Тормыш якты сез булганга

Тормыш якты сез булганга
Өлкәннәр ункөнлеге бара. Ул район Мәдәният йортында өлкәннәрне хөрмәтләү белән башланып китте.
Аларны Арча муниципаль район башлыгы Алмас Назиров, Татарстан Республикасы Дәүләт Советы депутаты Ринат Закиров котлады. Соңыннан матур спектакль куелды. Икенче көнне урыннардагы ветераннар советлары рәисләре, лаеклы ялда булсалар да, актив тормыш белән яшәгән өлкәннәребез районда соңгы вакытта төзелгән һәм ныклап төзекләндерелгән мәгариф һәм социаль–көнкүреш объектларында булдылар. Аларны район башкарма комитеты җитәкчесе урынбасары Надия Мифтахетдинова озатып йөрде.
Сәяхәткә кузгалыр алдыннан Надия Мифтахетдинова өлкәннәребезне бәйрәм белән котлады, район баш-лыгы Алмас Назировның җылы котлау сүзләрен җиткерде. Заманында районыбыз үсеше өчен зур хезмәт куйган, олы тормыш юлы үткән ветераннарыбыз бүген дә, кайсы гына өлкәне алсаң да, абруйлы киңәшчеләр, алыштыргысыз остазлар, ышанычлы ярдәмчеләр булып тора.
— Сез — урыннарда һәр эштә башлап йөрүчеләр, лидерлар, — дип бәя бирде аларга Надия Мифтахетдинова. — Бөек Җиңүнең 70 еллыгына әзерлек эшләре башланды. Һәрбер сугыш ветеранының, гомумән, һәр өлкән кешенең тормышы күз уңында булырга тиеш. Ялгызлыкта, мохтаҗлыкта тилмереп ятмыйлармы, торак, яшәү шарт-лары нинди — барысын да ачыкларга, кирәк икән — ярдәм кулы сузарга. Авыллардагы чишмәләр халыкны үзенә тартып торучы күркәм бер урынга әйләнсен. Зиратлар төзеклеге, чисталыгы белән изге урынны хәтерләтсен. Урамнарның чисталыгы, капка–коймаларның төзеклеге игътибар үзәгеннән төшмәсен. Мәктәп, балалар бакчаларындагы тормыш сезнең кебек зур тәҗрибә туплаган апа, абыйлар очрашулары белән кызыклы һәм тәрбияви, яшьләр өчен үрнәк булсын. Аксакалларның сүзе, гамәле һәрвакытта да үтемле һәм абруйлы. Сез бу эш-ләрне оештыруда фикерләрегез, тәкъдим, киңәшләрегез белән ярдәм итәрсез, дип ышанабыз.
Ветераннарга Арча урамнары буйлап сәяхәт кылу бик тәэсирле булды. Берсеннән–берсе матур күп фатирлы йортларның калкып чыгуы үзе бер могҗиза иде. Зәвык белән төзелгән шәхси йортлар да сокландыргыч.
— Күрче, бу матурлыкны, чисталыкны,— дип, хәйраннар калып күзәттеләр.
Программа бик эчтәлекле төзелгән иде. Ветераннар өлкәннәр һәм инвалидлар йорты, 2нче балалар бакчасы, педагогика көллияте, Өчиле фельдшер–акушерлык пункты, Кышкар мәчете, Яңа Кенәрдәге өлкәннәрне һәм инвалидларны тернәк-ләндерү үзәге, интернат–мәктәп, лицейда булып, андагы яңалыклар белән таныштылар. Бу объектларның барысы да диярлек төрле программалар нигезендә яңару кичерде. Ә менә Өчиле фельдшер–акушерлык пункты бинасының берничә ай эчендә өр–яңадан калкып чыгуы искитмәле хәл иде. Яңгырлы, пычрак вакыт, бинасына ничек үтәрбез, дип борчылган өлкәннәребез керү юлына бизәкле таш түшәлгән, тирә–юнен аллы–гөлле чәчәкләр камап алган курчак өедәй матур бер бинаны күргәч, хәзер төзи дә, матурлый да беләләр, дигән бәяне бирделәр.
Ветераннар арасында Арча педагогика көллиятен тәмамлаучылар да бар иде. Алар күңелгә якын уку йортының яңарыш кичерүен күреп шатландылар. Көллияттә укыту, белем алу сыйфаты да үзгәрәчәк. Сәләтле балаларны 7нче сыйныфтан укырга алып, 9 сыйныфны тәмамлагач, биредә укуларын дәвам итү мөмкинлеге тудырылган. Миллилекне югалтмыйча, телне, гореф–гадәтләрне саклап белем ала торган үзәк ул хәзер.
Ветераннар бу сәяхәттән матур тәэсирләр алып, рәхмәт әйтеп, әле яшисе дә яшисе дип, яңа эшләргә рухланып кайтты.
Румия НАДРШИНА