Хезмәт кешесенә хөрмәт

Хезмәт кешесенә хөрмәт
Эш беткәч, уйнарга ярый, диләр. Авыл җирендә эш бетми инде ул. Әмма “Ак Барс–агро” ширкәтендә хезмәтне ял белән чиратлаштыра беләләр. Җылы, якты Сикертән мәктәбенең иркен спорт залына җыелып мул табынлы өстәлләр артында Авыл хуҗалыгы хезмәткәрләре көнен бик матур итеп үткәрделәр.
Колхозлар заманында мондый бәйрәмнәр һәркайсында уза иде. Аякны юрганыңа карап сузасың дигәндәй, бүген инде мондый мөмкинлеге булганнар бер кул бармаклары санына да җыелмый. Әле менә Сикертәнгә килеп җитәрәк коеп яңгыр явып үтте, кем әйтмешли, болыт егылып төште, диярсең. Вакытында игеннәрне, бәрәңгене җыеп алган, җирен тулысынча эшкәрткән, терлек азыгын мул итеп әзерләгән хуҗалык җитәкчесе, белгечләре, игенчеләренең күңелләре тынычтыр бүген, дигән уй килде. Дөрестән дә, залда утырган һәркемнең йөзе шат, күңеле күтәренке иде.
Ширкәт җитәкчесе Шәйдулла Сәлахов бәйрәм белән котлап, ирешелгән уңышларны әйтеп үтте.
Быел һәр гектардан 36,2 центнер бөртек, 338 центнер бәрәңге җыйнап алдылар. Холдинг җитәкчесе урынбасары Җәүдәт Гафаров әйтүенчә, бу холдингка кергән хуҗалыклар арасында да иң яхшы күрсәткеч.
Муниципаль район башлыгы Алмас Назиров ширкәт хезмәт-чәннәренә ирешкән уңышлары өчен рәхмәт әйтте.
— Сез матур эшләрегез белән үрнәк булып торасыз, — диде ул. — Һәр өлкәдә шулай. Районыбызны ныгытуга керткән өлеше өчен холдинг җитәкчесе Иван Егоровка бик рәхмәтлебез!
Район башлыгы хезмәт алдынгыларына Рәхмәт хатларын тапшырды. Алар арасында тракторчы Зәкәрия Динмөхәм-мәтов, аталы–уллы комбайнчылар Ренат һәм Алмаз Котдусовлар бар. Зәкәрия Динмөхәм-мәтов гомере буе чылбырлы тракторда эшли, лаеклы ялга чыккач та яшьләр көнләшерлек итеп эшләвен дәвам итә.
Бу көнне игътибар үзәгендә булган тагын бер шәхес турында әйтми мөмкин түгел. Ширкәт җитәкчесе Шәйдулла Сәлахов галимнәр белән эшләргә ярата, аның фәнни киңәшчесе авыл хуҗалыгы фәннәре докторы Марсель Маликов җәй буе басудан кайтып керми. Яңа культуралар кертү, төрле сортларны сынап карау, башка төрле тәҗрибәләр үткәрү белән мәшгуль ул.
— Без Марсель абый нәрсә әйтер икән, дип кенә торабыз, — ди Шәйдулла Сәлахов.
Марсель абыйга шушы көнне 80 яшь тулган икән! Гомере буе табигать белән гармониядә яшәгән кешегә, билгеле, әле мондый яшьне биреп булмый. “Уракчы кыз”ны җырлаганда бигрәк тә!
Алмас Әминович та галим адресына җылы сүзләр әйтте, Мактау грамотасы тапшырды.
Казан артистлары матур җырлар бүләк итте, бәйрәм әнә шулай күңелләргә хуш килерлек итеп оештырылган иде.
Икенче көнне шушы залда терлекчеләрне хөрмәтләделәр.
Әлеге тармакта да макталырлык итеп эшлиләр. Гөлия Гасыймуллина, Гөлшат Әгъзәмова, Нурзидә Мөхәммәтгалиева, Ләлә Зарипова, Гөлнара Гайфуллина, Зәмзәмия Сәгыйрова, Рания Газизова, Галина Абдуллина, Венера Мөхәммәтгалиева, Галина Васильева, Фирдинә Исхакова, Лилия Локманова быел тугыз айда һәр сыердан 7631–7280 килограмм, барысы 400әр тоннага якын сөт савып алдылар.

Ильяс ФӘТТАХОВ