Яңалыклар

Соңгы вакытта пенсияне дәүләт тарафыннан финанслау программасы (Федераль закон, № 56) күпләрне кызыксындырды. Чөнки быелның 1 октябренә кадәр бу программага кермәсәң, аннан соң дәүләтнең мондый мөмкинлегеннән файдалана алмыйсың. Арча һәм Әтнә районнары буенча Пенсия фондының халык белән эшләүче бүлмәсендә хәйран кызу эш көннәре булып алды. Сентябрь аенда гына да 398 кеше шушы программага керәбез, дип гариза язды. Программаның асылы шунда: бер елга хезмәт пенсиясенең тупланма өлешенә кимендә 2 мең сум һәм иң күбе 12 мең сум акча күчерсәң, дәүләт ул сумманы икеләтә арттыра. 10 ел буе әлеге мөмкинлектән файдаланып була. Пенсиягә чыккач ул акчаны аласың. Районда әлеге программага барысы 4468 кеше кергән.

Узган якшәмбедә Рафис Сәләхетдинов җитәкчелегендәге “Җидегән чишмә” Арча халык театры, Ташкичүдән Роза Насыйбуллина җитәкләгән ”Өммегөлсем”, Шурабаштан Рәфия Салихова җитәкчелегендәге “Чордашлар” фольклор ансамбльләре Казан телевидениесенә “Аулак өй” тапшыруына төшәргә бардылар. Ташкичүлеләр татар халкы йолаларыннан сөлге агарту, шурабашлылар чыпта сугу күренешләрен күрсәтте. Әлбәттә инде, татар халкында мондый эшләр уен–көлке, җыр–биюсез бармаган. Бу юлы аларга кунак булып Әлдермештән Әлмәндәр, Өммия, Илсур да барды.

Казанның Горький исемендәге ял паркында Татарстанның урта уку йортлары арасында җиңел атлетика буенча кросс ярышлары булып узды. Ярышларда, һәр елдагыча, Арча педагогика көллияте командасы да (физик тәрбия җитәкчесе Бари Бакиров) катнашты. Кызлар 1 км, егетләр 2 км.га йөгерделәр. Афәрин, безнекеләр бик җитез булып чыкты, 374 очко җыеп, команда беренчелекне яулады. Бу узган елгы нәтиҗәдән 10 очкога күбрәк. Рания Хаматдинова, Гүзәл Зыятдинова, Айзилә Галимуллина, Илнур Әһлиуллин, Илшан Вафин, Булат Сәмигуллин, Алмаз Тимергалиев, Салават Шәмсетдинов көллиятнең һәм Арча данын лаеклы якладылар.

30 сентябрьдә кичке 9нчы яртыда Казан—Малмыж юлының Казанбаш тукталышы тирәсендә юл һәла-кәте була. Авыл ягыннан чыгучы “ВАЗ–21099” автомашинасы олы юлдан килгән “Форд”ка юл бирми һәм аның белән бәрелешә. Нәтиҗәдә, икесе дә зыян күрә. “ВАЗ–21099” автомашинасы хуҗасы тән җәрәхәтләре ала, Арча хастаханәсенә озатыла.

2013 елның 3 октябрендә Россия Эчке эшләр министрлыгының Арча районы буенча бүлеге дежур частена ашыгыч ярдәм бүлекчәсе диспетчерыннан район үзәк хастаханәсенә күпсанлы тән җәрәхәтләре алган А.ны китерүләре турында хәбәр алына. Тикшерү барышында А.га тән җәрәхәтләрен билгесез кешеләр ясавы ачыклана. Әлеге факт буенча җинаять эше кузгатылды. Тикшерү бара.
Б.БИЛАЛОВ, Россия Эчке эшләр министрлыгының
Арча районы буенча бүлеге тикшерүчесе,
юстиция капитаны