Таләпләр арта

Таләпләр арта
Соңгы елларда Арча мәктәпләре дә авыл мәктәпләре үрнәгендә чәчәк, яшелчә үстерергә өйрәнеп килә.
— Ә ул киресенчә булырга тиеш иде дә бит, — диде муниципаль район башлыгы Алмас Назиров, Арчаның икенче урта, 3нче башлангыч мәктәпләренең, 5нче гимназиянең яңа уку елына әзерлеген карап чыгып, укытучылар коллективлары белән очрашканда.
Ул башта икенче урта мәктәптә булды, мәктәп яны участогын, мәктәпнең үзен карап чыкты. Бу мәктәп коллктивы районда үрнәк уку йортына әверелеп бара. Ныклап төзекләндергәннән соң, бинасы яңа төзелгәндәй төс алды, төпле белем бирү өчен шартлар уңайланды. Күрсәткечләре дә елдан–ел яхшыру ягында. Алмас Әминович мәктәпнең элекке директоры Гөлнара Гарипованың коллективны туплау, мәктәпне алга җибәрү буенча зур эш башкарганын билгеләп үтте. Аңа тагын да җаваплырак вазыйфа йөкләнде — ул хәзер Г.Тукай исемендәге Арча педагогика көллияте директоры.
Мәктәпнең яңа директоры Рамил Мөхәммәдияров районның әйдәп баручы уку йорты — Арчаның беренче урта мәктәбе белән уңышлы гына җитәкчелек итте.
— Сезнең мәктәпнең мөмкинлекләре зур, без сезгә зур өметләр баглыйбыз, — диде район башлыгы.
Арчаның өченче башлангыч мәктәбенең киләчәге турында да куанычлы хәбәрләр әйтте Алмас Әминович. Мәктәп үзе узган ел ныклап төзекләндерелгән иде инде. Киләсе елда аңа өстәп балалар бакчасы төзелә. Спорт залы, ашханәсе булган бик матур бина булачак ул.
Район башлыгы коллективның бакчада куелган хезмәтен уңай бәяләде, мәктәпне үрнәк хәлдә тотарга кирәклеген искәртте.
Арчаның 5нче гимназиясе яңа уку елына әзер. Асфальт җәйгәннән соң, ишегаллары тагын да яктырып киткәндәй кебек. Һәркайда чәчәкләр, бакчада да тырышып эшләгәннәр. Алмас Назиров укытучылар коллективына балаларга ныклы белем һәм тәрбия бирүдә яңа уңышлар теләде.