Көз белән ярминкәләр килә

Көз белән ярминкәләр килә
Сентябрьдә син дә бер, мин дә бер дигәндәй, көз белән бергә башланып киткән ярминкәләрдә ниләр генә юк!
Узган шимбәдә Арчада үткән ярминкәгә килүчеләр эшне бәрәңгедән башлады. Чөнки икенче икмәк быел уңганныкы уңды, уңмаганныкы “туңды”. Ашарлык түгел, симәнәлек тә бәрәңге чыкмады, дип зарланучылар шактый. Дөрес, быел 2010 елдагы кебек дулкынлану, борчылу юк. Чөнки, ул елдагыдан аермалы буларак, үзебездә әйбәт уңыш алучылар бар. Шуңа бәяләр дә әллә кая сикермәячәк. Килограммын 10 сумнан саталар, моны күпсенүче, зарланучы күренми. Иң мөһиме — бар ул! Әнә, Гатауллин крестьян–фермер хуҗалыгы хәтта 8 сумнан сатты. Аныкын да, ун сумлыгын да алып бетерделәр.
Ашлык та бик кадерле быел. Бодайны бигрәк тиз тоттылар, арпа да үтемле булды. Җитмәгәннәрнең адресларын язып алып киттеләр. Алдамаслардыр, шәт. Базарда кемдер алдый, кемдер алдана шул. Монда да бодай алып китүчеләр арасында алданучылар булган, капчыкның авызында гына бодай, аста солы тутырганнар. Шуңа күрә әйбер алганда игътибарлырак булу зыян итмәс.
Узган шимбәдә арчалылар Казанда агросәнәгать паркында үткәрелгән ярминкәдә дә катнашты.
— “Ватан”, “Северный” хуҗалыклары, Апаз, Яңа Кенәр, Ташкичү авыл җирлекләре бик әйбәт әзерлек белән килгән иде, — ди район башкарма комитеты җи-тәкчесенең беренче урынбасары Рафил Исмәгыйлев.
Алда безне ярминкәләр сезоны көтә. Кирәк кешегә бәрәңге дә җитәрлек булачак. Район хуҗалыкларында ул 1117 гектарда игелде. 17 сентябрьгә шуның 470 гектары алынды, уртача уңыш 289 центнер.
“Кырлай” ширкәтендә бер гектардан уртача — 391, “Ак Барс–агро”да 250 центнер чыга.
Хуҗалыкларда быел 72947 гектарда туфрак эшкәртәсе бар. Шуның 38555 гектары эшкәртелде. “Курса МТСы”, “Игенче”, “Татарстан” ширкәтләрендә сөрү тирәнлеген тирәнәйтеп эшкәртүгә дә игътибар бирәләр.
Ильяс ФӘТТАХОВ