Хезмәтенә күрә – бәясе

Хезмәтенә күрә – бәясе
Муниципаль район башлыгы Алмас Назиров яңа уку елы алдыннан мәктәпләрнең әзерлеген барлап чыга, укытучылар белән очраша.
Дөрес, ул уку йортларындагы хәлне болай да яхшы белә, әмма монысы инде үзгәрәк сәяхәт: “Мин директорларга, коллективларга характеристика язып кайтам, киләчәктә эш иткәндә дә ярап куя ул”, — ди район башлыгы.
Өчиле авылы безне әрем исе белән каршы алды. Юл буенда, басуда — әрем патшалыгы. Соңгы вакытларда гына да бу турыда күпме сөйләшүләр булды, күрсәтмәләр бирелде, “Вамин–Арча” ширкәте җитәкчелегенең бу якларга игътибары җитми, авыл җирлеге башлыгы да тыныч кына йөри бирә.
Ә менә Өчиле мәктәбе янына килеп җиткәч, дөнья яктырып киткәндәй булды. Район башлыгы башта яңа эшли башлаган фельдшер–акушерлык пунктына кереп чыкты. Республика программасы нигезендә узган ел шундый пунктлар Апаз һәм Мөндеш авылларында ачылган иде. Быел Өчиле белән Түбән Орыда төзелде. Бик уңайлы, курчак өе кебек матур биналар. Өчиле мәктәбе бик әйбәт тәэсир калдырды, террито-риясе ялт иткән, һәркайда чәчәкләр. Мәктәп үзе дә укучылар кабул итәргә әзер, буяп, матурлап, җиһазлап куйганнар. Идәннәрдә — келәмнәр.
Район башлыгы бу мәктәпне башка мәктәпләрдә булганда да үрнәк итеп телгә алды әле.
Яңа Кырлай мәктәбендә дә әзерлек яхшы, бакчаларында эш күренеп тора.
Алмас Назиров Г.Тукай музей–комплексы территориясендә булды, аны тагын да ямьләндерү буенча киңәшләрен бирде.
Яңа Кишет мәктәбендә тәэсирләр кимрәк булды. Монда күңел җылысы биреп, булдырыйм дип эшләү җитми. Әйтә башлагач әйтеп бетерим инде: статуслары вакытлыча түбәнәеп алган Иске Ашыт, Шурабаш мәктәпләренең торышы, сакланышы Яңа Кишетнекеннән югарырак бәя алдылар.
Быел “Вамин–Мәрҗани” ширкәте генераль директоры Марат Минәчетдинов та мәктәпләрдә булырга вакыт тапты, үзе әйткәнчә, моңарчы күрмәгән яңалыклар да күрде. Район башлыгы аңа мәктәпләрдә ешрак булырга, кирәк булганда ярдәм кулы сузарга киңәш итте. Шул ук вакытта юл буйларын “сакаллардан” арындырырга, карт үлән басуларын эшкәртергә кирәклеген исенә төшерде.
Ташкичү мәктәбендә тәртип. Яңа Кенәр мәктәбе коллективы үз дәрәҗәсен югары тота, бакчалары — искиткеч.
Яңа Кенәр интернат–мәктәбендә Алмас Назиров мактау сүзләрен кызганмады, интернат икенче яшьлеген кичерә, диде. Капкадан керүгә гөлбакча каршы ала, юл буйлап чәчәкләр озата бара. Мәктәпне дә тырышып әзерләгәннәр, бакчалары бик бай.
Иске Ашыт, Шурабаш мәктәпләре быел тугыз еллыкка әверелделәр. Коллективлары тупланган, җитәкчеләре өметле. Шурабаш мәктәбендә 99 бала укыячак. Район башлыгы киләсе елда Байкал авылына юл салуны планга кертергә тырышабыз, дигән җылы хәбәр әйтте.
Ильяс ФӘТТАХОВ