Мәгърифәтле юлдан бергә атлыйк!

Мәгърифәтле юлдан бергә атлыйк!
Район мәгариф учреждениеләре хезмәткәрләренең киңәшмәсе булды. Анда Арча муниципаль район башлыгы Алмас Назиров катнашты. Уку йортлары, балалар бакчалары хезмәткәрләре белән хезмәттәшлек иткән, мәгарифне үстерүгә зур өлеш керткән җирлек башлыклары, хуҗалык җитәкчеләре дә чакырылган иде.
Киңәшмәдә катнашучылар иң башта мәгариф учреждениеләренең бакча нигъмәтләреннән әзерләнгән күргәзмәсен карадылар, педагогларның могҗизалар эшләвенә сокландылар.
Быелгы август район мәгариф учреждениеләре хезмәткәрләренә күңелле мәшәкатьләре белән аеруча истәлекле булды. Татарстан Республикасы Мәгариф һәм фән министрлыгы учреждениеләре хезмәткәрләренең республикакүләм киңәшмәсендә уңай тәҗрибә белән уртаклашу — ул үзе биниһая зур хезмәт. Тырышлыкның һәрвакытта да күркәм нәтиҗәсе була. Район киңәшмәсендә эшлекле доклад белән чыгыш ясаган Алмас Назиров күңелле хәбәр әйтте:
— Президент Рөстәм Миңнеханов педагоглар хезмәтенә югары бәя бирде.
Намуслы хезмәт иткән укытучыларга Россия Федерациясе Мәгариф һәм фән министрлыгының Мактау грамоталары тапшырылды. Мәгариф өлкәсен үстерүдә аерата тырышып эшләгән педагоглар район Советының Мактау грамоталары белән бүләкләнде. Республикакүләм киңәшмәне үткәрүдә актив катнашкан хезмәт коллективларына район мәгариф идарәсенең Мактау грамоталары тапшырылды.
Яңа уку елына әзерлек бәйгесендә җиңгән коллективларга район Советы дипломнары бирелде. Алар: мәктәпкәчә белем һәм тәрбия бирү учреждениеләре арасыннан Божа (җитәкчесе — Әлфия Фәттиева), Арчаның 2нче балалар бакчасы (Фәния Шакирова), Наласа (Гөлназ Габдрахманова); башлангыч мәктәпләрдән Пөшәңгәр (директоры — Раушан Котдусов), Арчаның 4нче мәктәбе (Резедә Исмәгыйлева), Акчишмә (Хәлимә Сабирҗанова); төп гомуми белем мәктәпләреннән Носы (директоры — Вәсим Бәдертдинов), Казанбаш (Илһам Шакиров), Урта Курса (Фәнил Хәбибуллин); урта мәктәпләрдән Арчаның 1нче мәктәбе (Эльмира Сафина), 5нче гимназия (Шәфигулла Гарипов), Курса–Почмак (Нурзилә Сабирҗанова).
Нәкъ җырдагыча, укытучыларга, тәрбиячеләргә, Сез иң гүзәл кеше икәнсез, дип дәшәсе килә... Барысы да — күлмәгегез, йөзегез, йөрәгегез күркәм сезнең! Россия Федерациясенең “Мәгариф” өстенлекле илкүләм проектында катнашу сезне үз мәшәкатьләрегездән киң дөньяга алып чыкты, хезмәтегезне һәм исемегезне бар җиһанга танытты. Хезмәт хакыгыз артты. Аз процентлы кредитка социаль ипотекага фатир алу мөмкинлеге тудырылды. Компьютерлар ярдәмендә дөнья челтәре белән дә тоташкан сез. Казанышларны санап чыгарга озак вакыт кирәк булыр иде. Алар турында бүгенге киңәшмәдә район мәгариф идарәсе җитәкчесе Рина Бәдриева сөйләде. Мөгаллимәләр кулында киләчәгебез — балалар язмышы. Педагогның абруе күтәрелә бара. Моны районда булып үткән Президент Рөстәм Миңнеханов катнашындагы республикакүләм киңәшмә дә, бүгенге киңәшмә дә раслады. Түргә язып куелган “Мәгърифәтле юлдан бергә атлыйк!” чакыруы киңәшмәнең эчтәлеге турында сөйли иде.
Эшлекле сөйләшү һәм котлаулардан соң бәйрәм җыр, музыка, фольклор, спорт уеннары белән дәвам итте.
Румия НАДРШИНА