Ислам — тынычлык дине

Ислам — тынычлык дине
Арча Җәмигъ мәчете имамы Рәмис хәзрәт Гарифуллин белән ислам диненең милләтара мөнәсәбәтләргә карашы турында әңгәмәне дәвам итәбез.
— Хәзрәт, халкыбыз гасырлар дәвамында башка милләтләр белән дус–тату яшәгән. Бөек Тукаебыз әйткәнчә,
Рус белән тормыш кичердек сайрашып,
Тел, лөгать, гадәт вә әхлак алмашып.
Башка диндәге кешеләргә карата мөселманнар нинди мөгамәләдә булырга тиеш?
— Аллаһ Тәгалә изгелек кылучы мөэмин-мөселманнарга бу дөньяда да, ахирәттә дә изгелек белән кайтара. Ә начарлык кылучы бәндәләренә бу дөньяда да, ахирәттә дә начарлык белән кайтара. Ахирәттәге начарлык исә, җәһәннәм газабы. Ахирәткә, җәннәткә-җәһәннәмгә иман китергән хакыйкый мөэмин-мөселман зарар кылмас,бәндәләрне рәнҗетмәс.
Сорау туа: мөселманнар имансызларга ярдәм итә алалар микән? Бу сорауга җавапны Раббыбыз Аллаһның китабы Коръәни Кәримнең Мүмтәхәнә сүрәсенең 8 аятеннән таба алабыз, анда Аллаһ болай ди: Аллаһ сезне тыймыйдыр, Ислам диненә каршы сезнең белән сугыш кылмаган, вә сезне йортларыгыздан куып чыгармаган кавемнәр белән яхшы мөгамәләдә булудан һәм аларга гадел¬лек кылудан. Тәхкыйк Аллаһ гадел кешеләрне сөядер.
Исламга каршы көрәшмәгән бәндәләргә ярдәм итү, сәдака бирү, ач булсалар ризык бирү, киемнәре булмаса кием бирү, авырсалар дару бирү тыелмый, ә Аллаһ тарафыннан рөхсәт ителә торган изге гамәлләрдән санала. Моннан нәтиҗә чыгарабыз, димәк, Ислам дине самолетларда, метроларда һәм башка җирләрдә шартлатырга чакырмый. Бернинди дә гөнаһысы, гаебе булмаган кешеләргә, картларга, балаларга яхшы мөгамәләдә булырга, изгелек кылырга чакыра.
Әмма гөнаһлы юлга ярдәм итү дин тарафыннан тыела. Мисал өчен күршеңә хәмер алып кайтып бирү яисә аларга дуңгыз суерга булышу, яки кемгә дә булса зина кылу өчен бина бирү моның ише гөнаһлы юлларга ярдәм итү һичкайчан дөрес булмас. Кем дә кем мондый гөнаһлы юлларда катнаша, ярдәм итә – ул кеше үзе зур гөнаһлар кылган дип исәпләнә.
Дөнья яратылганнан бирле җир йөзендә күпме сугышлар булган. Күпме кан коелган, бер гаепсез кешеләр, ата-аналар, сабыйлар, нарасыйлар һәлак булган. Шундый вакыйгаларны искә төшерсәң йөрәкләрне әрнү–сагыш биләп ала. Бүгенгесе көндә дә дөньяның төрле почмакларында хәвефләр булып тора. Без, мөселманнар, кан коюга каршы. Без, мөселманнар, тынычлык яклы. Җир йөзендә тынычлык булсын, сугышлар булмасын. Һәркем тыныч яшәргә хаклы. Аллаһ безгә иман байлыгы, җан тынычлыгы, тән сәламәтлеге биреп, шушы дөньяда матур итеп яшәргә, үз хозурына иман белән күчеп, үзе вәгъдә кылган җәннәтләргә керергә насыйп әйләсен. АМИН!
Исрафил НАСЫЙБУЛЛИН