Тәрбиячеләр могҗизалар эшләргә сәләтле

Тәрбиячеләр могҗизалар эшләргә сәләтле
Арчада Татарстан Республикасының мәгариф һәм фән хезмәткәрләренең август киңәшмәсе кысаларында секцияләр эшли башлады. Педагоглар ике юнәлештә эшләде. Беренчесендә балаларга мәктәпкәчә белем бирүчеләр тәҗрибә уртаклашса, алдынгы ысулларны өйрәнсә, икенчесендә—башлангыч белем бирү методистлары яңалыклар туплады.
Иртәдән Татарстан Республикасы Министрлар Кабинеты, Татарстан Республикасының Мәгариф һәм фән министрлыгы вәкилләре, муниципаль мәгариф идарәсе органнарының, мәгълүмати–методик үзәкләрнең мәктәпкәчә белем бирүгә җаваплы методистлары, урта махсус белем учреждениеләре укытучылары, мәктәпкәчә белем бирү учреждениеләре мөдирләре эшне башлап җибәрде.
Киңәшмәдә катнашучылар Арчаның 5нче гимназиясе базасында балаларны юл йөрү кагыйдәләренә өйрәтү буенча 2нче балалар бакчасы нәниләре әзерләгән күңелле һәм файдалы тамашаны карагач, өч маршрутка бүленеп, Арчаның 1нче, 4нче һәм 5нче бакчаларында оештырылган секцияләрдә эшләделәр. Программалар “Мәктәпкәчә белем бирүдә инновацион технологияләр” темасына багышланды.
Республиканың төрле шәһәрләре һәм районнарыннан килгән мәктәпкәчә белем бирү учреждениеләре хезмәткәрләре нинди дә булса яңалык алуны, башкалар тәҗрибәсен өйрәнүне максат итеп куйдылар. Килгән кунаклар Арча чиста, матур шәһәр, халкы бик кунакчыл икән, дип сокландылар. Заманча итеп төзелгән 4нче балалар бакчасы “Бәләкәч”тә булгач, кайберәүләр бездә дә мондый бакча булса, рәхәтләнеп эшләр идек, дип, үзләренең фикерләре белән уртаклаштылар. Кунаклар, чыннан да, өйрәнерлек нәрсәләр күп, Арча тәмам шәһәр булып өлгергән, дигән бәяне бирделәр.
Арчалылар, афәрин, бик тырышкан, бай эчтәлекле программа әзерләгән. Балалар белән яңача эшләү ысуллары белән танышканда педагогларның “тагын нәрсә булыр икән, дип” осталык дәресләреннән хәтта аерыласылары килмәде. Тукай районы балалар бакчасы мөдире Зәйтүнә Камалиева: “1нче балалар бакчасында интерактив өстәл кулланып, анимация үрнәкләре бирү (пыяла өстенә ком сибеп, төрле сурәтләр ясау) бик ошады. Кайткач, һичшисез, үзебездә дә кулланачакбыз”, — дип үзенең фикерләре белән уртаклашты. Киңәшмәдә катнашучылар Арча педагогика көллиятенең татар теле һәм әдәбияты укытучылары Миләүшә Нуриева, Әлфия Төхфәтуллина, Дилә Шаһиеваның рус телле тәрбиячеләрне татар теленә өйрәтү турындагы чыгышларын зур кызыксыну белән тыңладылар. Быелгы уку елыннан Арча педагогика көллиятендә Милли кадрлар әзерләү үзәге эшли башлаячак, дип хәбәр итте алар. Татарстан Президенты Рөстәм Миңнеханов татар телен саклау һәм үстерүне таләп итә. Җөмһүриятебез башлыгы: “Бүгенге көндә татар телен саклап калу, аны тагын да үстерү баланың кече яшеннән үк, ягъни балалар бакчасыннан ук башланырга тиеш, һәм бу мәсьәлә икеләтә мөһим”,— ди. Хәзер балалар бакчаларында эшләүче рус телле тәрбиячеләрнең татар телен өйрәнүләре таләп ителә. Шул максаттан республикабызның кайбер педагогика көллиятләрендә, Арчада да, махсус үзәкләр ачылачак. “Узган ел Казанда укып кайттык, соңыннан үзебездә, Арча педагогика көллиятендә, районыбызның рус телле тәрбиячеләре өчен татар телен өйрәнү курслары оештырылды, — дип сөйләде югары категорияле укытучы Әлфия Төхфәтуллина. —Арчадан һәм авыллардан 14 тәрбияче белән шөгыльләндек. Хәтта 25 ел эшләгән рус телле тәрбиячеләр татар телен бик теләп һәм аның кирәклеген аңлап өйрәнделәр. Быелның 29 июленнән мондый курсларның икенчесе башланды. Бу юлы без аны республиканың башка тәрбиячеләре өчен дә оештырдык”.
Пленар утырышта Татарстан Республикасының мәгариф һәм фән министры Энгель Фәттахов катнашты. Утырыш Арчаның 1нче мәктәбендә булды. Мәктәп фойесында балалар бакчалары хезмәткәрләре оештырган күргәзмәләрне карап, эш папкалары белән танышып, яңа китаплар сатып алган педагоглар эшлекле сөйләшүгә җыелдылар. Быелның 1 сентябреннән “РФнең Мәгариф турындагы” яңа законы гамәлгә кергәч, белем бирү учреждениеләрендә, шул исәптән балалар бакчаларында да, хезмәт федераль стандарт буенча оештырылачагы ассызыклап үтелде. “Федераль стандарт буенча эшләве безгә дә җиңел булачак”,— диде министр. Мәктәпкәчә белем бирү учреждениеләрен кадрлар, заманча җиһазлар белән тәэмин итү, биналарын ныклап төзекләндерү, яңаларын төзү, балаларны 3яшьтән бакчага урнаштыру һ.б. мәсьәләләр күтәрелде. “Бакча — ул мәктәп белеменең беренче баскычы”, — диде министр Энгель Фәттахов. Мәктәпкәчә яшьтәге балалар белән эшләү мәсьәләсенә игътибар тагын да артачак, дигән сүз бу. Бакчаларда эшләүче тәрбиячеләрнең быелның 1 гыйнварыннан хезмәт хакларының артуы, әлбәттә, аларның эш сыйфатына уңай йогынты ясый. Матди яктан кызыксындыру хезмәткә дәрт, күңел җылылыгы уята. Билгеле, тәрбиячеләргә таләп тә арта. Заман таләбе. “Бала бакчада үзләштергәнне тормышта куллана белергә, психологик яктан мәктәпкә барырга әзер булырга тиеш”, — дип сөйләде Татарстан Республикасы мәгариф һәм фән министрының беренче урынбасары Данил Мостафин. Шулай итеп, тәрбиячеләрдән заманча җиһазлар ярдәмендә яңача эш алымнары белән зур хезмәт таләп ителә.
Арча районы мәгариф идарәсе җитәкчесе Рина Бәдриева бездәге уңай тәҗрибәләр турында сөйләде, балаларның бакчадан мәктәпкә татар һәм рус телләрен тормышта куланырлык итеп өйрәнеп, белеп чыгачакларын ышандырды.
Республика буенча 1842 бала бакчаларга чират көтә. “Бу бик зур сан”, — диде министр. Әлеге мәсьәләне биналар төзү, яңа төркемнәр, гаилә бакчалары оештыру, инвесторларның шәхси бакчалар ачуы белән хәл итеп булуы турында сөйләшенде. Электрон чиратлар хакында да сүз булды. “Тәртип урнаштырмый торып туктамаячакбыз”, — дип, катгый итеп әйтте Энгель Фәттахов. 2016 елда 3 яшьтән алып 7 яшькә кадәрле балаларның барысы да бакчага урнаштырылачак, дигән хәбәр әйтелде. Республикада 38 гаилә балалар бакчасы эшләсә, шуның 10сы — Арча районында. Министр акчалы инвесторларның шәхси бакчалар оештыруын киләчәге булган юнәлеш, дип атады һәм һәр районда бер генә булса да шундый бакча ачылсын иде, дигән теләк белдерде.
Казан педагогика көллияте директоры Анфиса Җәләлова кайбер чит илләрдәге тәҗрибәләр турында да сөйләде. Бакчаларда һәр баланың үсеше буенча шәхси портфель алып барган илләр бар, бу исә бала мәктәпкә укырга кергәч, аның шәхес булып өлге-рүенә ярдәм итә. Казан шәһәренең бассейнлы, компютер сыйныфлы 283нче балалар бакчасы мөдире Айзирәк Андреева дауна авыртулы бала белән ничек эшләүләре, сабыйны тормыш итәргә яраклы итеп тәрбияләүләре турында сөйләп, тәрбиячеләрнең могҗизалар эшләргә сәләтле икәнен тасвирлады. Арчада үткән секция эшләре дә шуны раслады.
Румия НАДРШИНА