Кыш, әле син ашыкма!

Кыш, әле син ашыкма!
Сентябрь явым–төшемгә бай булды. Башта яңгыр койса, ай ахырында кар да күренде. Халык сынамышы буенча беренче кардан соң кырык көннән кар ятарга тиеш.
— Сентябрь ахыры бернинди сынамышларга да буйсынмады, — ди озак еллардан бирле сынаулар алып барган Кәче авылында яшәүче Рәсим Солтанов. — Әмма 9 октябрьдән көннәр ачыла, 22сенә кадәр һава торышы бик әйбәт булачак.
Рәсим абый һава торышына бик сизгер ана кортларның соңга кадәр йомырка салулары да көзнең озак киләчәгенә юрый.
Мин үзем дә күчмә кошларның җылы якларга китәргә ашыкмавын күзәтеп йөрим. Кар явасы көннең алдагы көнендә дә сыерчыклар килеп сайрап утырды, авыл карлыгачлары да очып йөри иде.
Бирсен Ходай, әле басуларда эшләр бик күп, халык та кишерен, чөгендерен алып бетермәгән. Ә менә “Ак Барс–агро” ширкәтендә 100 гектардагы бәрәңгене әйбәт көннәрдә җыйнап түбә астына ташып куйдылар, хәзер аны аралау, сату белән мәшгульләр.
— Икенче икмәкне җыйнап алуда Курса–Почмак, Сикертән, Сеҗе мәктәп-ләре, агросәнәгать көллияте укучылары, авыл җирлекләре хезмәткәрләре актив катнашты, — ди баш икътисадчы Ленар Абдуллин.
“Кырлай” ширкәтендә бәрәңге 400 гектарда игелде, 65 гектарын аласы калган. Ширкәтнең бәрәңге ала торган биш комбайны бар. Алар соңгы яңгырларда гына туктап торды, аңарчы тәүлек буе эшләде.
— Бүген бер комбайнны кызыл чөгендер алырга чыгардык, —ди ширкәт җитәкчесе Илшат Шакирҗанов.
Район хуҗалыкларында рапс 5304 гектарда игелгән иде. Шуның 3959 гектары җыйнап алынды.
Кукуруз 13333 гектар мәйдан били, шуның 7724 гектары урылды. Җыйналмаган гектарлар нигездә “Арча” ширкәтенә караган хуҗалыкларда.
13897 тонна сабан культуралары орлыклары салынырга тиеш. Шуның 12454 тоннасы салынган. Ун хуҗалыкта планнар үтәлгән. Ә менә “Арча” ширкәтенең “Арча” бүлекчәсендә үтәлеш 52,2 процент кына.
“Ак Барс–агро”, “Ватан”, “Курса МТСы”, “Нива”, “Сафиуллин” ширкәтләре туфракны төп эшкәртүне төгәлләделәр. Район буенча 27583 гектарда туфрак эшкәртәсе бар әле.
Ильяс ФӘТТАХОВ