“Алмачуар” — Арчада

“Алмачуар” — Арчада
Районыбыз горурлыгы булган танылган шәхесләр исемлеге яңалары белән тулылана. Узган атнада шуларның берсе — артист, драматург, язучы Фәнәвил Галиевне искә алу кичәсе булды.
Арчага ул көнне якташыбыз эшләгән Абдулла Кариев исемендәге Казан татар дәүләт яшь тамашачылар театры артистлары да килде. Көндез яшь тамашачыларга алар Фәнәвил Галиевнең “Алмачуар” спектаклен күрсәтте. Аннан Татарстан Республикасының халык артисты, драматург, режиссер, язучының туган авылы Югары Әзәккә юл алдылар.
Фәнәвил Галиев үзенең иҗат тормышын Кәрим Тинчурин исемендәге дәүләт драма һәм комедия театрында артист булып башлый. Аннан язучылык эшенә кереп китә. Ул иҗат иткән драма әсәрләре тамашачылар күңелен тиз яулый. Тик, кызганыч, бик яшьли, 52 яшен тутыргач та арабыздан китте.
— Әле дә зур планнар, зур эшләр белән янып, яңа әсәрләр иҗат итү турында хыялланып йөри иде. Фәнәвил Галиев һәрчак безнең күңелләрдә якты хисле, бай фантазияле чын артист, режиссер һәм драматург булып калачак, — диләр Абдулла Кариев исемендәге Казан татар дәүләт яшь тамашачылар театры артистлары.
Шушы театр артисты Илфат Камалиев Фәнәвил Галиевнең “Классташлар” әсәре буенча кинофильм да төшерә башлаган. Бу хакта безгә театр директоры Мансур Ярмиев җиткерде.
— Ә быел театрда яңа сезон ачылыр алдыннан хезмәттәшебез, дустыбыз, киңәшчебез, сердәшчебез булган шәхесне туган ягында олы ихтирам белән искә алырга булдык, — ди театр режиссеры Ринат Әюпов.
Югары Әзәктә алар зиратка барып аның рухына дога кылдылар, каберенә чәчәкләр салдылар. Аларны район мәдәният идарәсе җитәкчесе Илнур Котдусов озатып йөрде.
Театр артистлары Арчага буш кул белән кайтмаган. Кичен алар Арча Мәдәният йортында Туфан Миңнуллинның “Нигез ташлары” спектаклен күрсәтте.
Гөлсинә ЗИННӘТОВА