Татарстан абитуриентлары югары уку йортына керү өчен документларны почта аша җибәрә ала
Мәктәпне тәмамлаучылар сайланган уку йортына керү өчен документларны республиканың теләсә кайсы почта бүлекчәсеннән җибәрә ала. Россия Почтасы башка шәһәрләрнең югары уку йортларына документларны куркынычсыз җиткерү мөмкинлеге бирә торган берничә вариант тәкъдим итә.
Абитуриентлар документларны заказлы хат, игълан ителгән кыйммәтле бандероль, кушымталар исемлеге һәм тапшыру турында хәбәрнамә, шулай ук экспресс-җибәрү (EMS) белән җибәрә ала.
Документлар вакытында килеп, дөрес адрес буенча җиткерелсен өчен, почта хезмәткәрләре, югары уку йорты билгеләгән тапшыру срокларын исәпкә алып, аларны алдан җибәрергә киңәш итә. Шулай ук почта бүлегендә бирелгән квитанцияне сакларга кирәк. Анда Россия Почтасының сайтында яки мобиль кушымтасында хатны күзәтү өчен кирәк булачак трек-номер күрсәтелгән.
Документларны уку йортларына мөмкин кадәр тизрәк җибәрү өчен абитуриентлар EMS экспресс-җибәрүеннән файдалана ала. Россия Почтасы курьеры документларны клиент өчен уңайлы урында алып, шунда ук түләүне кабул итәчәк. Мондый хатлар өчен пакетны почта бушлай бирә.
Абитуриентның югары уку йортына барлык кирәкле документларны тапшыруын гарантияләү өчен кертемнәрнең исемлеген рәсмиләштерү киңәш ителә. Аны өйдә онлайн тутырып, принтерда бастырып була. Хат югары уку йортына китерелгәч, җибәрүчегә кире кайткан хәбәрнамә документларны алу турында раслау булып торачак.
Быел Россиянең күпчелек югары уку йортларында кабул итү кампанияләре 25 июльгә кадәр дәвам итәчәк.