Әйбәт укытучы

Әйбәт укытучы
Әңгәмәдәшебез — Арча 1нче мәктәбенең рус теле һәм әдәбияты укытучысы Елена Герасимова.
— Елена Семеновна, “Татарстан Республикасының атказанган укытучысы” исемен алуыгыз белән котлыйбыз. Коллективта кешенең тырышлыгын, хезмәтен бәяләү ул җитәкчелекне бизи торган сыйфат.
— Институтны тәмамлап, Арчага туган мәктәбемә — 1нче мәктәпкә эшкә кайттым. Районның абруйлы мәктәбенә укытучы булып эшкә урнашу бик кыен иде ул вакытта. Рәхмәт директорыбыз Хак Шафигуллинга һәм рус теле укытучысы Любовь Капраловага, күрәсең, мәктәптә укыганда ук җитәкчебез һәм укытучым күңелендә ышаныч яулаганмын. Таләп бик зур булды. Еш кына дәрескә кереп утырырлар иде. Үземнең тырышлыгым бәрабәренә һәм остазларымның киңәшен тотып эшләгәнгә 1нче мәктәптә укытуымны дәвам итә алдым. 6 елдан соң “Өлкән укытучы” исемен бирделәр. Бу исем, гадәттә, бик озак килә. “Татарстан Республикасының мәгарифтәге казанышлары өчен”, “Россия Федерациясенең гомуми белем бирү мактаулы хезмәткәре” күкрәк билгеләре белән бүләкләндем.
— Укытучыга бәяне, гадәттә, укучылар, әти–әниләр бирә. Ә алар телендә Сез — әйбәт укытучы, дәресләрегез кызыклы үтә.
— Университетның филология бүлегендә укысам да, укытучы булып эшләрмен дип уйламаган идем. Әни дә, син кыюсыз, йомшак, укытучы булып эшли алмассың, дия иде. Балалар дөньясын, алар белән эшләүне чын күңелемнән яраттым. Таләпчән булырга да өйрәндем.
— Балалар, ә нинди алар?
— Алар төрле.Ул, элеккеге укучым әйтмешли, тормыш чуарлыгын белми торган чиста дөнья. Балалар белән мин һаман яшь.
— Алар матур әдәбият укыймы?
— Балалар китап укымый. Бу зур бәхетсезлек. Матур әдәбият укыган кеше генә телгә бай була. Ул фикерли белергә, теге яки бу хәлгә анализ ясый, нәтиҗә ясарга өйрәнә.
— Замана баласы компьютер каршында утыручы “автомат”ка әверелә бара, дип хафаланабыз.
— Рухи дөнья бары тик әдәбият аша гына байый. Әдәбият — ул тормыш, язучының образлар, вакыйгалар аша начарлык белән яхшылыкны төшендерүе, катлаулы хәлләрдән чыга белергә өйрәтүе. Телне өйрәнүгә аралашу өчен әһәмиятле чара итеп карарга кирәк. Югары уку йортына укырга керүче әйбәт сөйләшә белергә, укымышлы булырга тиеш. Балалар бездән акыллырак, әмма тирән белем җитеп бетми. Чөнки барысына да өлгерергә кирәк, бигрәк тә югары сыйныфлар өчен мәктәп программасы бик тыгыз эшләнгән.
— Бәйрәм уңаеннан теләкләрегез.
— Укытучыны кәгазь мәшәкатьләреннән азат итәргә иде. Югыйсә, аны кәгазь “тавы” артыннан күрмәскә дә мөмкиннәр. Минем кебек уңышлы хезмәт юлы үтүләрен телим: директордан, хезмәттәшләремнән һәм укучыларымнан уңдым. Укытучы буларак үземне хезмәтемнән таптым. Акыл тупладым. Һәркемгә сәла-мәтлек һәм уңышлар телим!
Румия НАДРШИНА