Шаяннар һәм тапкырлар көч сынашты
Район мәдәният идарәсе авыл җирлекләре арасында “Шаяннар һәм тапкырлар клубы” рәвешендә уеннар оештыра
26 марттан 11 апрельгә кадәр Гаилә елына багышланган “Гаиләле ШТК” лигасының беренче туры узды.
Беренче тур авылларда барса, финал өлеше Арча мәдәният йортында булачак. Сайлап алу турлары Яңа Кенәр, Урта Пошалым, Утар Аты, Иске Чүриле авыл мәдәният йортларында үтте. Барлыгы 18 команда катнашты. Катнашучыларга район мәдәният идарәсе вәкилләре бәя биреп барды.
Командалар иң элек тамашачыларны һәм жюрины сәламләп, үзләре белән таныштырдылар. Һәр команданың үз исеме, киеме, логотибы һәм үзләренә генә хас үзенчәлеге бар иде. Икенче биремнәр экранда тамаша кылынды. Командалар берәр видеоөзекне, гаилә темасына туры китереп, татарча тавышлы итәргә тиеш иде. Ахыргы биремдә иҗади номерлар каралды. Биредә командаларның ярдәмчеләре – 35 яшькә кадәрге эшче яшьләр концерт номерлары белән чыгыш ясадылар.
“Гаиләле ШТК”да районыбыз авыл җирлекләрендә яшәүчеләр үзләренең иҗади сәләтләрен шаянлык һәм тапкырлык аша күрсәтте. Бәйге Яңа Кенәр авылы җирлегендә 26 март көнне башланып китте. Яңа Кенәр, Ташкичү, Сөрде, Шурабаш, Шушмабаш, Яңа Кишет командалары нигезләмә буенча алдан әзерләнгән чыгышларын тәкъдим итте.
– Беренче коймак төерле булса да, ул бик тәмле булды. Безгә бик ошады. Һәр команданың да уенчылары үзенчәлекле. Һәркем үзенчә шаяра. Биредә без гаилә булмаганнарның бер гаилә булып китә алуын күрдек. Сәхнә туганлаштыра икән. Әлегә нәтиҗә ясамыйбыз. Барлык авыл җирлекләрендәге чыгышлар каралып беткәннән соң, иң яхшылар Арча мәдәният йортына чакырылачак, – диде жюри вәкиле, район мәдәният йорты директоры Рамил Мөхетдинов.
28 мартта Үрнәк, Иске Төрнәле, Күлтәс, Казанбаш, өч Пошалым, Иске Кырлай һәм Апаз авыллары җыелма командалары Урта Пошалым мәдәният йортына җыелды. Сәхнәдә юмор, гаилә кыйммәтләрен чагылдыручы чыгышлар, җыр-бию югары дәрәҗәдә әзерләнгән иде. Тамаша кылырга килүчеләр тарафыннан да рухи ярдәм бик көчле булды.
4 апрель көнне Утар Аты мәдәният йортында Наласа, Утар Аты, Түбән Аты, Яңа Кырлай, Яңасала авылларыннан һәм Арча шәһәреннән, дүрт командага тупланып, шаяннар һәм тапкырлар чыгыш ясады. Чара ахырында жюри рәисе, Арча районы мәдәният идарәсе җитәкчесе Илфар Әюпов чыгышларга нәтиҗә ясап, бу юнәлешнең районыбыз өчен яңалык булса да, һәр команданың әйбәт әзерләнгән булуын әйтеп үтте.
Иске Чүриле мәдәният йортында Сикертән, Кәче, Урта Курса һәм Иске Чүриле авылларының шаян һәм тапкыр катнашучылары үз җирлекләрен тәкъдим итте. Кәче авыл җирлеге башлыгы Руслан Гәрәев командасының чыгышы ахырында үзе дә сәхнәгә чыгып, оештыручыларга рәхмәт сүзләрен җиткерде.
Һәр команда үз җирлек-ләренең үзенчәлекләрен яктырткан чыгышлары, концерт номерлары һәм шаярулары белән җәлеп итте. Район мәдәният йорты сәхнәсендә иң көчле командалар чыгыш ясаячак.
Гөлнур Миннебаева