«Наркотик сатучылар»ны тоткарладылар

«Наркотик сатучылар»ны тоткарладылар
Яшьләрне наркоманиягә һәм аңа каршы көрәшкә тарту максатыннан, наркоманияне профилактикалау буенча 2011–2015 елларга төзелгән озак вакытлы максатчан дәүләт программасы нигезендә, 16 сентябрьдән 16 октябрьгә кадәр республикада наркотикларга каршы көрәш айлыгы игълан ителде.

Айлык кысаларында районда да төрле чаралар уза: мәдәни, спорт ярышлары, әңгәмәләр, викториналар, конкурслар оештырыла. Әлеге чаралар балаларда актив тормыш алып баруын арттыра, сәламәт яшәү рәвешенә тартуда зур роль уйный.
Узган атнада Арча шәһәре стадионы наркотикларга каршы көрәшүчеләрне үзенә җыйды. Район мәгариф идарәсе, яшьләр эшләре, спорт һәм туризм бүлеге, район хастаханәсе, Арча Укучылар сарае, хокук саклау органнары, хәрби комиссариат, балигъ булмаган балалар белән эшләү комиссиясе белән берлектә оештырылган “Наркоконтроль көрәшчесе” дип аталган чарада Арча мәктәпләре (1, 2, 7нче мәктәпләр, 5нче гимназия) укучылары, бирелгән йөкләмәләр буенча наркотик белән сәүдә итүченең эзенә төшеп, яшереп куелган наркотик матдәләрне таптылар, аннан гаепләнүчедән сорау алып, беркетмәләр төзеделәр. Соңыннан һәр коллектив Дипломнар һәм истәлекле бүләкләр белән бүләкләнде.
Бу уен гына булса да, укучылар күңелендә уелып калачак. Чөнки кемдер наркотик белән сәүдә итеп, үзе артыннан аулауларын аңласа, икенчеләр полицейский ролендә аларны тотуда катнашты. Мең кат ишеткәнче, бер күрүең яхшы, ди халык мәкале. Ә хәтер күргәннәрне, үз кулың белән тотып эшләп караганнарны озаграк сакларга сәләтле.
Яман гадәт бер–берсен тартучан була. Яшьтән тәмәке белән аракы дигән явызларны үз итә башлаучыны шулар сөремендә наркотикка да үрелмәс дип ышанып әйтеп булмый. Димәк, киләчәгенең матур булып төзелүе турында хыялланган яшь кешенең әлеге афәтләрдән ерак торуы хәерле.
Розалия ЗИННӘТОВА