Барлык юллар Арчага илтә

Барлык юллар Арчага илтә
21–22 августта Арчада мәгариф һәм фән хезмәткәрләренең “Татарстан Республикасы мәгариф өлкәсендә заманча технологияләр” дип аталган республика август киңәшмәсе үтте. Анда Татарстан Республикасы Президенты Рөстәм Миңнеханов, Премьер–министр Илдар Халиков, республиканың дәүләт органнары җитәкчеләре, министрлыклар һәм ведомстволар вәкилләре, муниципаль районнар башлыклары, муниципаль берәмлекләрнең башкарма комитет җитәкчеләре урынбасарлары, мәгариф идарә органнары башлыклары һәм аларның тәрбия эшләре буенча урынбасарлары, мәгълүмати–методик үзәк җитәкчеләре катнашты.^
21 августта кунаклар башта мәгариф объектларын карадылар, алар Арчаның 1нче урта мәктәбендә, Укучылар сараенда, ДОСААФның район оешмасы автодромында, 2нче урта мәктәптә, Баланы үстерү үзәге — 4 номерлы “Бәләкәч” балалар бакчасында булдылар, үзәк мәйданда оештырылган күргәзмәне карадылар.
Район Мәдәният йортында киңәшмәнең пленар өлеше үтте. Ул “Республиканың белем бирү пространствосында укыту һәм тәрбиянең эффектив технология-ләрен куллану” темасына багышланды. Аны Татарстан Республикасы Премьер–министры урынбасары — Татарстан Республикасы мәгариф һәм фән министры вазыйфаларын башкаручы Энгель Фәттахов ачты. Ул 1 сентябрьдә озаклап көтелгән “Мәгариф турында”гы яңа закон гамәлгә керәчәген әйтеп үтте. Республикада милли мәктәпләр өчен кадрлар әзерли торган үзәкләр эшли башлый. Шуларның берсе — Арча педагогика көллияте. Монда шулай ук 30 балага исәпләнгән гимназия сыйныфы ачыла. Анда 7нче сыйныфтан башлап укыячаклар. 9нчы сыйныфны тәмамлагач укуны көллият студентлары булып дәвам итәчәкләр. Әлеге сыйныф — шушы зонага кергән районнар балалары өчен дә.
— Бу киңәшмә ни өчен Арчада үтә? — дигән сорау куйды министр һәм җавабын да бирде. — Арча чын шәһәргә әверелде, күпме торак, социаль объектлар төзелде һәм төзелә. Кайберләрен үзегез дә күреп үттегез. Мәгарифкә гаять зур игътибар бирелә, район башлыгы ике атна эчендә барлык мәгариф учреждениеләрен йөреп чыккан. Аның җитәкчелегендә бердәм команда эшли, нәтиҗәләр дә яхшы.
Киңәшмә эшендә катнашучыларны муниципаль район башлыгы Алмас Назиров тәбрикләде.
Татарстан Республикасы мәгариф һәм фән министрының беренче урынбасары Данил Мостафин 2012–2013 уку елы йомгаклары һәм яңа уку елына бурычлар турында сөйләде. Россия Федерациясе Дәүләт Думасы депутаты Илдар Гыйльметдинов, “Просвещение” нәшрияты президенты Александр Кондаков, Мәскәү дәүләт педагогика университетының алгебра, геометрия һәм укыту методикасы кафедрасы мөдире Сергей Атанасян, “Educare” Сингапур компаниясенең генераль директоры Майк Тируман, Татарстан Республикасы Мәгарифне үстерү институты ректоры Фәнүзә Тарасова, ТР мәгариф һәм фән министры урынбасары Светлана Гыйниятуллина, эшмәкәрләрнең Мәскәү Ассоциациясе инвестиция программаларын һәм проектлары смотр–конкурсын оештыру комитеты рәисе урынбасары Александр Игнатов чыгыш ясадылар.
22 августта Арчага Татарстан Республикасы Президенты Рөстәм Миңнеханов, Премьер–министр Илдар Халиков килде.
Рөстәм Миңнеханов Г.Тукай исемендәге Арча педагогика көллиятендә, Арчаның 1нче урта мәктәбендә, Укучылар сараенда булды. Президент көллияттә ныклап төзекләндерелгәннән соң булган үзгәрешләрне игътибар белән карады һәм ошатты, кайберләрен фоторәсемгә дә төшереп алды. Муниципаль район башлыгы Алмас Назиров, көллият директоры Гөлнара Гарипова әлеге уку йортын яңартудагы ярдәме өчен Президентка рәхмәт әйттеләр.
— Район башлыгының да тырышлыгы бу, — диде Р.Миңнеханов.
Көллият директоры Гөлнара Гарипова уку йортының киләчәккә планнары турында сөйләде.
Президент уку–укыту шартлары белән танышты, “Әлифба” музеен кызыксынып карады.
Президент шулай ук көллияттә “Educare” Сингапур компаниясе оештырган дәресләрне карады.
Аннан соң Президент Арчаның 1нче урта мәктәбендә булды. Биредә укучыларның фәнни һәм инновацион проектлары күргәзмәсе оештырылган иде. Президент мәктәп сыйныфларын, автосыйныф кабинетын, спорт мәйданчыгын карады.
Укучылар сараенда Рөстәм Миңнехановка авиа–судо–авто модельләштерүче, агачтан төрле әйберләр ясаучы, робот техникасы белән мавыгучы, “Нур” телестудиясендә шөгыльләнүче балаларны күрсәттеләр.
Арчаның үзәк мәйданында Президентны биюче балалар төркеме каршы алды.
Район Мәдәният йортында Рөстәм Миңнеханов мәгариф һәм фән хезмәткәрләренең традицион август киңәшмәсен ачып, республиканың мәгариф системасында уңай динамика күзәтелә, дип билгеләп үтте.
Президент киңәшмәнең Арчада үткәрелүе очраклы түгеллеген әйтте. Арча педагогика көллиятендә татар телен дистанцион укыту проекты уңышлы тормышка ашырыла. Район мәктәпләрендә укучыларга башлангыч һөнәри белем бирүне оештыру игътибарга лаек. Укучылар сараенда һәм балалар яшүсмерләр спорт мәктәбендә өстәмә белем бирүнең кызыклы формалары кулланыла. Гомумән, Арча районында мәгарифне үстерү буенча күп эшләнде һәм эшләнә.
Президент республикада мәгариф объектларының матди–техник базасы сизелерлек яхшыруын билгеләп үтте. Татарстанда мәгариф системасын реформалауда алдынгы халыкара тәҗрибә киң кулланыла. Әмма заманча иң алдынгы матди–техник база һәм алдынгы технологияләр дә мәгарифне заманча әзерлекле педагогтан башка камилләштерүне тәэмин итә алмый.
Төп докладны ТР Премьер–министры урынбасары — мәгариф һәм фән министры вазыйфаларын башкаручы Энгель Фәттахов ясады.
Муниципаль район башлыгы Алмас Назировның эчтәлекле чыгышы җылы кабул ителде. Шулай ук “Транснефть” нефть транспортлау акционерлык компаниясе”нең “Төньяк–көнбатыш магистраль нефть үткәргечләре” ачык акционерлык җәмгыяте генераль директоры урынбасары Илдар Шәмгунов, “Educare” Сингапур компаниясенең генераль директоры Майк Тируман, Казан шәһәре Идел буе районы 19нчы гимназиясе директоры урынбасары, физика укытучысы Динар Габидуллин чыгышлары да игътибар белән тыңланды.
Рөстәм Миңнеханов киңәшмәгә йомгак ясап, аның куелган максатка ирешерлек итеп үтүен әйтте, мәгариф өлкәсендә эшләүчеләргә уңышлар теләде.
Президент аеруча хезмәт күрсәткән педагогларга дәүләт бүләкләре тапшырды.
Ильяс ФӘТТАХОВ