Тырыш яшьләй

Тырыш яшьләй
Район балигъ булмаган балалар эшләре һәм аларның хокукларын яклау комиссиясе исәптә торган, тәрбиягә авыр бирелүче балаларны “Арча” спорт комплексына (бассейн) җыйды. Түгәрәк өстәл наркотикларга каршы көрәш айлыгы кысаларында үтте. Аны комиссия сәркатибе Альбина Бакирова алып барды.
Иң башта сүз район хас-таханәсе наркологы Рөстәм Әхмәтҗановка бирелде. Нарколог үзенең чыгышын үзара сөйләшү, әңгәмә рәвешендә үткәрде. Балалар аның чыгышын кызыксынып, уйланып, кирәк вакытта үз фикерләрен әйтеп тыңладылар.
— Бертуктаусыз тәмәкенең, наркотикларның зыяны турында сөйлибез, ә барыбер дә тартып, наркотикны кулланып торалар, хәтта ул очраклар арта бара, — дип сүзен башлады нарколог.
Балаларның үзләренә игътибарны җәлеп итәргә тырышуы, башкалардан аерылып торырга омтылуы табигый хәл. Ярый ла ул яхшы укуы, спорт, берәр төрле иҗат эше белән аерылып торса — болар барысы да зур тырышлык, хезмәт бәрабә-ренә ирешелгән уңышлар шул.
— Ә безнең тырышасы, эшлисе килми, без — ялкау, — дип сөйләшүне дәвам итте нарколог. — Бездә бернинди дә җаваплылык юк: ни ата–ана алдында, ни укытучылар, ни Ватан алдында... Ә иң ансаты ярамаганны, тыелганны эшләү, начарлык кылу, әти–әнине, укытучыны санламау. Шушы юл белән, ягъни ак карга буларак башкалардан аерылып торасың, игътибар җәлеп итәсең. Шәп бит! Ә тапкырлау таблицасын белмәүчеләр күпме?! Ә нәрсәгә кирәк ул математика? Физика, химия... Тормышыбыз тоташ шушы фәннәрдән тора, лабаса. Туган илеңнең тарихын белмәүне ничек аңларга? Без Бөек Ватан сугышы геройларын, хәтта генералларын белмибез! Менә шулай без үзебезне, әби–бабаларны, Ватанны “хөр-мәт итәбез”... Җаваплылык юк.
Хезмәт, бары тик хезмәт кенә адәм баласында җаваплылык тойгылары тәрбияли — бу тормышта исбатланган хакыйкать. Район мәгариф идарәсе методисты Миләүшә Гарифуллина Россия Федерациясе Конституциясендә каралган хокуклар һәм бурычлар турында сөй-ләде.
— Сез әти–әниегез, укытучылар кайгыртуына җавап итеп тырышып укырга, тәртип бозмаска, законнарны үтәргә тиеш, — дип аңлатты методист.
“Арча” спорт комплексының йөзү буенча тренеры, методист Гүзәл Мозафарова биредә нинди спорт төрләре белән шөгыльләнеп булуы хакында сөйләде. Балалар спорт комплексы белән таныштылар. Заманча тренажерлар һәм бассейн, чыннан да, кызыгырлык иде.
Балалар күңелендә түгәрәк өстәл артында сөйләшү эзсез үтмәс, дип уйлыйм. Чыннан да, уйландырырлык иде ул сөйләшү. Хезмәт белән мәшгуль баланың тормышында начар гамәл-ләргә бушлык калмаячак. Шул исәптән тәмәкегә һәм наркотикка да. Балалар күңеленә әнә шушы хакыйкать яхшы итеп сеңдерелде. Язмамны Г.Тукайнның гыйбрәтле сүзләре белән тәмамлыйм:
Юк, кирәкми, мин өйрәнмим, минем уйныйсым килә;
Шул болыннарда ятасым, шунда ауныйсым килә.
— Ах, җүләр маэмай! Тырыш яшьләй, —зурайгач җайсыз ул;
Картаеп каткач буыннар, эш белү уңайсыз ул!
( “Кызыклы шәкерт “)
Румия НАДРШИНА