң элек кешегә телә”, — диелә. Укытучы — минем өчен иң хөрмәтле һөнәр, ә балаларга мәхәббәтем әйтеп бетергесез. Шунлыктан, мөмкинлегем булганча, ярдәм итәргә тырышам.
Һаман да балалар өчен дип тырышып, зур хыяллар белән яши ул: сентябрьдән мәчеттә кызларны, малайларны аерым укыту турында, Мәдәният йортына районнан белгеч чакыртып бию түгәрәге оештырырга планнар кора, быел кыш авылда хоккей мәйданчыгы ясап, махсус киемнәр алырга хыяллана...
Хыялларыгызны чынга ашырырга Аллаһы Тәгалә сәламәтлек бирсен һәм киләчәктә дә игелекле эшләрегезне ишетеп, сөенеп яшәргә язсын, Фәнис абый!
Розалия ЗИННӘТОВА