Ә исерекләр саны кимеми...
Гыйнвар аенда гына да районда исерек килеш руль артына утырып юлга чыккан ун кеше тоткарланды
Арча җәмәгать суды аларны административ хокук бозуда гаепле дип тапты һәм җәза билгеләде.
4 гыйнварда Үгез-Елга авылында ЮХИДИ хезмәткәрләре “Шевроле Нива” машинасын (дәүләт номеры Е887АХ/116) туктата. Йөртүчесе Альберт Гарәфетдиновның алкогольле эчемлек кулланган булуы ачыклана.
15 гыйнварда Арчаның Комсомол урамында Ләйсән Абзалованы (“Kia PS Soul” автомобиле, дәүләт номеры Х218РХ/116) ЮХИДИ бүлекчәсе инспекторлары тоткарлый. Ул да алкогольле эчемлек кулланган хәлдә руль артына утырган.
6 февральдә җәмәгать суды аларга 30 меңәр сум күләмендә штраф салган, икесен дә ел ярымга транспорт белән идарә итү хокукыннан мәхрүм иткән.
7 гыйнварда Арчаның Западная урамында “ВАЗ-21140” (дәүләт номеры У840ТМ/16) автомобилен туктаталар. Йөртүчесе Илназ Хурамшин эчкән була. Ул 24 гыйнварда тагын эчкән килеш руль артында эләгә. Әмма бу юлы махсус прибор ярдәмендә тикшерүдән баш тарта. 6 февральдә җәмәгать суды аңа да 30 мең сум штраф сала һәм ел ярымга таныклыгыннан мәхрүм итә.
13 февральдә үткән җәмәгать суды тагын дүрт кешегә шундый ук җәза биргән. 5 гыйнварда Рөстәм Низамиев (“Шкода YETI” автомобиле, дәүләт номеры В629НУ/716) Түбән Мәтәскә авылында тоткарланган. 6 гыйнварда Көтек авылында Рөстәм Вәлиуллов (“Киа Рио” машинасы дәүләт номеры М629АВ/716) тотылган, 12 гыйнварда Арчаның Комсомол урамында Алмаз Сәлимов (“Лада Гранта”, дәүләт номеры Е186СМ/716) эләккән. 30 гыйнварда “Арча-Мари Иле юлында Илшат Гатиятуллин (“Volrsvagen Polo”, дәүләт номеры К130АР/716) тотылган. ЮХИДИ хезмәткәрләре аларның исерек хәлдә руль артына утырганнарын урында исбатлый, беркетмә төзеп, эшне судка җибәрә.
18 гыйнварда Арчаның Шәрык урамында Рөстәм Галиев (“Лада Ларгус”, дәүләт номеры Х677ХН/116), 20 гыйнварда Зур Бирәзәдә Газчылар урамында Алмаз Хуҗин (“Лада Веста”, дәүләт номеры С597ЕУ/716) тоткарлана. 27 февральдә җәмәгать суды икесен дә административ хокук бозуда гаепле дип таба һәм 30ар мең сум штраф түләргә һәм ел ярымга машина йөртү таныклыгыннан мәхрүм калырга туры килә.